🌍📡 ព័ត៌មានជាតិ និង អន្តរជាតិ សំខាន់ៗ ប្រចាំថ្ងៃទី ២៥ ខែកុម្ភៈ ឆ្នាំ ២០២៥៖ 🇰🇭🇫🇷🤝⚖️ នៅរសៀលថ្ងៃទី២៤ កុម្ភៈ លោក ហ្សាក់ ប៉ឺឡេ (Jacques Pellet) ឯកអគ្គរដ្ឋទូតបារាំងប្រចាំកម្ពុជាបានជួបពិភាក្សាជាមួយអគ្គស្នងការរងនគរបាលជាតិ លោក ឌី វិជ្ជា ជុំវិញរឿងឃាតកម្មលោក លិម គិមយ៉ា។ លោក ឌី វីជ្ជាបានប្រាប់ឯកអគ្គរដ្ឋទូតបារាំងថា នគរបាលកម្ពុជាមិនទាន់មានព័ត៌មានគ្រប់គ្រាន់ទេ ព្រោះថៃបានត្រឹមដាក់សំណើមក តែមិនមកធ្វើការជាមួយនគរបាលកម្ពុជា។ នេះបើតាមលោក ឆាម គឹមឃឿន អ្នកនាំពាក្យអគ្គស្នងការដ្ឋាននគរបាលជាតិដែលបានបញ្ជាក់ប្រាប់វិទ្យុបារាំងអន្តរជាតិ RFI នាថ្ងៃទី២៥ កុម្ភៈនេះ។ https://rfi.my/BRVE 🇰🇭🇺🇸🤝 មេបញ្ជាការកងទ័ពជើងគោកអាមេរិកប្រចាំឥណ្ឌូប៉ាស៊ីហ្វិក លោក រ៉ូណាល់ ខ្លាក បានមកបំពេញទស្សនកិច្ចនៅក្រុងភ្នំពេញ។ នាក្នុងឱកាសនោះ កម្ពុជា តាមរយៈមេបញ្ជាការកងទ័ពនៃកងយោពលខេមរភូមិន្ទលោក វង្ស ពិសេន បានសំណូមពរឱ្យសហរដ្ឋអាមេរិកបង្កើនកិច្ចសហប្រតិបត្តិការវិស័យកងទ័ព និងធ្វើសមយុទ្ធឆ្មាំអង្គររួមគ្នាឡើងវិញ។ សំណូមពររបស់កម្ពុជាយ៉ាងដូច្នេះធ្វើឡើងក្នុងហេតុផលពង្រឹង និងពង្រីកទំនាក់ទំនងវិស័យកងទ័ពនៃប្រទេសទាំងពីរឱ្យកាន់តែរីកចម្រើន។ https://rfi.my/BRXT 🇷🇺🇪🇺🇺🇦 ថ្ងៃចន្ទ ទី ២៤ ខែកុម្ភៈ ប្រធានាធិបតីរុស្ស៊ី លោក វ៉្លាឌីមៀរ ពូទីន បានថ្លែងថា អឺរ៉ុបមានសិទ្ធិចូលរួម ស្វែងរកដំណោះបញ្ចប់ជម្លោះនៅអ៊ុយក្រែន។ ការលើកឡើងរបស់ លោក ពូទីន ដូច្នេះ ធ្វើឡើង ចំពេលដែលសហភាពអឺរ៉ុប កំពុងព្រួយបារម្ភ ខ្លាចត្រូវគេកៀសចេញពីតុចរចា ជាពិសេសតាំងពីក្រុងម៉ូស្គូ និង វ៉ាស៊ីនតោន បានចាប់ផ្តើមធ្វើកិច្ចចរចានឹងគ្នាផ្ទាល់។ លោក ពូទីន លម្អិតថា ទន្ទឹមគ្នានឹងអឺរ៉ុប ប្រទេសផ្សេងទៀត ក៏មានសិទ្ធិ និង លទ្ធភាព ចូលរួមដូចគ្នាដែរ។ https://rfi.my/BRWu 🇯🇵🇵🇭🤝 ជប៉ុន​និង​ហ្វីលីពីន​កៀក​ស្មា​គ្នា​កាន់​តែ​ស្និទ្ធ។ ប្រទេស​ទាំងពីរ ត្រូវ​ប្រឈមតតាំង​ដូច​គ្នា​​នឹង​ចិន​ដែល​បញ្ចេញ​សកម្មភាព​កាន់​តែ​កំណាចឡើងៗ ដើម្បី​បំពេញ​មហិច្ឆតា​​​ត្រួត​ត្រា​​សមុទ្ទ​ចិន​ខាង​ត្បូង។ តំបន់​សមុទ្ទ​ចិន​ខាង​ត្បូង ជា​ផ្លូវ​ដែល​មាន​ទំនិញ​ពិភពលោក​ជិត​មួយភាគបីឆ្លង​កាត់រាល់​ថ្ងៃ។ ហេតុដូច្នេះហើយ​បាន​ជា​ជប៉ុន និង​ហ្វីលីពីន​ ចង់​ពង្រឹង​កិច្ចសហប្រតិបត្តិការ​យោធា​ទ្វេ​ឡើង​។ នេះ​បើ​តាម​សេចក្តី​ប្រកាស​របស់​រដ្ឋមន្ត្រី​ក្រសួងការពារ​ជាតិ​នៃ​ប្រទេស​ទាំងពីរ​ពី​ទីក្រុង​ម៉ានីល។ https://rfi.my/BRWt