🌍📡 ព័ត៌មានជាតិ និង អន្តរជាតិ សំខាន់ៗ ប្រចាំថ្ងៃទី ៣០ ខែមករា ឆ្នាំ ២០២៥៖ 🇰🇭🔥 នៅថ្ងៃទី៣០ ខែមករា ឆ្នាំ២០២៥នេះ នាយកដ្ឋាននគរបាលព្រហ្មទណ្ឌនៃស្នងការដ្ឋាននគរបាលជាតិរបស់ក្រសួងមហាផ្ទៃបានឱ្យដឹងថា សមត្ថកិច្ចបានចាប់ខ្លួនជនជាតិចិន ២នាក់ ក្រោមបទចោទ បង្ខាំងមនុស្សដើម្បីជំរិតទារប្រាក់។ បើតាមការស៊ើបអង្កេតរបស់សមត្ថកិច្ច ជនសង្ស័យដែលជាជនជាតិចិនទាំង ២នាក់នេះបានញាត់មនុស្សស្រីចូលក្នុងវ៉ាលី និងយកទៅបង្ខាំងទុកក្នុងផ្ទះសំណាក់ដើម្បីជំរិតទារប្រាក់។ https://rfi.my/BMpB 🇰🇭⚖️ ប្រមុខរដ្ឋាភិបាលកម្ពុជា លោក ហ៊ុន ម៉ាណែតបានបញ្ជាក់ក្នុងសារពិសេសមួយកាលពីថ្ងៃទី២៨ មករាថា រដ្ឋាភិបាលត្រៀមអនុវត្តកម្មវិធី «ផ្តល់ដី ការពារព្រៃ» ជូនពលរដ្ឋក្រីក្រដែលគ្មានដីធ្វើផ្ទះចាប់ពីខែកុម្ភៈទៅ។ តាមអ្នកតាមដានសង្គម យន្តការរបស់រដ្ឋពេលនេះជាយន្តការល្អប្រសើរដើម្បីជួយទប់ស្កាត់ការទន្រ្ទានដីព្រៃដោយខុសច្បាប់ និងជួយដោះស្រាយជីវភាពពលរដ្ឋក្រីក្រដែលគ្មានដីពិតប្រាកដ។ តែតាមអ្នកតាមដានសង្គមមិនភ្លេចបញ្ជាក់ថា ដើម្បីឲ្យការអនុវត្តយន្តការមួយនេះសម្រេចបានជោគជ័យ និងមានតម្លាភាព រដ្ឋាភិបាលត្រូវមានគោលការណ៍ និងការធានាច្បាស់លាស់។ https://rfi.my/BMp2 🇺🇸✈️🔥 នៅដើមឆ្នាំ​២០២៥ អាកាសចរណ៍​ស៊ីវិល​នៅក្នុង​ពិភពលោក​ជួបដំណឹង​អាក្រក់​សឹងតែរាល់ថ្ងៃ។ បន្ទាប់ពី​យន្តហោះឆេះ ធ្វើឲ្យរបួសអ្នកដំណើរ​នៅ​កូរ៉េខាងត្បូង នៅ​សហរដ្ឋអាមេរិក និយាយ​ឲ្យចំ នៅ​រដ្ឋធានី​វ៉ាស៊ីនតោន កាលពីយប់​ថ្ងៃ​ពុធម្សិលមិញ ឧទ្ធម្ភាគចក្រ​យោធាមួយគ្រឿងបាន​បោះបុក​យន្តហោះ​អ្នកដំណើរ​មួយគ្រឿង​ដែលមាន​ដឹកមនុស្ស​៦៤នាក់។ យន្តហោះទាំងពីរ​បាន​ធ្លាក់ទៅ​ក្នុង​ទឹកទន្លេ​ក្បែរ​អាកាសយានដ្ឋាន​ក្នុងរដ្ឋធានី​វ៉ាស៊ីនតោន។ ខណៈពេល​ដែលអាជ្ញាធរ​បដិសេធ​មិនទាន់ផ្តល់ព័ត៌មាន​ពីជនរងគ្រោះ ទូរទស្សន៍អាមេរិក បាន​ចុះផ្សាយ​ថា នៅក្នុង​ប្រតិបត្តិការ​ស្វែងរក​ជនរងគ្រោះ គេ​ស្រង់បាន​សាកសព​ជិត​២០នាក់។ https://rfi.my/BMpK 🇷🇺🇺🇦🔥 លោក វ៉្លាឌីមៀរ ពូទីន បានថ្លែងថា រុស្ស៊ីកំពុងត្រៀមខ្លួនរួចជាស្រេច ដើម្បីជួបចរចាបិទបញ្ចប់ សង្គ្រាមនៅអ៊ុយក្រែន។ តែទន្ទឹមគ្នានេះ លោក ពូទីន បានបដិសេធ មិនជួបចរចាដោយផ្ទាល់ ជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេរឡេនស្គី។ មេដឹកនាំរុស្ស៊ី បន្ថែមទៀតថា ភាគីអ៊ុយក្រែន ពុំបង្ហាញឆន្ទៈ ជួបភិភាក្សាដើម្បីខណ្ឌចប់សង្គ្រាមដ៏រ៉ាំរ៉ៃនេះឡើយ។ https://rfi.my/BMod