BJP MIZORAM HEADQUARTERS, PRESS RELEASE DATED THE 24TH FEBRUARY 2025 : NO.BJP/MZ/HQR/PR-18. Vawiin 24th February, 2025 hian BJP Mizoram State Office, Mipui Rûn, Upper Republic-ah Karthar inhlanna leh Political Session hun neih niin, Pu Vanupa Zathang, IPS (Retd), State Vice President-in inkhawm a kaihruaia, Pu JB Rualchhinga, State Vice President-in hunserh hmangin, Pu Vanlalhmuaka, State President-in thusawina hun a nei bawk. Pu Vanlalhmuaka chuan thusawiin, "Mizoram hian kalphung thar kan neih a ngai a, ZPM Party kalphung thar zuar tute ngei pawh hian kalphung thar tak tak an lo nei bik chuang lo a ni tih vawiin ah chuan Mizoram mipuite'n kan hre chiang ta hle a, Aspirational District/ Aspirational Area-ah Lengpui Airport a awm avangin Central chuan tihchangtlunna tur sum a ruahman lawk tawh a, hei mai ni lovin Rural Connectivity atana pawimawh BJP Mizoram-in kan Manifesto-a kan lo dah tawh angin leh Central-in a ngaih pawimawh avangin Lengpui Airport mai nilo Airport dang pawh Chhim lam tan min pe dawn bawk a ni," a ti. Pu Hmuaka chuan, "Kalphung thar keini BJP-in kan tih ve chu Union Budget thlir chung leh Central-in engtin nge State-te tana hmalakna tur a duan? tih te zir chiang se, chu chu kalphung thar ah BJP Mizoram chuan kan ngai ngei ang. Tuna kalphung thar inti te'na an hmalak dan en hian kalna tur kawng hre lova, kawng awm apianga kal tum mai niin an lang a, an kal dan en hian pan lam zawng an neih engmah hmuh tur a awm lova, an tlachawp êm êm hian a lang a ni. Tun Sorkar hi mipui beidawnna ti zual tu tur an ni anga, chumi hnu ah chuan Mizoram mipuite hian BJP ah rinna kan nghat thei ngei tawh dawn a ni. A chhan chu, India ramah PM Pu Narendra Modi kaihhruaina hnuaiah Party dangin min chirhthehna angin, Sakhuana thil ah emaw, chibing inthliarna kawngah emaw engmah hmalakna a awm lova, chumai nilovin Corruption avanga man tawk leh hmingchhia tumah BJP Sorkar hruaitute ah hian an awmlo va, Corruption hi a zung aṭangin theih tawpin an an pho ro a, Mizo mipuite pawh hian chumi rah chu kan seng a, Central aṭanga sum kan dawn turte pawh Direct-a kan account ah a lut zel hi Mizoram mipuite hian engvang nge tih te kan chhut ṭhin em? Direct benefit Transfer (Corruption laka invenna) avang ringawt pawh hian Crore Sing 5 lai chu BJP Sorkar avangin sum kan khawl phah a ni. Heng te avang hian mipuite'n BJP nihna an hrechiang zel a, chuvangin BJP aṭanga Development kan beisei leh duh dan chu a thleng thei dawn a ni tih an hre zel dawn a ni," a ti. Pu Vanlalhmuaka chuan sawi chhunzawmin, "BJP Mizoram chuan kan Manifesto-ah pawh kan lo tarlan tawh angin, Ṭhalai hna neilo, hnathawh tur hrelo lehkha thiam te'n hna an neih theih nan ṭan kan la dawn a, Mizo ṭhalaite hi an beidawng mai ang tih hi a hlauhawm takzet a, ruihhlo bawiha tang tam tak te hi hnathawh tur mumal awmloh vanga ruihhloa kal ta te pawh an awm hialin a rinawm a ni. Chuvangin Mizoramin kan mamawh chu, a ram mi te tana ding ngam, mahni chauh inhaivurna laka fihlim te hi kan mamawh tawh a ni," a ti bawk. He hun ah hian Dr. Zonuntluanga, State Secretary-in Union Budget chungchang Report pekna hun a nei bawk. Issued By IT & Media Department, BJP Mizoram Headquarters: Aizawl, Mizoram. #bjp4mizoram #mizoram #bjp https://www.facebook.com/share/p/1FZg1fzEi7/