*اپوزیشن جماعتوں کاملکی صورتحال پر کل جماعتی کانفرنس بلانے پر اتفاق* *اپوزیشن رہنماؤں کا موجودہ صورتحال میں حکومت کو ٹف ٹائم دینے کا فیصلہ* *اپوزیشن جماعتوں کا گرینڈ اتحاد تشکیل ، اسٹیرنگ کمیٹی کی سربراہی شاہد خاقان کے سپرد* *اپوزیشن جماعتوں کا ملک کو بحرانی کیفیت سے نکالنے پر اتفاق ، یہ وقت سیاست کا نہیں ملکی سالمیت کا ہے ، اعلامیہ* اسلام آباد: اپوزیشن جماعتوں نے ملکی حالات اور بحرانی کیفیت سے پاکستان کو نکالنے پر اتفاق کرلیا۔ ذرائع کے مطابق تحریک تحفظ آئین پاکستان کے سربراہ محمود خان اچکزئی نے اپوزیشن رہنماؤں کے اعزاز میں عشائیہ دیا۔ جس میں مولانا فضل الرحمان ، اسد قیصر ، قائد حزب اختلاف قومی اسمبلی عمر ایوب خان ، شاہد خاقان عباسی ، علامہ ناصر عباس ، صاحبزادہ حامد رضا ، اسد قیصر ، شبلی فراز ، سردار لطیف کھوسہ ، مصطفی نواز کھوکھر ، جنید اکبر ، عاطف خان ، شہرام تراکئی ، سردار شفیق ترین ، اسلم غوری ، اخونزادہ حسین اور دیگر رہنما شریک ہوئے۔ عشائیے میں ملک کی سیاسی صورتحال اور اپوزیشن کے گرینڈ اتحاد پر تفصیلی گفتگو ہوئی۔ اپوزیشن رہنماؤں نے اس پر اتفاق کیا کہ ملکی حالات اور بحرانی کیفیت اس بات کے تقاضا کرتے ہیں کے تمام جمہوریت پسند قوتیں ایک پلیٹ فارم پر اکھٹی ہو کر ملک اور قوم کو بحران سے نکالیں۔ اپوزیشن رہنماؤں نے مستقبل میں باہمی روابط بڑھانے اور ملک کو درپیش چیلینجز سے نمٹنے کے لیے آل پارٹیز کانفرنس کا انعقاد اور ایک نیشنل ایجنڈا ڈرافٹ کرنے کے لیے ایک سٹیرنگ کمیٹی کے قیام پر بھی اتفاق کیا۔