دوستو ! خاص طور پر وہ لوگ جو میری پوسٹس کے نیچے غیر ضروری مارکیٹنگ کرتے ہیں، آپ نے شاید کئی بار مختلف طریقوں سے پیسے کمانے کی کوشش کی ہوگی، جیسے نیٹ ورک مارکیٹنگ، بغیر کچھ کیے پیسے کمانے کے فارمولے یا روزانہ 1500 روپے کمائی کے دعوے۔ اگر آپ یہاں اس طرح کے کمنٹس یا لنکس پوسٹ کریں گے، تو میں نہ صرف انہیں ہٹاؤں گا بلکہ آپ کو بلاک بھی کر دوں گا۔ یہ اس لیے ضروری ہے کیونکہ اس طرح کے دعوے نہ صرف دوسروں کا وقت ضائع کرتے ہیں بلکہ انہیں غلط راستے پر بھی لے جاتے ہیں۔ اگر آپ محنت کرکے کچھ سیکھیں تو یہ زیادہ فائدہ مند ہوگا، بجائے اس کے کہ کسی شارٹ کٹ کے چکر میں پڑ کر خود بھی خوار ہوں اور دوسروں کو بھی دھوکہ دیں۔ یہ پیج یا UrduAi پیسے کمانے کے طریقے سکھانے کے لیے نہیں بنایا گیا۔ ہم صرف ان لوگوں کی مدد کرنا چاہتے ہیں جو مصنوعی ذہانت (AI) کے بارے میں جاننا چاہتے ہیں اور اس فیلڈ میں کچھ نیا سیکھنے کے خواہشمند ہیں۔ میری ہمیشہ یہی کوشش رہی ہے کہ چیزوں کو سادہ اور حقیقی رکھا جائے، اور اگر کوئی بھی ایسا طریقہ جو میں خود پسند نہ کروں، تو وہ میں دوسروں کے لیے بھی پروموٹ نہیں کروں گا۔ یہاں کئی بار اسپانسرڈ پوسٹس کے لیے مجھ سے رابطہ کیا گیا، لیکن میں نے انکار کیا کیونکہ میں ایسی چیزوں میں یقین نہیں رکھتا۔ اگر میں خود کسی چیز پر اعتماد نہیں کرتا تو اسے دوسروں کے لیے بھی مناسب نہیں سمجھتا۔ یہی وجہ ہے کہ میں کوشش کرتا ہوں کہ جو بھی لوگ یہاں موجود ہیں، ان کا اعتماد اور بھروسہ قائم رہے۔ میں نہ تو کچھ بیچ رہا ہوں اور نہ ہی ایسی کوئی چیز پروموٹ کر رہا ہوں جس پر میرا یقین نہ ہو۔ مجھے خوشی ہوتی ہے جب لوگ اپنا فیڈ بیک دیتے ہیں اور میں حتیٰ الامکان ہر کمنٹ کا جواب دینے کی کوشش کرتا ہوں۔ آپ سب کی رائے میرے لیے اہم ہے، کیونکہ یہی ایک کمیونٹی کو مضبوط اور بامقصد بناتی ہے۔ مجھے امید ہے کہ آپ میری بات کو سمجھیں گے اور غیر ضروری چیزوں سے گریز کریں گے۔ شکریہ، آپ کا دوست قیصر رونجھا