بینظیر انکم سپورٹ پروگرام کی چیئرپرسن سینیٹر روبینہ خالد اور سیکرٹری عامر علی احمد نے امجد ظفر خان کی قیادت میں ورلڈ بینک کے وفد سے ملاقات کی۔ وفد 17 فروری سے 25 فروری تک بی آئی ایس پی کے دورے پر ہے تاکہ کرائسز ریسیلینٹ سوشل پروٹیکشن (سی آر آئی ایس پی) فریم ورک، پروگرام ایکشن پلان اور بی آئی ایس پی اور ورلڈ بینک کے درمیان معاہدوں پر پیش رفت کو آگے بڑھایا جا سکے۔ ملاقات کے دوران اہم امور پر تبادلہ خیال کیا گیا جن میں مستحق خواتین کو رقوم کی براہ راست ادائیگی کے لیے بینک اکاؤنٹس کھولنے، ہائبرڈ سوشل پروٹیکشن سکیم، مالی خواندگی، بے نظیر ہنرمند پروگرام کے تحت مستحق افراد کے لیے ہنر کی تربیت اور شمار کنندگان کی تربیت اور نگرانی شامل ہیں۔ امجد ظفر خان (سینئر سوشل پروٹیکشن سپیشلسٹ/ٹاسک ٹیم لیڈر) محترمہ میلس یو گوون (لیڈ اکانومسٹ/کو-ٹاسک ٹیم لیڈر) اور زینب مجوکا (اکنامسٹ) کے ہمراہ تھیں جنہوں نے چیئرپرسن اور سیکرٹری بی آئی ایس پی کو مشن کے مقاصد کے بارے میں بریفنگ دی اور توقع کے مطابق مکمل تعاون فراہم کیا۔