🌍📡 ព័ត៌មានជាតិ និង អន្តរជាតិ សំខាន់ៗ ប្រចាំថ្ងៃទី ២៦ ខែកុម្ភៈ ឆ្នាំ ២០២៥៖ 🇰🇭🇻🇳 នាយករដ្ឋមន្ដ្រីវៀតណាម លោក ផាម មីញជីញ បានស្នើឱ្យកម្ពុជា និងវៀតណាមធ្វើការរួមគ្នាដើម្បីរៀបចំបោះបង្គោលព្រំដែនគោកដែលនៅសល់ ចំនួន១៦%។ សំណើរបស់មេដឹកនាំវៀតណាមដូចនេះធ្វើឡើងក្នុងជំនួបជាមួយលោក ប្រាក់ សុខុន រដ្ឋមន្រ្ដីក្រសួងការបរទេសកម្ពុជានៅក្នុងទីក្រុងហាណូយនាថ្ងៃទី២៥ កុម្ភៈ ឆ្នាំ២០២៥។ នេះបើយោងតាមសារព័ត៌មានវៀតណាម Vietnam News។ https://rfi.my/BRiS 🇰🇭🌳❤️‍🩹 ក្រសួងបរិស្ថាន រួមជាមួយរដ្ឋបាលខេត្តកោះកុង និងអង្គការមេត្តាធម្មជាតិនឹងរៀបចំពិធី «បុណ្យកោងកាង»ជាលើកដំបូងដែលមានរយៈពេល៣ថ្ងៃ ពីថ្ងៃទី២៨ ខែកុម្ភៈ ដល់ថ្ងៃទី០២ ខែមីនា ឆ្នាំ២០២៥ នៅខេត្តកោះកុង។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២៦ ខែកុម្ភៈ ឆ្នាំ២០២៥ នេះ លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងបានឲ្យដឹងថា កម្មវត្ថុនៃការធ្វើបុណ្យកោងកាងនៅខេត្តកោះកុង គឺចង់ឲ្យពលរដ្ឋខ្មែរមានការយល់ដឹងពីការអភិរក្សធនធានធម្មជាតិដើមកោងកាងដែលពលរដ្ឋសហគមន៍ជាច្រើនទទួលបានអត្ថប្រយោជន៍ដ៏ធំធេងពីធនធានធម្មជាតិព្រៃកោងកាង។ https://rfi.my/BRiD 🇹🇼🇨🇳💥 ក្រសួងការពារជាតិ​តៃវ៉ាន់ បានឲ្យដឹងនៅព្រឹក​ថ្ងៃពុធទី​២៦​កុម្ភៈនេះ ថាកងទ័ពចិន​បានធ្វើសមយុទ្ធយោធាដោ​យ​ប្រើគ្រាប់ពិត នៅ​កៀកបំផុតនឹង​ខាងត្បូង​កោះតៃវ៉ាន់ ចម្ងាយតែ​ជាង​៧០គីឡូម៉ែត្រ។ ភាគីតៃវ៉ាន់ បានរិះគន់ថា ទង្វើរបស់កងទ័ពចិនដែលធ្វើសមយុទ្ធដោយ​មិនជូនដំណឹងមុន គឺជាការបំពាន​មកលើច្បាប់អន្តរជាតិ ហើយ​បង្កអស្ថិរភាពដល់តំបន់ទាំងមូល​។ https://rfi.my/BRjx 🌏⛓️⚖️ ​សេរីភាព​ជា​ទូទៅក្នុងពិភពលោក ​បាន​ធ្លាក់​ចុះ​ នៅឆ្នាំ២០២៤ ខណៈពេល​អំណាច​ផ្តាច់​ការ​កាន់តែ​ឡើង​ឥទ្ធិពល។​ នេះបើតាម​របាយការណ៍​ប្រចាំឆ្នាំ​របស់អង្គការ Freedom House ដែល​ជា​ស្ថាប័ន​តាមដាន​​ឃ្លាំមើល​សិទ្ធិ​សេរីភាព​ និង​លិទ្ធិ​ប្រជាធិតេយ្យ​ក្នុងពិភពលោក។ ទោះបីជា​ម្តេច​ក្តី​ ​អង្គការអាមេរិកមួយ​នេះ​ ក៏​បាន​កត់​សម្គាល់​ដែរថា នៅទ្វីប​​​អាស៊ី​ភាគខាងត្បូង ប្រទេស​មួយ​ចំនួន​ហាក់​កំពុងស្ថិត​លើដំណើរ​ទៅកាន់​សេរីភាព ដោយ​សារ​​តែ​សន្ទុះ​ចលនាទាមទារ​សិទ្ធិ​របស់​ក្រុម​បាតុករ​ និង​បន្ទាត់​នយោបាយ​ប្រឆាំង​អំពើពុក​រលួយ។​ https://rfi.my/BRkD