جار 21 فروری ءِ روچ ءَ ما بلوچی زبان ءِ لھتے گچینی لچہ کارانی لچھاں دپگال کنگ ءُ چہ بی این ایم ءِ رسانکی تک ءِ نیمگ ءَ شنگ کنگ ءَ ایں۔ چہ شما کسے اگاں اے شئراں وتی توار ءَ وانگ لوٹ ایت ، ایشاں پیتبند بہ کنت ءُ پہ ما دیم بہ دنت۔ کازی ریھان ، رسانک ءُ ربیدگی کارگشاد ، بلوچ راجی زْرمبشت ( بی این ایم ) ---- 21 فروری ماتی زبانانی میان راجی روچ اِنت زبان راجانی ربیدگ ، گْوستانک ءُ پجار ءِ مستریں پانک اِنت ---- او تانھی نوداں گوں شما عرض اِنت لنڑو ءُ شانک ءِ مینگ اوں فرض اِنت کہ آ شھیدانی زیارتاں مین اِت پہ دمے مونگارو کن اِت تْرمپاں شوھاز واد بوئیں جیھڑاں بہ ھل اِت اچ آ سمینانی گلگل ءُ ھلاں در کپ ایت سالونک دْروشمیں نتھا سیمک --- او بدکشانی لال بے ملیں مارا تئی لوگاریں سر ءِ سوگند پر تئی شھد ءُ شکلیں نیاداں ھرمرے گون کپت آں اناگاھے ھون بھا باں تئی تنگھیں دیم ءِ جام درک --- بہ یا او سبزیں مرگ ترا ربالو کن آں ایر کپ اچ درنگ ءَ ، بہ ھل زھیرانی زارھاں زیر سلامان ءُ شل پر آ پٹ ءُ بیدھاں نکش ءُ پار ایش اَنت ، سھر اَنت ئِے چمانی لوار شپتگیں پونز اِنت ، سمل ءِ بروان اَنت ھوار کاٹکیں طوقے مان اِنت کونج ءِ گردن ءَ سئے تلیں تاویت ژنگ اَنت ماں دوست ءِ ڈوبر ءَ مست توکلی --- آ مرد کہ ھوناں گر اَنت برزیں ھشیم اش گْواتگر اَنت امبار اش بے راھیں گر اَنت ملا فاضل --- دومی بھر --- من چہ ھر پل ءَ گچین اِین رنگ ءُ وشبو ءَ بر این بلبل ءُ قمری ءَ گند این سوز ءُ کوکو ءَ بر این سر تپوکیں کوچگ ء سبزیں زر ءِ موج ءِ تہ ءَ دانہ دانہ من چن این لعل و جواھر بے بھا گل خان نصیر --- سوگند پہ ازل دانک ءُ سوگند پہ ابدگال سوگند پہ آریپیں کتابانی نبشتار سوگند پہ ندکارے کہ ھاوند ءِ کلم کش سوگند ور آں پہ وتی نام گپتگیں ندکار راجے کہ بہ بیت گنگ نہ مان ایت نہ مان ایت مان ایت پہ ادارکے بزاں زندگ ءَ مردار سید ھاشمی ---- راست تئی ھلک ءَ سر مئے کپتگ پہ ردی دوزھی گشتاں جنتی ارمان ءِ پد ءَ دل گل ءَ بال اِنت جی ھیال ءِ نا سرپدی بے رگام ءَ ءُ بے تئی نیاد ءِ دْراھی ءَ غم تئی ارسیں ترانگ ءِ استین اِنت دْردی نستگیں ساہ اِنت چندنیں جیگ ءِ منزل ءَ نی نہ بنت مھرانی قدم ھچ رنگ ءَ پدی عطا شاد --- پکر ءِ ستکگیں گیابان ءَ گم چو ترونگل ءَ تْرامبال اَنت زرد ءَ لیڑھی بارے گون نے پہ در دپاں گْران لجیں ڈیھ ءِ گم مدام پارسنگ اَنت سنجیں ترانگ ءِ آمید ءَ زرد ءَ را مہ بیت ڈیھ ءِ گم شالا بن گرات بند بند ءَ انور صاحب خان -- سیمی بھر نہ اِنت ھچ گونگ ءَ دودے بلوچی برات برات ءَ بہ دنت تاوان ءَ لالا جھان ءِ درد ءُ رنجانی سمائی رس ایت بہ یا ئے مئے دیوان ءَ لالا تو کولیگ ئے پہ رائے ونڈ ءَ من نْدر آں پہ بلوچستان ءَ لالا غوث بھار --- پنڈگ ءُ چمداری نیت آشوب نیکہ آجوئی ءُ وش تبیں سھتے چہ وتی واک ءُ پنجگ ءِ زور ءَ بہ یار پہ وت ءَ زندے ، پہ دژمن سیاھگواتے اگاں واھگے دار ئے پہ ایمنی راج ءِ گڑا کارپدے ساز ءُ نوک بہ کن یاتے گل جان گل ( شھمیر غلام محمد ) -- منی دیوانگی ءَ ھرکس حیران اِنت ، من حیران آں چوشیں بے حاجتی ءَ زندگی گْران اِنت ، من حیران آں اے چونیں جاورے پیداور اِنت انسان ءِ چاگرد ءَ ھمک مردم وتی میل ءَ پریشان اِنت من حیران آں اد ءَ بنی آدم ءِ زند ءَ را گبرے قدر ءُ کیمت نیست اد ءَ چوش آپ ءِ رنگ ءَ ھون ارزان اِنت ، من حیران آں مبارک قاضی --- شانتلے دور نالگا اِنت من ءَ باریں کے گوش دارگ ءَ اِنت من ءَ شینک ءُ استال رپتگ اَنت تانگو آزمان تھنا کوپگ ءَ اِنت من ءَ کمیں بہ یا ترا بہ چار آں من ءَ پہ وت ءَ زھیر بوگ ءَ اِنت من ءَ منیر مومن