معلومه قانونية السارق بيتسجن ولا بيتحبس؟ هو فيه فرق بين السجن والحبس أصلا؟!  أول لما تسمع الجملة دي هتلاقي نفسك احتارت وبتسأل نفسك هو السارق عقوبته ايه؟ ويعني ايه يتسجن أؤ يتحبس -قبل ما أقولك الفرق خليني أعرفك أن الجرائم بتتقسم ل 3 وبتتصنف على أساسها الفعل.. وبشكل عام الجريمة بتنقسم حسب خطورتها لثلاثة أقسام :- "جناية وجنحة ومخالفة". زي بالظبط لما تعمل فعل وحد يقولك الفعل دا غلط أو عيب أو فعل كويس، فالقانون صنف الجريمة لل3 دول وهوضحهم. 1- الجنايات: ودي تعتبر أشد وأقسى أنواع الجرائم وعشان كده عقوبتها بتوصل للإعدام وأخف حاجة فيها السجن. والمشرع وضح عقوبة الجناية تبدأ من 3 سنين ل 15 سنة ونزود عليهم أن العقوبة في الجناية ممكن تبقى سجن مؤبد. 2- الجنحة: بتتسمى في بعض الدول "فعل إجرامي أصغر" وعادة عقوبة الجنحة بتكون أخف من الجناية في حكمها. والمشرع قال عقوبة الجنحة تبدأ من 24 ساعة ل 3 سنين. 3- المخالفة: ودي بتعتبر أخف أنواع الجرائم وبتكون عقوبتها غرامة مالية لا تزيد عن 100 جنية، زي مخالفات المرور كده. وفيه حالات المشرع بيترك الحكم لسلطة القاضي هو يقرر حسب القضية زي انه يحكم بسجن مشدد أو اعدام أو مؤبد. *- كده عرفنا أن أي فعل اجرامي بتعمله بيتصنف ل3 أقسام ايه الفرق بين السجن والحبس بقى؟ وعقوبة السرقة ايه؟* السرقة البسيطة بتتصنف جنحة وزي ماقولنا فوق أن الجنحة عقوبتها الحبس وكمان قولنا أن الحبس من 24 ساعة ل3 سنين. أما السجن فهو بيبقى من 3 سنين ل 15 سنة.    - امتى السرقة تتحول من جنحة وتبقى جناية؟! لما السارق جريمته تكون فيها عنصر الإكراه ودا معناه انه يسرق تحت التهديد أو انه يكون معاه سلاح وفي الحالة دي بتتحول عقوبته.. يعني بدل ما كان هيسرق سرقة بسيطة ويتحبس أقصاها 3 سنين.. لأ وقتها هيبقى ما بين 3 ل15. -والتقسيم دا من خلاله هتعرف اللي قدامك فعله كان ايه، يعني لو حد قالك انه دفع غرامة هتعرف أن جريمته مخالفة، ولو حد قالك انه اتحكم عليه بإعدام هتعرف أن جريمته جناية، ولو حد اتحكم عليه بالحبس هتعرف أن دي جنحة. -واخيرًا تلخيصًا لكل دا هنقول أن الحبس من 24 ساعة ل 3 سنين والسجن من 3 سنين ل 15 سنة، وأن السرقة البسيطة عقوبتها جنحة أما لو بقى فيها إكراه هتتحول وتبقى جناية. بالتوفيق للجميع 💐⚖️