🌍📡 ព័ត៌មានជាតិ និង អន្តរជាតិ សំខាន់ៗ ប្រចាំថ្ងៃទី ២៧ ខែមករា ឆ្នាំ ២០២៥៖ 🇰🇭😷 ទីភ្នាក់ងារព័ត៌មានវិទ្យា និងអវកាសថៃ ឈ្មោះ GISTDA បានឲ្យដឹងនៅថ្ងៃទី២៧ មករានេះថា ប្រទេសកម្ពុជាមានចំណុចឆេះ ឬទីតាំងក្តៅច្រើនជាងគេបង្អស់នៅក្នុងតំបន់អាស៊ីអាគ្នេយ៍ ពោលមានជាង ២០០០ទីតាំង។ ចំណុចឆេះ ឬទីតាំងក្តៅទាំងជាង ២០០០ទីតាំងនេះត្រូវបាន GISTDA បញ្ជាក់ថា គឺជាប្រភពដែលអាចបង្កឱ្យមានភ្លើងឆេះព្រៃបញ្ចេញផ្សែងពុលនៅក្នុងបរិយាកាស ខណៈប្រទេសថៃដែលកំពុងរងវិបត្តិខ្យល់ពុលរកឃើញមានត្រឹមតែ ១០០០ទីតាំងប៉ុណ្ណោះ។ https://rfi.my/BMDr 🇰🇭🫵🏻 លោក ហ៊ុន ម៉ាណែត នាយករដ្ឋមន្ដ្រីកម្ពុជាបានប្រកាសក្នុងថ្ងៃបិទសន្និបាតគណបក្សប្រជាជនកម្ពុជានាថ្ងៃទី២៦ ខែមករា ឆ្នាំ២០២៥ ថា រដ្ឋាភិបាលកំពុងរៀបចំផែនការបង្កើតគណៈកម្មាធិការអន្ដរក្រសួងដើម្បីដោះស្រាយបញ្ហាបោកប្រាស់ និងការក្លែងបន្លំតាមប្រព័ន្ធអ៊ីនធ័រនែត។ ការបង្កើតគណៈកម្មាធិការមួយនេះ ធ្វើឡើង បន្ទាប់ពីកម្ពុជាត្រូវបានគេចង្អុលថា មានករណីឆបោកតាមអនឡាញញឹកញាប់ និងករណីជួញដូរមនុស្ស។ https://rfi.my/BMFQ 🇮🇱🕯️ ថ្ងៃទី​២៧​មករានេះ គឺ​ជា​ថ្ងៃខួប​គម្រប់​៨០ឆ្នាំ​ នៃការរំដោះមន្ទីរឃុំឃាំង​ Auschwitz ស្ថិតនៅភាគខាងត្បូងប្រទេសប៉ូឡូញ។ មន្ទីរឃុំឃាំង​អូឈ្វីតស៍ គឺ​ជានិមិត្តរូប​នៃអំពើប្រល័យពូជសាសន៍​ ដែល​របប​ហ៊ីត្លែរណាហ្ស៊ី បានធ្វើទៅលើជនជាតិជ្វីហ្វ កាលពីក្នុងអំឡុងសង្គ្រាមលោក​លើកទី​២​​។ គឺនៅថ្ងៃនេះកាលពីឆ្នាំ​១៩៤៥ ដែល​ពិភពលោក​បានដឹងបានឮយ៉ាងច្បាស់ប្រាកដ នូវទំហំនៃអំពើដ៏​សែន​ឃោរឃៅព្រៃផ្សៃ ស្តីពី​ប្រព័ន្ធរៀបចំក្នុងការសម្លាប់រង្គាល​ជនជាតិ​ជ្វីហ្វ របស់ពួកហ៊ីត្លែរ​ណាហ្ស៊ី។ យ៉ាងហោចណាស់ ជនជាតិ​ជ្វីហ្វ​សរុប​​ប្រមាណ​​៦លាននាក់ ត្រូវបាន​របបដ៏ឃោរឃៅរនេះសម្លាប់​ ដែលក្នុងនេះមាន​​១លាននាក់ គឺស្លាប់​ក្នុងមន្ទីរឃុំឃាំងAuschwitz​​។ https://rfi.my/BMHG 🇰🇷✈️ ស្រប​តាមការ​ទាមទារ​របស់​អង្គការ​អាកាសចរណ៍​ស៊ីវិល​អន្តរជាតិ អាជ្ញាធរ​​កូរ៉េខាង​ត្បូង បាន​ចេញ​របាយការណ៍ ​​នៅ​ថ្ងៃ​ចន្ទ​ទី ២៧​មករា​២០២៥ ទាក់ទង​នឹង​គ្រោះ​ថ្នាក់​ធ្លាក់​យន្តហោះរបស់​ក្រុម​ហ៊ុន​​Jeju Air កាលពី​ថ្ងៃទី​២៩​ធ្នូ​២០២៤។ នៅក្នុង​សេចក្តី​សន្និដ្ឋាន​បឋម​ អ្នក​អង្កេត​បាន​​បញ្ជាក់​អំពី​វត្តមាន​នៃ​រោម​សត្វបក្សី និងស្នាម​ឈាម​ ​នៅក្នុង​​ម៉ាស៊ីនទាំងពីរ​របស់​យន្តហោះ​។ https://rfi.my/BMFw