*یار غار کا ایمان افروز واقعہ!!* 🥹 ہجرت مدینۂ منوَّرہ کے موقع پر سرکارِ نامدار، مکّے مدینے کے تاجدار صلَّی اللّٰه تعالٰی علیہ واٰلہٖ وسلَّم کے رازدار وجاں نِثار، یارِ غار و یارِ مزار حضرتِ سیِّدُنا صِدِّیقِ اَکبر رضی اللّٰه تعالٰی عنہ نے جاں نِثاری کی جو اعلیٰ مثال قائم فرمائی وہ بھی اپنی جگہ بے مثال ہے، تھوڑے بَہُت الفاظ کے فرق کے ساتھ مختلف کتابوں میں اِس مضمون کی روایات ملتی ہیں کہ جب سب کے حبیب، حبیب ِ لبیب، بے چین دلوں کے طبیب صلَّی اللّٰه تعالٰی علیہ واٰلہٖ وسلَّم غارِ ثَور کے قریب پہنچے تو پہلے حضرتِ سیِّدُنا صِدِّیقِ اکبر رضی اللّٰه تعالٰی عنہ غار میں داخِل ہوئے، صفائی کی، تمام سوراخوں کو بند کیا، آخِری دو سوراخ بند کرنے کے لئے کوئی چیز نہ ملی، تو آپ رضی اللّٰه تعالٰی عنہ نے اپنے پاؤں مبارَک سے ان دونوں کو بند کیا، پھر رسولِ کریم، رؤفٌ رَّحیم عَلَیْہِ اَفْضَلُ الصَّلٰوۃِ وَالتَّسْلِیْم سے تشریف آوَری کی درخواست کی: رسولُ اللّٰه صلَّی اللّٰه تعالٰی علیہ واٰلہٖ وسلَّم اندر تشریف لے گئے اور اپنے وفادار، یارِغار و یارِ مزار صِدِّیقِ اَکبر رضی اللّٰه تعالٰی عنہ کے زانو پر سرِ انور رکھ کر مَحوِ اِستِراحت ہوگئے (یعنی سو گئے)۔ اُس غارمیں ایک سانپ تھا اُس نے پاؤں میں ڈس لیا مگر قربان جائیے اُس پیکرِ عشق ومَحَبَّت پر کہ دَرد کی شدَّت و کُلفت (یعنی تکلیف) کے باوُجود محض اِس خیال سے کہ مصطَفٰے جانِ رَحمت صلَّی اللّٰه تعالٰی علیہ واٰلہٖ وسلَّم کے آرام و راحت میں خلَل واقِع نہ ہو، بدستور ساکِن وصامِت (یعنی بے حرکت وخاموش) رہے، مگر شدتِ تکلیف کی وجہ سے غیر اختیاری طور پرچشمانِ مُبارَک (یعنی آنکھوں) سے آنسو بہ نکلے اور جب اَشکِ عِشق کے چند قطرے محبوب کریم عَلَیْہِ اَفْضَلُ الصَّلٰوۃِ وَالتَّسْلِیْم کے وَجہ ِکریم (یعنی کرم والے چِہرے ) پر نچھاور ہوئے توشاہِ عالی وقار، ہم بے کسوں کے غم گُسارصلَّی اللّٰه تعالٰی علیہ واٰلہٖ وسلَّم بیدار ہو گئے، اِستِفسار فرمایا: اے ابوبکر (رضی اللّٰه تعالٰی عنہ)! کیوں روتے ہو؟ حضرتِ سیِّدُنا ابوبکر صِدِّیق رضی اللّٰه تعالٰی عنہ نے سانپ کے ڈَسنے کا واقِعہ عرض کیا۔ آپ صلَّی اللّٰه تعالٰی علیہ واٰلہٖ وسلَّم نے ڈسے ہوئے حصّے پر اپنا لُعابِ دَہَن (یعنی تھوک شریف ) لگایا تو فوراً آرام مل گیا۔ ( مِشْکاۃُ الْمَصابِیح ج۴ ص۴۱۷ حدیث ۶۰۳۴ وغیرہ) *[مزید ایسی تحریروں کے لیے ہمارا گروپ جوائن کریں]* https://chat.whatsapp.com/FQZYZAutsQdCbs6mSYNNnN