ڪراچي (12 فيبروري): سنڌ جي وڏي وزير سيد مراد علي شاهه سان وفاقي گهرو وزير محسن نقوي وزيراعليٰ هائوس ۾ ملاقات ڪئي ۽ گڏيل دلچسپي جي مختلف معاملن تي خاص طور تي صوبي ۾ ڪرڪيٽ جي فروغ تي خيالن جي ڏي وٺ ڪئي. اجلاس ۾ حيدرآباد جي نياز اسٽيڊيم کي عالمي معيارن تي اپ گريڊ ڪرڻ تي خاص بحث ڪيو ويو ته جيئن بين الاقوامي ڪرڪيٽ ميچن جي ميزباني ڪري سگهجي. ٻنهي اڳواڻن اسٽيڊيم کي جديد سهولتن سان ليس ڪرڻ لاءِ ضروري قدم کڻڻ تي اتفاق ڪيو. وڏي وزير چيو ته حيدرآباد جي نياز اسٽيڊيم جي بحالي ۽ ترقي سنڌ ۾ ڪرڪيٽ جي واڌاري لاءِ ضروري آهي. هن وڌيڪ زور ڏنو ته راندين جي بنيادي اسٽرڪچر ۾ سيڙپڪاري نوجوانن جي وڌيڪ شموليت فراهم ڪندي ۽ پاڪستان جي ڪرڪيٽ ٽيلينٽ پول ۾ سنڌ جي ڪردار کي وڌيڪ مضبوط ڪندي. وڏي وزير مراد علي شاهه راندين جي ترقي جي اهميت تي زور ڏيندي چيو ته سنڌ جي ٻهراڙي وارن علائقن سميت صوبي جي باصلاحيت نوجوان ڪرڪيٽرن کي اڳتي وڌڻ جو موقعو ڏنو وڃي. هن زور ڏنو ته صوبي ۾ ڪرڪيٽ جي مستقبل لاءِ اڀرندڙ صلاحيتن جي ڳولا ۽ پرورش انتهائي اهم آهي. پاڪستان ڪرڪيٽ بورڊ جي چيئرمين محسن نقوي يقين ڏياريو ته سنڌ مان نوجوان رانديگرن کي ڳولڻ ۽ انهن جي مدد لاءِ هڪ باضابطه ٽيلنٽ هنٽ پروگرام شروع ڪيو ويندو. هن شروعات جو مقصد باصلاحيت ڪرڪيٽرن کي منظم تربيت ۽ مناسب موقعا فراهم ڪرڻ آهي. اجلاس ۾ سنڌ ۾ راندين جي سهولتن کي بهتر بڻائڻ ۽ نوجوان رانديگرن کي وڏن مقابلن جي تياري لاءِ ضروري وسيلا فراهم ڪرڻ جي حڪومت جي عزم تي زور ڏنو ويو. عبدالرشيد چنا ميڊيا ڪنسلٽنٽ، وزيراعليٰ سنڌ