🎙 ዜና እፍታ - በአማራ ክልል ምሥራቅ ጎጃም ዞን ጎንቻ ሲሶ እነሴ ወረዳ "አነገሽ" በተባለው ቀበሌ “ሐሙስ ገበያ” በተባለች ቦታ ሐሙስ የካቲት 13/2017 ዓ.ም. ገበያ ዳር በሚገኙ ተያይዘው በተሠሩ ንግድ ቤቶች ላይ ተፈጸመ በተባለ የድሮን ጥቃት ሰዎች መሞታቸውንና መቁሰላቸውን የአሜሪካ ድምፅ ያነጋገራቸው የሟች ቤተሰቦች እና የዓይን እማኞች ተናግረዋል። - የሶማሊያ እና የኢትዮጵያ የጸጥታ ባለሥልጣናት በአዲሱ የአፍሪካ ኅብረት ተልዕኮ ውስጥ የኢትዮጵያን ወታደሮች ተሳትፎ የሚያረጋግጥ ስምምነት ተፈራረሙ። - በሳምባቸው የተፈጠረ ኢንፌክሽን በኩላሊታቸው ላይ ጉዳት ማድረሱን ተከትሎ ላለፉት ዐሥር ቀናት በሆስፒታል ሕክምና ሲደረግላቸው የቆዩት የሮማ ካቶሊክ ሊቀ ጳጳስ አባ ፍራንሲስ በተሻለ የጤና ሁኔታ ላይ እንደሚገኙ ቫቲካን አስታውቃለች። - በዩክሬን የሚካሄደውን ጦርነት ማስቆም በተመለከተ፣ በአንድ ወገን በአሜሪካ በሌላ ወገን ደግሞ በዩክሬን ተረቀው ለተባበሩት መንግሥታት ድርጅት ጠቅላላ ጉባኤ የቀረቡ የውሳኔ ሐሳቦች ዛሬ ሰኞ ድምፅ እንደሚሰጥቸው ይጠበቃል። - የዩናይትድ ስቴትስ ፕሬዝዳንት ዶናልድ ትረምፕ በዩክሬን ያለውን ጦርነት ማቆም እንደሚያስፈልግ በድጋሚ ሲያሳስቡ፣ የዩክሬኑ ፕሬዝዳንት ቮሎዲሚር ዜለንስኪ ለሰላም ሲባል ስልጣን ለመልቀቅ ፈቃደኛ እንደሚሆኑ ተናግረዋል ። ዛሬ ሰኞ ሩሲያ ዩክሬንን የወረረችበት ሦስተኛ ዓመት ይታሰባል፡፡ 👉 ተጨማሪ ዘገባዎችን በመደበኛ የዜና ዕወጃ ሰዓታችን ያገኛሉ፡፡