بی این ایم - براہوئی

بی این ایم - براہوئی

5/21/2025, 4:36:12 PM

*پانک اپریل 2025 نا رپورٹ: بلوچستان آن 151 بندغ زوراکی ئٹ بیگواہ و 23 بندغ نا وے عدالت آن کوش* چار شمبے ، مئی 21، 2025 | بن شون : PRBNM44/2025 پی ڈی ایف : https://thebnm.org/wp-content/uploads/2025/05/Paank-HR-Report-April-2025.pdf https://thebnm.org/brahui/paank/20761/ پانک نا توئی رپورٹ نا رد ئٹ بلوچستان ئٹی زوراکی ئٹ بیگواہی و وے عدالت آن ریاستی کوش ئنا تدینیک ہر وخت نا وڑ ئٹ برجاء ءُ۔ بلکن دافتیٹی بھلو کچ ئسے اسکان زیاتی بسُنے۔ بلوچ نیشنل موومنٹ نا بندغی حق آتا ادارہ پانک نا کنڈ آن شابیتی ئٹ شنگ مروک رپورٹ نا رد ئٹ بندغی حق آتا لتاڑنگ نا کیہی سوگو او کاروائی تیٹی بلوچستان نا 18 ضلع ٹی بلوچ آبادی ئے ٹک کننگانے۔ پانک نا کنڈ آن ہر اسہ تدینی ئے پک کرسہ اودے رپورٹ نا بشخ جوڑ کننگانے۔ اپریل 2025 ئٹی 151 بندغ ئے زوراکی ئٹ فوج و ایلو ادارہ آک بیگواہ کرینو۔ غُٹ آن گیشتر زیمی مروکا ضلع کیچ ءِ ہراکان 53 بندغ زوراکی ئٹ بیگواہ مسُر۔ اوکان پد گوادر ئٹی 19 و شال آن 18 بندغ نا بیگواہی نا رپورٹ رسینگانے۔ ایلو ضلع آتیٹی بندغی حق آتا لتاڑ برجاء ءِ، ہرافتیٹی ڈیرہ بگٹی 13، پنجگور ئٹی 8، آواران ئٹی 7، سیبی ٹی 6، بارکھان ئٹی 5، کراچی و مستونگ ئٹی 4، لسبیلہ موسی خیل چاغی خضدار قلات ئٹی 2 ، 2 ہندن واشک خاران سوراب و نوشکی آن اسہ اسہ بندغ ئے بیگواہ کننگانے۔ دا حساب ئٹ تدینیک دا ظاہر کیرہ کہ بلوچ الس ئے اسہ رنگ ئٹ زوراکی نا نشانہ کننگ مننگ ئٹی ءِ۔ پانک نا رپورٹ نا رد ئٹ زوراکی ئٹ بیگواہی نا وخت آ بندغ آتے اوفتا خاہوت و جہان آن وے خبر تخنگِک۔ و کیہی کیس آتیٹی بیگواہ مروک آتے وے عدالت آن کھسفنگِک۔ اپریل نا تو ئٹی 50 بندغ پاکستانی لشکر نا زندان آتیان آجو مسنو۔ 23 بندغ ئے وے عدالت آن کھسفنگانے۔ دافتیٹی پاکستانی لشکر اوار ءِ۔ کیہی بندغ آک وے قانودی ئٹ دزگیر مننگ نا یا لٹ ئہ کٹ نا وخت آ ٹپی ہم مسنو ولہ اوفتا تیبہ کچ و حساب رسینگتنے۔ رپورٹ ئٹی زوراکی ئٹ بیگواہ مروکا تا زندان ئٹی کھسفنگ نا تدینی تا رپورٹ ہم شابیتی ئٹ شنگ کننگانے۔ اپریل 2025 ئٹی بلوچستان ئٹی وے قانودی ئٹ کھسفنگ نا تدینیک رپورٹ مسنو ہرافتیٹی کیہی بندغ آتے بیگواہی آن پد کھسفنگانے۔ عبدالمالک بلوچ ئے 11 اکتوبر 2024 آ کیچ آن بیگواہ کننگا و 4 اپریل آ اونا جون باغبانہ خضدار آن دو تما۔ شاہ نواز و ظہور احمد ئے 5 اپریل آ مشکے آواران آن بیگواہ کرسہ زندان ئٹی کھسفنگا۔ ہندن حبیب بلوچ ئے مارچ 2055 ئٹی بیگواہ کرسہ اوفتون اوار 5 اپریل آ کھسفنگا۔ ساحل بلوچ ہرا 12 سال نا چنا ئسے ئے اپریل ئٹی پسنی گوادر آن بیگواہ کننگا، اندن اونا جون شاہ جان ہوٹل پسنی نا پد آن دو تما ۔ محراب و خان محمد ئے 6 اپریل آ بیگواہ کرسہ کھسفنگا۔ حق نواز، شیرو و گل زمان بزدار ئے 5 اپریل آ بارکھان آن بیگواہ کرسہ دروغ ئنا مونتس ئٹی کھسفنگا۔ بہادر شفیع و اونا مسہ سیال ئے 7 اپریل آ وشبود پنجگور ئٹی ڈیتھ اسکواڈ نا کارندہ آک ٹک کرسہ کھسفیر۔ نادر بلوچ ئے کنداری مشکے آن بیگواہ کننگا و ایلو دے اونا جون دو تما۔ نظام بلوچ ئے پسنی آن بیگواہ کننگا اندن 16 اپریل آ اونا جون دو تما۔ فاروق بلوچ ئے 14 اپریل آ خضدار آن بیگواہ کننگا و 15 اپریل آ اونا جون نال آن خننگا۔ شیر خان نذر ئے تربت آن بیگواہ کرسہ 17 اپریل آ کھسفنگا۔ نبیل بلوچ ہرا تعلیم و صحافت تون تفوک اسک ئے تمپ کالج کیچ ئٹی سمکاری کرسہ کھسفنگا۔ ضلع دکی ٹی وے عدالت آن سرمچار پارِسہ کیہی بندغ آتے دروغ نا مونتس آتیٹی کھسفنگا۔ ہرافتیٹی محمد دین ، اعجاز مری، نبیل مری و خیر محمد مری اوار ءُ۔ رپورٹ دا ظاہر کیک کہ پاکستانی فوج دا ظلم آتیٹی اوار ءِ ہرا ہر وڑ ئنا قانودی کاروائی تیان آزات ءِ۔ زندان تا ہند و دزگیری نا مرکز آتا معلومداری وے تننگ و زیمی مروکا تا خاہوت و وکیل آتے ملاقات آن توننگ دا وے بندغی آ روشت نا اسہ پاش او دلیل ئس ءِ۔ پانک نا رپورٹ ئٹی پاکستانی لشکر نا مخ تفی ٹی جوڑ کروک ڈیتھ اسکواڈ نا ذریعت ئٹ کھسفنگ مروک بندغ آتا ذکر کننگا۔ ڈیتھ اسکواڈ پاکستانی لشکر نا بلوچستان ئٹی بے رحم و قانود آن بُڑز انگا کھسفنگ نا مشین نا کڑدار ئے ادا کننگ ئٹی ءِ۔ پانک جہانی و ایلو ادارہ تیان خواست کیک کہ او زوت آن زوت دا کیس آتا آزاتی ئٹ پٹ و پول ئے کے۔ زوراکی ئٹ بیگواہ مروک بندغ آتا معلومداری ایتے کہ اوفتے اراڑے، انتئے و انت ڈوھ ئسینا رد ئٹ زندان آتیٹی تخنگانے و زوراکی ئٹ بیگواہی نا ذمہ وار آتا برخلاف کاروائی کننگ مرے۔ پانک تینا رپورٹ نا ایسر ئٹ جہانی ایلکمو آن خواست کیک کہ او زوراکی ئٹ بیگواہ مروک بندغ آتا رکھنگ کن جہانی کنوینشن نا توثیق و نفاذ ئے یخینی جوڑ کے و اندنو گام ہرفے ہرا بندغی حق آتا لتاڑ ئے توننگ کیر۔ زوت گامگیج ئس ہرفنگ متو تو بلوچستان ئٹی دا زوراکیک نہ بیرہ اسہ بندغ ئسینا حق آتے زیمی کرو بلکن تیبہ خطہ نا امن و استحکام ئے زیمی کرو۔ *« سوشل میڈیا لنکس : ایکس |فیس بک | ٹیلی گرام | واٹساپ چینل »* https://x.com/BNMbrahui/status/1925228369500680476 https://www.facebook.com/share/p/1BmpeDrTRp/ https://t.me/bnmovement/6613 https://whatsapp.com/channel/0029VaAyYMy8vd1Ga4AgZ32V

