🌍📡 ព័ត៌មានជាតិ និង អន្តរជាតិ សំខាន់ៗ ប្រចាំថ្ងៃទី ២១ ខែកុម្ភៈ ឆ្នាំ ២០២៥៖ 🇰🇭⚖️ ឧត្តមក្រុមប្រឹក្សានៃអង្គចៅក្រមបានដាក់ទណ្ឌកម្មលើប្រធានសាលាដំបូងខេត្តតាកែវ លោកស្រី ពេជ ម៉ារ៉ែន ដែលបានសម្រេចដោះលែងទណ្ឌិតដែលមានទោសឧក្រិដ្ឋ។ ក្នុងសេចក្តីប្រកាសព័ត៌មានរបស់ឧត្តមក្រុមប្រឹក្សានៃអង្គចៅក្រមចុះថ្ងៃទី២០ ខែកុម្ភៈ ដោយសារប្រព្រឹត្តកំហុសវិជ្ជាជីវៈចៅក្រម និងបំពានលើក្រមនីតិវិធីព្រហ្មទណ្ឌ លោកស្រី ពេជ ម៉ារ៉ែន ត្រូវបានក្រមប្រឹក្សាវិន័យទម្លាក់តំណែងពីប្រធានសាលាដំបូងខេត្តតាកែវ មកជាអនុប្រធាននៅសាលាដំបូងខេត្តផ្សេងវិញ។ https://rfi.my/BQpB 🇰🇭🌳🪓 ក្រោយពីមានការបង្កកជំនួយរបស់សហរដ្ឋអាមេរិកតាមរយៈទីភ្នាក់ងារផ្តល់ជំនួយអន្តរជាតិ USAID សហគមន៍ការពារព្រៃឡង់បានបង្ហាញក្តីព្រួយបារម្ភថា សកម្មភាពទន្រ្ទានដីព្រៃ ការកាប់បំផ្លាញព្រៃឈើ និងបរបាញ់សត្វព្រៃនឹងអាចកើនឡើង។ ចំពោះសហគមន៍ការពារព្រៃឈើ ជំនួយរបស់ USAID បានជួយជ្រោមជ្រែងអ្នកការពារជួរមុខក្នុងតំបន់ការពារធម្មជាតិ និងការអភិរក្សសត្វព្រៃ។ ដូច្នេះពួកគេសង្ឃឹមថា រដ្ឋាភិបាលអាមេរិកនឹងពិចារណាឡើងវិញចំពោះការបន្តជំនួយ USAID ដែលបានរួមចំណែកយ៉ាងធំធេងសម្រាប់សកម្មភាពការពារព្រៃឈើ។ https://rfi.my/BQr4 🇮🇱🇵🇸💥 នាយករដ្ឋមន្ត្រីអ៊ីស្រាអែល បេនចាមិន នេតាន់យ៉ាហ៊ូ បាន​សម្តែង​ប្រតិកម្ម​ខឹង​សម្បាជាខ្លាំង និង​ចោទប្រកាន់​ក្រុម​ប្រដាប់​អាវុធ​ហាម៉ាស ថារំលោភបំពានបទឈប់បាញ់ ហើយលោក​អះអាង​​ថា ពួក​ហាម៉ាស​នឹងត្រូវ​ខាត​បង់ធ្ងន់ធ្ងរ​ចំពោះ​ទង្វើចំអក​​មាក់​ងាយ​របស់​ពួក​គេ​។ ប្រតិកម្ម​ខឹង​ក្រោធរបស់​ថ្នាក់ដឹកនាំ​អ៊ីស្រាអែល​យ៉ាងដូច្នេះ ធ្វើឡើង​ក្រោយពីពួកហាម៉ាស ​បញ្ជូនសាកសពមនុស្សផ្សេងម្នាក់ ក្នុង​ចំណោមសព​ចំណាប់ខ្មាំង​ ៤ នាក់ ដែលត្រូវ​ប្រគល់​ឲ្យ​អ៊ីស្រាអែល។ https://rfi.my/BQqi 🇫🇷🇺🇸🇺🇦🇷🇺 កាលពីល្ងាចថ្ងៃព្រហស្បតិ៍​ទី​២០​កុម្ភៈ លោក​ម៉ាក្រុង ប្រធានាធិបតីបារាំង បាន​ធ្វើវីដេអូ Live នៅលើបណ្ដាញ​​សង្គម ដើម្បី​ឆ្លើយសំណួររបស់​មហាជនទាក់ទិននឹងការព្រួយ​បារម្ភទាំងឡាយ ស្តីអំពី​សំណុំរឿងអ៊ុយក្រែន ព្រមទាំង​ផលវិបាកផ្នែកសន្តិសុខមកលើអឺរ៉ុបទាំងមូល​។ លោក​ម៉ាក្រុងបានបញ្ជាក់នូវគោលជំហរថា​ ​បារាំងនឹងសហការ​ជាមួយប្រទេសអឺរ៉ុបផ្សេងទៀត ដើម្បី​បញ្ជូនកងទ័ពទៅរក្សាសន្តិភាពនៅអ៊ុយក្រែន ល្គិកណាមានកិច្ចព្រមព្រៀងសន្តិភាពមួយ​ដ៏ពេញលេញ និងយុត្តិធម៌សម្រាប់អ៊ុយក្រែន​។ បន្ថែមពីនេះដែរ លោក​ម៉ាក្រុង អះអាងថាលោកនឹងនិយាយប្រាប់​លោកដូណាល់​ ត្រាំ នៅសប្តាហ៍​ក្រោយ ​ថាត្រូវតែប្រុងប្រយ័ត្ន ​មិនត្រូវទន់ជ្រាយជាមួយ​លោក​ពូទីនជាដាច់ខាត​។ https://rfi.my/BQtg