پشاور: وزیراعلیٰ خیبر پختونخوا کے معاون خصوصی برائے جیل خانہ جات، ہمایون خان نے یونیورسٹی آف ایگریکلچر پشاور میں منعقدہ میٹرکس پاکستان یوتھ سمٹ چھٹے ایڈیشن میں بطور مہمان خصوصی شرکت کی اور نوجوانوں کی صلاحیتوں، ٹیکنالوجی، اور جدید ترقی میں ان کے کردار پر روشنی ڈالی۔ اپنے خطاب میں ہمایون خان نے کہا کہ خیبر پختونخوا حکومت نوجوانوں کی ترقی اور حوصلہ افزائی کے لیے ہر ممکن اقدامات کر رہی ہے، کیونکہ یہی نوجوان ہمارے ملک کا مستقبل ہیں۔ ٹیکنالوجی، ای کامرس اور مصنوعی ذہانت جیسے جدید شعبوں میں مہارت حاصل کرنا وقت کی اہم ضرورت ہے تاکہ ہم عالمی معیار پر مسابقت کر سکیں۔ انہوں نے اس بات پر زور دیا کہ آج کے نوجوانوں کو جدید مہارتوں سے آراستہ کرنا اور انہیں قومی و بین الاقوامی سطح پر مسابقت کے لیے تیار کرنا حکومت کی اولین ترجیحات میں شامل ہے۔ یونیورسٹی آف ایگریکلچر پشاور میں یوتھ سمٹ کے انعقاد کو سراہتے ہوئے، ہمایون خان نے کہا کہ زرعی معیشت پاکستان کی ریڑھ کی ہڈی ہے، اور ہمیں جدید تحقیق، اسمارٹ فارمنگ اور ٹیکنالوجی کے ذریعے اس شعبے کو مزید ترقی دینے کی ضرورت ہے۔ نوجوان سائنسدانوں، محققین اور کاروباری افراد کے لیے حکومت بھرپور معاونت فراہم کر رہی ہے تاکہ وہ جدید زرعی تکنیکوں میں مہارت حاصل کر سکیں اور ملک کی زرعی پیداوار میں اضافے کے لیے اپنا کردار ادا کریں۔ میٹرکس پاکستان یوتھ سمٹ کے دوران، ہمایون خان نے صوبے کے 18 نمایاں نوجوانوں کو "پرائیڈ آف خیبر پختونخوا ایوارڈ" سے نوازا، جو ان کی نمایاں کارکردگی اور خدمات کے اعتراف میں دیا گیا۔ انہوں نے ایوارڈ یافتگان کو مبارکباد دیتے ہوئے کہا کہ یہ نوجوان ہمارے صوبے کا فخر ہیں، اور ان کی کامیابیاں دیگر نوجوانوں کے لیے مشعلِ راہ ہیں۔ انہوں نے اس موقع پر نوجوانوں پر زور دیا کہ وہ اپنی صلاحیتوں کو نکھاریں، جدید علوم میں مہارت حاصل کریں اور ملک کی ترقی میں اپنا فعال کردار ادا کریں۔ میٹرکس پاکستان یوتھ سمٹ کا یہ چھٹا ایڈیشن تین روزہ تقریبات پر مشتمل ہے، جس میں مختلف موضوعات پر سیشنز، ورکشاپس، نمائشیں اور نیٹ ورکنگ مواقع فراہم کیے جا رہے ہیں۔ اس سمٹ میں ہزاروں نوجوان، ماہرین، سرکاری و نجی اداروں کے نمائندے اور تعلیمی شعبے کے افراد شرکت کر رہے ہیں۔ اس ایونٹ کا مقصد نوجوانوں کو جدید ٹیکنالوجی سے روشناس کرانا، انہیں کاروبار اور فری لانسنگ جیسے مواقع سے آگاہ کرنا اور صوبے کی ترقی میں ان کے کردار کو اجاگر کرنا ہے۔ میٹرکس پاکستان یوتھ سمٹ نہ صرف خیبر پختونخوا بلکہ پورے ملک کے نوجوانوں کے لیے ایک شاندار پلیٹ فارم ثابت ہو رہا ہے، جہاں انہیں اپنے خوابوں کی تکمیل کے لیے رہنمائی، مواقع اور جدید مہارتیں حاصل کرنے کا موقع مل رہا ہے۔ حکومت کی سرپرستی میں منعقد ہونے والا یہ سمٹ، نوجوانوں کی فلاح و بہبود اور ترقی کے عزم کا عکاس ہے۔