*ALLAH paak Se Jude Bekar Sawal – Ek Aasan Samajh* Kuchh gair-Muslim log Musalmanon ko uljhaane ke liye ALLAH Paak se jude sawal karte hain, jaise: *ALLAH kaisa hai?* *ALLAH kahan hai?* *ALLAH kab se hai?* Asal me, ALLAH Paak ki zaat se jude ye sawal hi galat hain. Kuchh cheezein aisi hoti hain jin ke baare me sawal karna bekaar hota hai. Sawal sahi hai ya galat, ye is par nirbhar karta hai ki sawal kis cheez ke baare me kiya ja raha hai. Ek aasan misaal: Agar koi chhota bachcha, jo abhi bolna seekh raha hai, aapse ye sawal kare: *Gulaab ki khushbu ka rang kaisa hota hai?* *Khushbu ka aakar kaisa hota hai?* *Khushbu gol hoti hai ya chaukore?* *Khushbu meethi hoti hai ya teekhi?* To aap kya jawab denge? Yehi ki sawal hi galat hai! Bachcha apni samajh ki kami ki wajah se aise sawal kar raha hai. Jaise-jaise uski samajh badhegi, wo khud samajh jaayega ki khushbu se jude aise sawal bekaar hain. Isi tarah, ALLAH Paak ki zaat se jude kuchh sawal insani aql se bahar hain. Aise sawalon par behas karna fizool hai. Hamara kaam ye hai ki hum ALLAH aur uski sifaat par imaan laayen, jaisa ki Quran wa Hadees me bataya gaya hai, aur gair-zaroori sawalon se bachen. Sahi Aqeedah Kahaan Se Milta Hai? ALLAH Paak ke baare me sahi jaankari humein Nabiyon aur Rasoolon se mili hai. Agar ALLAH Paak ne apne Nabi na bheje hote, to insaan kabhi bhi ye nahi jaan paata ki: ALLAH ke sifaat kya hain? Uski ibaadat karne ka sahi tareeqa kya hai? Kaun-si baatein ALLAH Paak ke shaan ke laayaq nahi hain? Ye sab baatein hamein wahi Rasoolon ke zariye maaloom hui hain. Yahi wajah hai ki ALLAH Paak ne apne Nabiyon ko bheja, taaki wo hamein sahi raasta dikhaayen. Isliye humein gair-zaroori sawalon mein ulajhne ke bajaay, Quran wa Hadees ki baatein maankar apni zindagi ko sahi raaste par chalana chahiye. *✍️ Muhammad Wasim Akram Razavi* Titlagarh, Balangir, Odisha