بی این ایم - براہوئی

5/27/2025, 7:51:37 PM

*28 مئی آ بلوچستان ئٹی زندگی تے بھس کننگا، پاکستان نا ایٹمی تراک آتا برخلاف بی این ایم جرمنی نا جرمنی ٹی برانز و اسٹریٹ تھیٹر* سئے شمبے ، 27 مئی ، 2025 | بن شون : PRBNM45/2025 https://thebnm.org/brahui/protests/20763/ عکس : https://thebnm.org/footages/23246/ بلوچ نیشنل موومنٹ (بی این ایم) نا کنڈ آن 28 مئی 1998 آ بلوچستان ئٹی پاکستان نا ایٹمی تراک آتا برخلاف جرمنی نا شار گوئٹنگن ئٹی برانزی ریلی ئس کشنگا و 'ہراتم مَشک ہوغار' نا سرحال ئٹ اسٹریٹ تھیٹر نا ذریعت ئٹ ایٹمی تجربہ آتا بھرم و اوفتا نسخان آتے مونا ہتنگ مسک۔ تران کروکاک تران کرسہ پاریر کہ پاکستان نا ایٹمی تجربہ غاک رکھنگ کن آخہ بلکن اسہ پد سلوک او قوم ئسینا بدخلاف تشدد نا گام اسُر۔ دانا سوب چاغی نا بندغ آک تابکاری، ناجوڑی و علاقہ آن کشنگ نا وڑ انگا عذاب آتے خنار۔ او دے آ بلوچستان نا الس ئنا اجازت آن بیدس چاغی نا اسہ کشاری او علاقہ ئسے ایٹمی گند ئٹ مٹ کننگا۔ او پاریر کہ دا تجربہ آتا بھرم ئٹی اینو اسکان چاغی نا بندغ آک زہر ئی آ تہو ٹی دم ہلیرہ و زہر ئی آ دیر تے کنیرہ۔ چاغی نا علاقہ کینسر و جینیات ئے زیمی کروکا ناجوڑی تا ہند جوڑ مسنے۔ پاکستان پائک کہ چاغی اسہ غیر آباد او علاقہ ئسے ولہ اوڑے 2 لکھ 69 ہزار بندغ رہینگرہ۔ اوفتا اُرا، کشار و تُغ آکو۔ دا ایٹمی تراک آک بیرہ مش تے آخہ بلکن زندگی تے ہم پھش پھش کریر۔ تران کروکاک پاریر کی 28 مئی مون او دے ئسے۔ دا ہمو دے اسک ہراتم بلوچ نا زندگی اے بے قیمت پارسہ ننا وجود ئٹی بم دفن کننگا و جشن کننگا۔ ولہ ننا قوم بے وسی ئٹ پوہاڑ کرے۔ جرمنی ٹی بی این ایم نا برانز ئٹی پاننگا کہ پاکستان دا ایٹمی آ تجربہ آتے ہندنو علاقہ ئسیٹی کرے کہ ہرا مھالو آن نیستی و زوراکی نا گواچی اسک۔ نہ رکھنگ نا گام ئس ہرفنگا نہ او جاگہ نا بندغ آتے کشنگا و نئے کہ اوسوز نا درشانی ئس کننگا۔ اینو ہم چاغی نا بندغ آک تابکاری نا زیم آتیتو مون تننگ ءُ۔ او جہانی ایلمکو آن پاکستان نا ایٹمی تجربہ آتا وخت آ بے پامی و دافتا بھرم ئٹی تابکاری و ماحول نا خراب مننگ آ پٹ ئہ پول و پاکستان نا ایٹمی سلاہ تا برخلاف گامگیج ہرفنگ نا خواست کننگا۔ تران کروکا تیٹی بی این ایم جرمنی چیپٹر نا صدر شرحسن بلوچ، نائب صدر صفیہ بلوچ، جوائنٹ سیکریٹری شلی بلوچ، بی این ایم نا باسک آصف بلوچ، فیصل خالد ، اکبر بلوچ و شلی ذاکر اوار اسُر۔ #NukeAftermathInBalochistan *« سوشل میڈیا لنکس : ایکس |فیس بک | ٹیلی گرام | واٹساپ چینل »* https://x.com/BNMbrahui/status/1927451689457533135 https://www.facebook.com/share/p/1UyeRwut2q/ https://t.me/bnmovement/6647 https://whatsapp.com/channel/0029VaAyYMy8vd1Ga4AgZ32V

