🚨 حكم إنشاء موقع دروبشيبينج وربطه بعلي بابا! سؤال بسيط ومحدد: هل يجوز إنشاء موقع دروبشيبنج على شوبيفاي وربطه بموقع "علي بابا" والبيع من خلاله؟ ✅ الإجابة: الطريقة دي هي النموذج السائد للدروبشيبنج، واللي فيه إشكالية شرعية واضحة، لأنه ببساطة: 1️⃣ أنت بتبيع سلعة مش عندك! يعني المنتج موجود في الصين على علي بابا، وأنت في مصر أو أي بلد، وبتستخدم أدوات إلكترونية تخليك تعرض المنتج على موقعك كأنك التاجر. 2️⃣ العميل يشتري منك مباشرة! العميل يدخل موقعك، يشوف المنتج، يدفع الفلوس ليك، وأنت أصلاً لسه ما اشتريتش البضاعة دي من المورد! 3️⃣ نظام أوتوماتيكي بيشتري بالنيابة عنك بعد ما العميل يدفعلك، الأدوات المربوطة بين موقعك وعلي بابا بتقوم أوتوماتيك بتحويل الفلوس للمورد، وإرسال بيانات العميل، والمورد هو اللي بيشحن للعميل مباشرة، وانت ولا استلمت البضاعة ولا شفتها ولا دخلت في ضمانك. ⚠ المشكلة الشرعية هنا؟ 📌 بيع ما لا تملك! 📌 عدم دخول المنتج في ضمانك قبل البيع! ودي المشكلة اللي أهل العلم تكلموا عنها لما قالوا إن البيع بالشكل دا يدخل في النهي النبوي: “لا تبع ما ليس عندك” وحديث زيد بن ثابت: “نَهَى النبيُّ ﷺ أن تُباعَ السِّلَعُ حتَّى يَحوزَها التُّجَّارُ إلى رِحالِهِمْ” (رواه أبو داود). 🔴 طب إيه الحل؟ لو عايز تشتغل بشكل شرعي، عندك ٣ خيارات: 1️⃣ تملك المنتج قبل البيع 🏬 يعني تشتري المنتجات وتدخلها مخزنك أو تتفق مع المورد إنها تكون في ضمانك قبل ما تبيعها. 2️⃣ العمل كنظام وكالة وليس بيع مباشر 🤝 يعني تقول للعميل بوضوح إنك وكيل عن المورد وليس البائع الأصلي، وتأخذ عمولة محددة متفق عليها. 3️⃣ تحويل الموديل لنظام السمسرة (التسويق بالعمولة - Affiliate Marketing) يعني تكسب عمولتك من المورد مش من العميل ( وينفع تاخد العموله من العميل لو إنت وكيل عن العميل وليس المورد ولكن الأوقع في التطبيق العملي انك تكون وكيل عن المورد، وممكن تكون العمولة موزعة على الطرفين المهم تكون بعلمهما ) ، ويكون دورك تسويقي فقط بدون استلام الفلوس على موقعك. 💡 الخلاصة: ⚠ لو هتبيع منتج مش عندك، ومش داخل في ضمانك قبل ما توصله للعميل، فده نموذج الدروبشيبنج المحرم شرعًا. ✅ أما لو غيرت الموديل ليكون وكالة أو سمسرة أو اشتريت المنتج فعلًا قبل البيع، يبقى مفيش مشكلة شرعية. 📌 لو عايز تفاصيل أكتر عن نموذج الدروبشيبنج الشرعي، اكتب في الكومنتات “مهتم” وهبعتلك القرار الأخير لمنتدى الاقتصاد الإسلامي بشأنه. #باسم_عليوة #شريعة_أوديت #دروبشيبنج