🌍📡 ព័ត៌មានជាតិ និង អន្តរជាតិ សំខាន់ៗ ប្រចាំថ្ងៃទី ២៨ ខែកុម្ភៈ ឆ្នាំ ២០២៥៖ 🇰🇭🇨🇳🤝 អ្នកនាំពាក្យក្រសួងការពារជាតិចិនបានលើកឡើងនៅក្នុងសេចក្ដីថ្លែងការណ៍កាលពីថ្ងៃព្រហស្បត្តិ៍ ទី២៧កុម្ភៈ ថា ទំនាក់ទំនងយោធារវាងកម្ពុជា និងចិនមិនមានអ្វីអាចបំបែកបានឡើយ។ ការប្រកាសបែបនេះរបស់ក្រសួងការពារជាតិចិន គឺបន្ទាប់ពីការចុះផ្សាយថា ទំនាក់ទំនងយោធារវាងកម្ពុជា និងចិនកំពុងជួបភាពរកាំរកូស។ ក្រសួងការពារជាតិចិន និងកម្ពុជាចាត់ទុកការចុះផ្សាយបែបនេះថាជារឿងអវិជ្ជមានសម្រាប់យោធានៃប្រទេសទាំង២។ https://rfi.my/BS8A 🇰🇭🇰🇵⁉️ នៅថ្ងៃទី២៧កុម្ភៈ ឆ្នាំ២០២៥ ក្រសួងពាណិជ្ជកម្មបានចេញសេចក្តីប្រកាសបដិសេធភ្លាមៗថា គ្មានក្រុមហ៊ុនរបស់កូរ៉េខាងជើងកំពុងប្រតិបត្តិការដោយបើកចំហនៅក្នុងប្រទេសកម្ពុជាទេ។ការអះអាងរបស់ក្រសួងពាណិជ្ជកម្មកម្ពុជាយ៉ាងដូចនេះ គឺក្រោយពីមានការចុះផ្សាយរបស់សារព័ត៌មានកូរ៉េខាងជើង NK News ដែលសង្ស័យថាមានក្រុមហ៊ុនកូរ៉េខាងជើងកំពុងប្រតិបត្តិការនិងផ្សាយពាណិជ្ជកម្មលើការគ្រប់គ្រងភោជនីយដ្ឋានបណ្តាក់ទុនរួមគ្នាដោយមានទីតាំងនៅក្នុងប្រទេសចិន និងកម្ពុជា។ https://rfi.my/BS88 🇪🇺🇮🇳🤝 សហភាព​អឺរ៉ុប​គ្រោង​នឹង​ចុះ​កិច្ចព្រមព្រៀង​​ធ្វើ​ជា​ដៃគូ​ឥណ្ឌា​ក្នុង​វិស័យ​សន្តិសុខ​និង​ការពារ​ជាតិ​។ នេះ​បើ​តាម​សេចក្តី​ប្រកាស​របស់​លោកស្រី​ប្រធាន​គណៈកម្មការ​អឺរ៉ុប ពី​ប្រទេស​ឥណ្ឌា។ អឺរ៉ុប​ចង់​បង្ខិត​ខ្លួន​ឱ្យ​កាន់​តែ​កៀក​ស្និទ្ធ​ជាមួយ​ឥណ្ឌា ដើម្បី​ទប់​ទល់​នឹង​ឥទ្ធិពល​ចិន​ និង​ដើម្បី​បាន​ជ្រៀតចូល​ក្នុង​ទីផ្សារ​ដ៏​ធំ​របស់​ឥណ្ឌា​។ ​ការ​វិល​ត្រលប់មក​សេតវិមាន​វិញ​​របស់​លោក​ត្រាំ ទំនង​អាច​ពន្លឿន​យន្តការ​​នេះ។ https://rfi.my/BS7n 🌏❤️‍🩹 ក្រោយ​ពី​បរាជ័យ​កាលពី​៤ខែមុន​នៅ​ប្រទេស​កូឡុំប៊ី កិច្ចប្រជុំកំពូល​ស្តីពីប្រព័ន្ធជីវៈចម្រុះ​COP16 បានសម្រេច​រកឃើញ​ស្នាម​ញញឹមជាថ្មី​​ឡើងវិញ នៅប្រទេស​អ៊ីតាលី។ ​ថ្ងៃព្រហស្បតិ៍ ទី​២៧ ខែកុម្ភៈ ​ក្រុម​ប្រទេស​អ្នក​មាន​និងប្រទេស​កំពុង​អភិវឌ្ឍន៍ ប្រមាណ ១៥០ បានសម្រេច​យល់ព្រម​​ចំពោះ​វិភាគទាន​ក្នុង​គម្រោង​ថវិកា ២០០ ពាន់លានដុល្លារ ដើម្បី​ជួយ​សង្គ្រោះ​ប្រព័ន្ធ​ជីវៈ​ចម្រុះ​នៅលើ​ភព​ផែន​ដី​។ https://rfi.my/BS9I