بی این ایم - براہوئی

5/30/2025, 1:13:39 PM

*کوزہ مروک بلوچستان نا اُلس پاکستان نا چم آتا شیف مذہبی دہشت گردی و گندہ انگا ایٹمی پروگرام آن زیمی ءُ۔ بی این ایم نا امریکہ ٹی 28 مئی آ کیمپئن* آدینگ ، 30 مئی ، 2025 | بن شون : PRBNM47/2025 https://thebnm.org/brahui/campaigns/20772/ بلوچ نیشنل موومنٹ جیان ئے دا باور کرفنگ خواہک کہ کوزہ مروک بلوچستان نا الس نہ بیرہ پاکستان نا روکو راست جلہو تا گواچی ءِ بلکن دانا غیر روایتی پالیسی، دن کہ مذہبی دہشتگردی و ایٹمی پروگرام آن ہم زیمی مننگ ئٹی ءُ۔ دا خیال آتا درشانی ئے بلوچ نیشنل موومنٹ نا کنڈ آن امریکہ نا پائتخت واشنگٹن ڈی سی ٹی وائٹ ہاوس و امریکہ نا ڈنی محکمہ نا مون آ واشنگٹن اسٹیٹ ئٹی اسہ وخت آ آگہی مہم ہم چلیفنگ مسک۔ بی این ایم امریکہ چیپٹر نا صدر سمیع بلوچ نا بھلنی ٹی دا مہم نا وخت آ پارٹی نا کنڈ آن 28 مئی نا رد ئٹ پمفلٹ ونڈ کننگا۔ دا مہم ئٹی محمد حسن و بی این ایم واشنگٹن اسٹیٹ نا باسک آک بشخ ہلکُر۔ 28 مئی آ بی این ایم نا کنڈ آن جہانی سطح آ پاکستان نا ایٹمی پروگرام نا بلوچستان ئٹی ماحولیاتی زیم آک و دا خطہ آ سیاسی زیم آتا بارو ئٹ سوگو او مہم ئس چلیفنگا، ہرانا رد ئٹ امریکہ آن بیدس جرمنی و نیدر لینڈ ئٹی ہم برانز کننگا۔ ہندن بلوچستان نا کیہی شار آتیٹی دن کہ گوادر، تربت و دا شار آتا خڑک ئنا خلق و دیہات پشوکان ، کلدان ، کلاتک ، شئے کھن ، نودز و ناصر آباد ئٹی پمفلٹ ونڈ کننگا۔ بی این ایم نا پمفلٹ آک بھلو کچ ئسے ئٹ ڈیجیٹل ذریعت ئٹ ونڈ کننگ مریرہ۔ ہندن پارٹی بھاز وخت بلوچستان نا الس ئنا نیام ئٹی تینا ساڑی مننگ نا درشانی ئے کننگ کن شار تا تہہ ٹی بھلو کچ ئسے ئٹ روایتی وڑ آتے کارمرز کرسہ چاکنگ کیک و پمفلٹ ونڈ کیک، ہرا کہ ڈیرہ غازی خان آن جیمڑی اسکان کننگ مریرہ۔ امریکہ ٹی مروک مہم نا وخت آ دا کنڈ آ ہم پام تننگا کہ کوہ ِ سلیمان نا بندغ آک ہم ایٹمی تابکاری تا سوب جتا وڑ نا کینسر و ڈی این اے ئے نسخان تروکو ناجوڑی تا گواچی مسنو، ہراکان یورنیم نا کانکنی کننگِک و ڈیرہ غازی خان نا آباد آ علاقہ بغلچور ئٹی پاکستان اٹامک انرجی کمیشن ایٹمی آ گند آتے کھڈ کیک۔ غیر جانبدار آ ادارہ آک ہم دا معاملہ نا جائزہ ئے ہلنگ کن اسہ آزات او پٹ ئہ پول کروک کمیشن ئسینا خواست ئے کرینو، ہراڑا داسکان ہچو کاریم ئس کننگتنے۔ امریکہ ٹی بی این ایم نا باسک آک واشنگٹن ئٹی الس ئتو حال و حوال نا ذریعت ئٹ بندغ آتا پام ئے ہندا کنڈ آ کریر کہ 1998 آن مست پاکستان تینا ایٹمی پروگرام ئے پر امن آ مسخت آتا دوئی کننگ نا سوب پاریکہ ولہ ہراتم اودے موقع دو بسک تو پاکستان نا ڈھکوک فوجی حکومت تینا گندہ انگا عزائم تے بے نقاب کرسہ 28 مئی 1998 آ بلوچستان نا ضلع چاغی ٹی و 30 مئی 1998 آ خاران نا ریگزار ئٹ ہندی آ آبادی ئے پاننگ و کشینگ نا بند و بست کننگ آن بیدا شش وے قانودی او تجربہ کرے۔ دعوی کننگ مریک کہ تابکاری نا زیم آک زمین نا شیف آن مننگ نا سوب آن تالان مسر و داڑا سائنسی فکشن نا انداز ئٹ جوانی ئٹ پڑدہ شاغنگ نا کوشست کننگ مریک۔ پاکستان نا دروغ انگا دعوی تے بے نقاب کرسہ او پاریر کہ دستاویزی ثبوت و ویڈیوک ساڑی ءُ کہ ایٹمی تراک آتے آن راسکو نا ٹُھل آ خاخر آک لگار و تابکاری نا زیم آتا سوب آن اونا بور انگا رنگ ہِس ئنا رنگ ئٹ مسک۔ دا تجربہ تے آن پد چاغی و خاران نا ماحول ئے براہ راست ایٹمی تابکار مواد آتون مون پہ مون مروئی تما۔ ہرانا سوب آن دا علاقہ نا نیاڑی، نرینہ و چناک دتر نا کینسر (لیوکیمیا) جتا وڑ ئنا کینسر و تھیلیسیمیا نا وڑ انگا کھسفوک آ ناجوڑی تا گواچی مرسہ مرگ ئنا با ٹی ہننگ ئٹی ءُ۔ تابکاری آن زیمی مروک علاقہ آتیٹی چنا ودی کننگ نا کچ ئٹی ہم کمی بسُنے۔ *« سوشل میڈیا لنکس : ایکس |فیس بک | ٹیلی گرام | واٹساپ چینل »* https://x.com/BNMovement_/status/1928438701345894430 https://www.facebook.com/share/p/19E4CqGCw2/ https://t.me/bnmovement/6706 https://whatsapp.com/channel/0029VaAyYMy8vd1Ga4AgZ32V

