سلام وألف سلام عليكم يا أبطال دفعه الأمل🤍 قاعد كدا في أمان الله بين فديوهات الريلز ومنشورات الفيس ولاعب الكورة دا وشوف الموضه ديك مريح راسك من الصداع فجاءة كدا تتذكر الامتحان وتمشي تشوف الكتاب القاعد ليه سنه لمن التراب ملى وشه وتقول انك هتقراه كله الان وما عندي وقت لازم اجتهد واجيب نسبه عاليه وتجي الاول على السودان والنسبه 100٪ تفوت الترابي زاته وتعدي دقيقتين وترجع خائب وما قريت ولا صفحه واحدة 😕 طيب ليه حصل كدا.؟ عشان اخدت دفعه كبيرة من الحماس وختيت اهداف كتير في فترة قصيرة وأرهقت نفسك واصلا الله سبحانه وتعالى قال ( لَا يُكَلِّفُ اللَّـهُ نَفْسًا إِلَّا وُسْعَهَا...🤍 ) هنا صح حفزت نفسك بس بطريقه خاطئه ليه ؟ اسي هقول ليكم التحفيز دا يا جماعه عنده لعبه لو قدرت تجيدها هتاخد منه اكبر كميه من الاستفادة😁 ١/ اول شي تخت اهداف على المدى الطويل وأهداف على المدى القصير كيف؟ مثلاً.. انا بعد ساعتين بكمل ٣ صفحات في الكتاب المفروض اعمله لازم اكمله قبل نهايه اليوم دا (على المدى القصير😄 )ونهايه الاسبوع لازم اكون خلصت وحدتين من أصل سته دا (على المدى البعيد) وكمان تقول أنا بعد شهر هكون خلصته كله لازم تقعد تدرج عشان لو الموضوع جا دفعه واحدة حتكسل وتبطل الشغل من اساسه😕 ٢/ تكأفئ نفسك لازم نفسك دي تدلعها لو خلصت العليك تمشي تقرا كتاب أو تسمع بودكاست ويا سلام لو جبت لي نفسك كدا جامبوا ساندوتش شاورما🫣 ما هتكون قصرت نهائيا عارفه الفلس بتاع اليومين ديل عشان كدا جيب طعميه ما مشكله بطل تقعد تقول ليها طوالي انتي ما قريتي وما خلصتي وطوالي في حاله تأنيب ضميري ووو الكلام الكتير داك لازم تشد عليها وترخي زي الشافع الصغير لو هرشته طوالي بيطلع معقد ولو دلعته طوالي بيبقى قليل ادب عشان كدا لازم تتوسط وخير الأمور أوسطها🤍 ٣/التركيز على النجاح ماتقعد تقول انا مابقدر وفلان دا ذكي انا لا ومابعرف شنو فلان دا عنده مخ تاني ولا رجلين زيادة ما هو زيه زيك انسان خلقه الله🙂 صح مرات الذكاء بيتفاوت من شخص التاني وزي ما ربنا شال منك شي اداك يعني أنا مثلا بحفظ سريع أختي بتفهم أسرع مني انا فالحه في التاريخ وهي فالحه في الرياضيات فدائما اقعدوا شجعوا نفسكم وتكلموا بي إيجابيه🌼 ٤/الدعم الاجتماعي لازم والف لازم دي خت تحتها خط طويل عريض❗ تقعد مع أصحاب بيشجعوا اكتر من ما بيحبطوا البيحبطوك ديل مافي داعي ليهم في القرايه وفي الحياة عموما نحن عايزين البيقعد يقرأ وشفت الدرس الفلاني والعلاني وكملتي القصائد كلها ديل بيشجعوك وبيدوك طاقه إيجابيه انك تكمل المشوار ٥/ تزيد التحدي إتحدى نفسك دي قول دائما التحدي بيدي احساس بالحماس خت جدول وشوف انت بتقدر أو لا وما لازم جدول مثلا الليله انا حقرا الدرس الفلاني وتخلصه وتقول واحد تاني عشان اشوف نفسي بقدر أو لا ٦/تنوع مهامك يعني ما الاسبوع كله عربي عشان تختمه لازم تعدد المواد عشان ما تزهج وتمل الملل دا الاحساس اللي احنا عايزين نطرده مرة أقرأ رياضيات مرة انجليزي ولو بتقدر في اليوم الواحد اقرا كم مادة☺️ ٧/تنظيم الزمن يلا دي اهم نقطه لو قاعدين تتونسوا وقفوا واسمعوني🗣️ لازم تخطط زمنك وترتب جدول ويومك اصلا أغلبنا ما قاعد فاضي ساي اكيد في مهام في البيت وفي منكم بيشتغل لازم تخت جدول وتمشي على أساسه وتخصص وقت القرايه وبيئه مناسبه عشان ما تكون ضايع والمهام كتيرة وما عارف تبدأ بي وين🙃 وختاماً اتمنى أنه ربنا يجبر بخاطركم وتعدوا بأعلى النسب إن شاء الله . "كل مر سيمر🤍🪻" #هيفاء #تيم ـ الدعم ـ النفسي # مبادرة ـ نحن ـ معاك