الأيام اللي فاتت في زيادة ملحوظة في حالات العدوي بفيروس البارڤو ب ١٩ Parvovirus B19 المسبب للمرض الخامس Fifth disease أو الحمامي المعدي Erythema infectiosum أو متلازمة الخد المصفوع Slapped cheek syndrome. شفت حالات بنفسي وفي كمان حالات اتعرضت عليا online من مصر وليبيا وتونس. العدوي بفيروس البارڤو ب ١٩ في حوالي ٣٠٪ بتكون بدون أي أعراض أو أعراض دور برد خفيف وبتروح في كام يوم وخلاص. فترة الحضانة incubation period بتكون من ٧ ل ١٠ أيام. الأعراض بتكون ارتفاع طفيف بدرجة الحرارة مع رشح بالأنف وصداع وممكن بيحصل ألم بالمفاصل. بعد كده بيحصل الطفح الجلدي المميز خالص إللي بيكون عبارة عن احمرار في الخدين بالضبط زي ما يكون حد ضرب الطفل بالقلم من الناحيتين علشان كده بتسمي متلازمة الخد المصفوع. الطفح الجلدي إللي علي الخد غالباً بيسبب إحساس بالحرقان Burning sensation وبيزيد بعد أخد حمام دافي. في خلال يومين لأربع أيام ممكن يظهر طفح جلدي علي الجذع والأطراف بيكون شبكي أو شريطي الشكل reticular or lacy. فترة العدوي بتكون قبل ما يظهر الطفح الجلدي علي الخدين يعني بمجرد ما يظهر الطفح الجلدي الطفل مبيكونش مصدر عدوي للآخرين. الطفح الجلدي غالباً بيختفي في خلال أسبوع لكن في حالات ممكن يفضل موجود ل ٦ أسابيع. التشخيص بيكون بالصورة السريرية Clinical picture وممكن نعمل Viral PCR. الغالبية العظمى من حالات العدوي بفيروس البارڤو ب ١٩ بتكون بسيطة جداً ومش بيعمل أي مضاعفات. حالات نادرة ممكن يعمل نوبات تثبيط في نخاع العظام Aplastic crisis وخصوصاً في الأطفال إللي عندهم أنيميا الخلايا المنجلية Sickle cell anemia أو الأطفال إللي عندهم G6PD أو الأطفال إللي عندهم نقص بالمناعة أو أمراض المناعة الذاتية Autoimmune diseases. كمان في حالات نادرة ممكن لو الست الحامل أصيبت بالعدوي يحصل إجهاض للجنين Abortion نتيجة لتأثير الفيروس علي كرات الدم الحمراء وحدوث تكسير فيما يعرف بال Erythroblastosis fetalis. العلاج بيكون في الغالبية العظمى علاج عادي جداً كأنه دور برد عادي. ممكن نستعمل كريم مرطب أو Soothing agent علشان الحرقان في الخدين. الحالات اللي عندهم Autoimmune disease أو حصل عندهم Aplastic crisis ممكن ياخدوا Steroids and IVIG ودي حالات نادرة جداً. علشان كده لو قابلت اليومين دول أي حالة ظهر عندها طفح جلدي في الخدين مؤخراً لازم تفكر في متلازمة الخد المصفوع أو العدوي بفيروس البارڤو ب ١٩ وبقوة... د /وليد علي إبراهيم المرواني. عضو الكلية الملكية البريطانية لطب الأطفال.