بی این ایم - براہوئی

5/28/2025, 1:48:06 PM

*پمفلٹ : پاکستان نا ایٹم بمب۔ بلوچستان و ایلو علاقہ آتا زیم آک* https://thebnm.org/brahui/pamphlets/20768/ پی ڈی ایف : https://thebnm.org/brahui/wp-content/uploads/2025/05/28May-Pamphlet-2025-Brahui.pdf ایٹمی تاغت یا ایٹمی دہشت گرد ؟ پاکستان گیشتر ہندا دعوی ئے کیک کہ او بھارت نا ایٹمی تجربہ آتا ورندی ٹی ایٹمی تراک کرینے ، ولہ راستی داد ءِ کہ پاکستان بھارت نا ایٹمی تراک آتیان مھالو ایٹم بمب جوڑ کننگ نا فیصلہ کریسس۔ پاکستان ایٹمی توانائی کمیشن نا باسک و چاغی ون تراک کروکا سائنسدان آتا ٹیم ئنا بھلا ڈاکٹر ثمر مبارک مند نا رد ئٹ 1972 ئٹی ہمو وخت ئنا وزیر اعظم ذوالفقار علی بھٹو ڈیھ ئنا سائنسدان آتے ملتان ئٹی مُچ کریسس" تو اوڑے نن حقیقت ئٹی ایٹمی سلاہ جوڑ کننگ نا قسم کنگُسُن" پاکستان نا جوڑ کننگ اسہ غیر فطری ونڈ مننگ ئسے نا بھرم ءِ، ہرانا دارومدار مذہبی بنیات آ نفرت و بیرہ پن ئنا نظریاتی سرحد آتا رکھنگ آٹے۔ ہندا بنیات دادے مدامی اسہ فوجی ریاست ئس جوڑ کیک۔ ہرا تینا وجود کن چرجوئی ئٹ پیشن نا دشمن جوڑ کننگ ئٹی ءِ۔ اگہ پاکستانی فوج دہن کپ تو تہہ نا جیڑہ آتیتو مون تننگ اوڑکن مشکل مرو۔ انتئے کہ پاکستان محکوم آ قوم آتا ڈغار آ برجاء ءِ ہرا دا ریاست آن آجوئی خواہرہ، ہندن بلوچ قوم تینا ہم تینا آجوئی کن نت دو خلنگ ئٹی ءِ۔ چاغی ایٹمی تجربہ نا میدان 28 مئی 1998 آ پاکستان ضلع چاغی نا مشی آ سلسلہ "راسکوہ" ٹی ایٹمی تراک کرے۔ ہرا دوستان وڈ نا دیہات چھتر تو مون پہ مون ءِ۔ دوستان وڈ 344 مربع کلومیٹر نا کچ شابیت او جاگہ ئسے۔ دا عیلاقہ غیر آبا پاننگا، ولہ حقیقت ئٹی نہ بیرہ داڑے ہزار آتا کچ بندغ آک رہینگرہ بلکن دا مشک دیر ئنا قدرتی مڈی و ہندی حیاتی نا ذریعت ءُ۔ چاغی نا تیبہ آبادی 2023 نا مردم شماری نا رد ئٹ 2 لکھ 69 ہزار ءِ ۔ دا جاگہ نا زمین، مش جھل و ڈغار نا تہہ نا دیک ہندی بندغ آتا مال داری و زمینداری نا بنیاتی آ سہارا کو۔ ایٹمی زیم آک و ریاست نا نمن کننگ دا تجربہ تیان پد چاغی و خڑک ئنا علاقہ آتیٹی تابکاری نا زیم آتیان کینسر، سل ئنا ناجوڑی و دم ئنا ناجوڑیک لس مسنو۔ ہندن پاننگ کہ ڈغار نا تہہ نا دیرک ہم زیم آتیان خراب مسنو۔ ہندی میڈیا و تنظیم آک دا جیڑہ تے مونا ہیسونو۔ ولہ ریاست نہ بیرہ پٹ ئہ پول آن تینے تورے بلکن زیمی مروکا تا کمک کننگ آن ہم نمن کرے، حقیقت ئٹی دا بلوچستان ئٹی ایٹمی تجربہ آخہ بلکن بلوچستان آ ایٹمی جلہو اسک۔ علاقہ ٹی فوجی بھلنی و الس ئنا پسماندہ مننگ پاکستان چرجوئی ئٹ رکھ و جنگی تیاری تا پن آ الس ئنا مڈی تے فوجی ادارہ تے آ خڑچ کنگ ئٹی ءِ۔ دانا بھرم دادے کہ خواننگ، جان جوڑی و پوریا وے مننگ نا کچ ءِ۔ الس نیستی و محرومی نا گواچی ءِ۔ ہمسایہ ڈیھ تیٹی مداخلت و مشکل ودی کننگ مریک۔ ایٹمی تاغت مننگ نا پڑو و ہمسایہ ڈیھ تے ایٹمی جلہو نا تڑی تننگ حقیقت ئٹی پورو علاقہ کن اسہ بھلو خطرہ ئسے۔ جہانی ایلمکو آن خواست پاکستان نا وڑ او غیر مستحکم او ڈیھ ئسینا دو ٹی ایٹمی سلاہ تا مننگ جہانی امن کن خطرہ ءِ۔ بندغ آتا رکھنگ کن المی ءِ کہ پاکستان ئے جہانی تاغت آتا بھلنی ٹی ایٹمی تاغت آن محروم کننگ مرے۔ بلوچستان ئٹی ایٹمی تجربہ تے آن زیمی مروکا تیکن پٹ ئہ پول و کمکی گام ہرفنگ مرے۔ دا بیرہ بلوچستان نا آخہ بلکن بندغی سلامتی نا سوال ءِ۔ *بلوچ نیشنل موومنٹ ( بی این ایم )* ☢️ #NukeAftermathInBalochistan

بی این ایم - براہوئی

5/16/2025, 7:13:38 PM

*بھارت ئے چنکو کچ ئسے اسکان کاروائی کننگ نا جہہ آ علاقائی توازن ئے ہُرِسہ اسہ سوگو او روڈ میپ ئس جوڑ کروئی مرو۔ ڈاکٹر نسیم بلوچ* آدینگ ، 16 مئی ، 2025 |بن شون : PRBNM43/2025 https://thebnm.org/brahui/chairperson/20759/ بلوچ نیشنل موومنٹ (بی این ایم) نا چیئرمین ڈاکٹر نسیم بلوچ زوت ئٹ مروک بھارت و پاکستان نا نیام ئٹی جیڑہ نا بارو ئٹ پارے کہ دا بیرہ ارا ڈیھ نا جیڑہ افک بلکن ہندوستان نا ونڈ مننگ آن پد ہمو تاریخی آ سانحہ نا چرجوئی ءِ، ہرانا نسخان آتیتو اینو اسکان بلوچستان توان اوار ایلو خطہ مون تننگ ئٹی ءِ، ہندوستان نا ونڈ مننگ خطہ ٹی متکُن آ ریاست، قوم ، و امن و استحکام نا امکان آتے مدامی کن ایسر کرے۔ دانا بھرم ئٹی دا خطہ ٹی جہہ ئس باسن و جہہ ئس یخ انگا جنگ ئنا جمر آک مدام کاٹم آ اریر۔ او پارے کہ بھارت نا کنڈ آن پاکستان آ مروک چنکو کچ ئسے اسکان مروک ڈھکوک جلہو ، جنگ بندی نا پڑو آک و کھٹنگ و با تننگ نا نا یاو یاو ئٹی کھل آن اہم انگا ہیت ڈھکنگ مننگ ئٹی ء ِ۔ او دادے کہ بلوچ، پشتون ، سندھی و کشمیری قوم آک دا جنگ آ پاش تینا موقف ئے اختیار کرینو کہ دا پاکستانی پنجابی اسٹیبلشمنٹ و ہندوستانی ریاست نا نیام ئٹی ءِ ِ و کوزہ مروک قوم آک داڑ تو تعلقداری تخپسہ۔ ڈاکٹر نسیم بلوچ پارے کہ اگہ جائی بھارت دا خطہ ٹی سوگو او امن، پائیدار ترقی و پاکستانی دہشتگردی نا مدامی کن ایسری نا خواہوک ءِ تو اودے بیرہ چنکو کچ ئسے ئٹ کاروائی تا انحصار کننگ نا جہہ آ بنیاتی سیاسی حرکیات، کوزہ مروک قوم آتا حیثیت و علاقائی توازن ئے ہرِسہ روڈ میپ جوڑ کروئی مرو۔سخت و پاش سیاسی عسکری تجزیہ آن بیدس ایٹمی سلاہ تے آن سلاہ بند پاکستان نا وڑ انگا نظریاتی شدت پسند ریاست ئے بیرہ چنکا جلہو تیئٹ کمزور کننگ مفک۔ ڈاکٹر نسیم پارے کہ لارڈ ماونٹ بیٹن نا منصوبہ اسہ ہندنو خنجر ئسے ہرا اینو ہم برصغیر نا سینہ ٹی خلوک ءِ۔ و داڑان چرجوئی ئٹ دتر وہنگ ئٹی ءِ۔ ہرا وخت اسکان دا تاریخی جبر ق غلطی ئے تسلیم کنگپک، ساڑی آ حالیت آتا تجزیہ و توننگ منکن افک۔ پاکستان اسہ غیر فطری او ریاست ئسے، ہرا متکن آ قوم آتا ڈغار آتے آ نفرت بش کروک نظریہ و سامراجی منصوبہ نا رد ئٹ جوڑ کننگانے۔ اسہ ریاست ئس، ریاست نا تیبہ مڈیک ایٹمی سلاہ تیتو اوار اسہ شدت پسند او فوج ئسے نا دو ٹی ءُ۔ ہرا بیرہ بھارت نہ بلکن تیبہ خطہ و جہانی امن کن چرجوئی ئٹ جیڑہ جوڑ مننگ کیرہ۔ او پارے کہ پہلگام ئٹی پاکستانی ریاست نا کمک ئٹ مروگ دہشت گردی نا جلہو، ہراٹی بے گناہ آ بندغ آتا کوش مسک، دا پالیسی نا چرجوئی ءِ ہراٹی دہشت گردی پاکستان تہہ نا و ڈنی حکمت عملی نا بنجائی تھمبہ ءِ۔ دا ریاست دہشت گردی نا منظم نرسری ءِ و دا دہشت گردی ئے ریاستی سطح آ مالی نظریاتی و جنگی سرپرستی دوئی ءِ۔ ہندا کچ اسکان کہ ہراتم جہانی دہشت گرد مسعود اظہر نا خڑک ئنا سنگت آتا کوش ئنا وڑ انگا تدینیک ہم مونا بریرہ، واہم پاکستان نا فوج ئنا بھلاک دے ئنا روشنی ٹی اوفتا جنازہ تیٹی اوار مرسہ دا پڑو ئے کریر کہ ریاستی دہشت گردی نا دا سفر سلوف۔ بی این ایم نا چیئرمین پارے کہ خطہ ٹی دہشت گردی نا ایسری، امن و استحکام، و پائیدار دیمروی نا کسر ہمو وخت اسکان مننگ نا قابل مفک ہراتم اسکان 14 اگست 1947 نا تاریخی سیاسی غلطی تے مننگپک، غیر فطری ریاست نا ساختیاتی تضاد آتا سوھوی ئٹ تجزیہ کرسہ خطہ ٹی کوزہ مروک قوم، بلوچستان نا تاریخی حیثیت، قومی چائند و آزاتی نا جنز ئے پڑو کرسہ مننگپک۔ داسہ ہمو اسٹ انگا کسر ءِ کہ دا خطہ ئے مدامی نا جنگ، دہشت گردی و استحکام نا وے مننگ آن کشِسہ اسہ پر امن ، سوگو و دیمروی کروک مستقبل ئسے اسکان دننگ کیک۔ *« سوشل میڈیا لنکس : ایکس |فیس بک | ٹیلی گرام | واٹساپ چینل »* https://x.com/BNMbrahui/status/1923455626228768951 https://www.facebook.com/share/p/1AvEY4fXWK/ https://t.me/bnmovement/6586 https://whatsapp.com/channel/0029VaAyYMy8vd1Ga4AgZ32V