ونسة بيني وبينك... الحب حرام ولا العلاقات غير الشرعية؟ 🤔 بيني وبينك، دايماً الموضوع دا بحيرني، ليه أي علاقة بين ولد وبنت بتكون غلط؟ مع إنو نحن عاملين حدود وما بنتخطاها أبدًا. 😕 = حبيبتي، الرسول ﷺ قال: "لا يخلونّ رجل بامرأة إلا كان الشيطان ثالثهما." (رواه الترمذي وصححه الألباني) الشيطان بيزين الحاجات دي خطوة خطوة، عشان كدا لازم نكون واعيات. بس نحن ما بنتلاقى، مجرد ونسة في الشات بس، يعني عشان يحصل شي؟ 🤷‍♀️ = يا حلوة، الخلوة ما ضروري تكون بلقاء مباشر، حتى الشات خلوة، لأنكم براكم وما معاكم زول... ومافي زول عارف بتقولوا شنو لبعض. وربنا سبحانه وتعالى قال: "وغير متخذات أخدان." (سورة النساء: 25) تفسير ابن كثير: المقصود بالأخدان العلاقات السرية بين الرجال والنساء، حتى لو لم تصل للفاحشة، فهي ممنوعة في الإسلام. ما هو أصلًا زول جادي وعايز يتزوجني. 😍 = الزول الجادي بكون واضح من البداية، وبمشي في طريق الحلال، ما بقعد يرسل ليكِ ساي ويعيشك في أحلام. بس هو ما جاهز، كيف يقدر يطلبني من أهلي؟! 🤔 = لو عايزك بحق، بخاف عليكِ من نفسو ويسعى ويجتهد عشان تكوني من نصيبو بالحلال. أي شي بدايتو ما بترضي الله، نهايتو ما حترضيكِ، صدقيني. الإسلام ما حرّم الحب. ❤️ = صح، الإسلام ما حرّمو، لكن في فرق بين الحب البمشي في طريق الحلال، والحب البخلي الإنسان يعيش في خوف وقلق. عشان كدا، الشرع ختّ ليهو ضوابط واضحة، وهي الخطبة بضوابط الشرع ثم الزواج. طيب، عرفت إنو الارتباط حرام، لكن لو كانت بس علاقة صداقة، يكون البيست فريند بتاعي وكدا؟ 😅 = بصراحة، مصطلح "بيست فريند" دا جبتوه من وين؟ الشايفاه أنا، ما عندو أي فرق من الحبيب، ويمكن يكون أقرب كمان! برضو ما وريتيني الحكم هنا شنو؟ = أي ذكر ما من محارمك، علاقتك بيه ما بتكون في محلها، سواء كان صديق، بيست فريند، أو أي اسم تاني، المهم هو راجل، وربنا عارف طبيعتنا وشرع لينا الأحسن. طيب ليه يعني؟ 🤨 = ربنا خلق ميل فطري بين الذكر والأنثى عشان استمرار الحياة. فإنتِ مهما قلتِ علاقتكم بي حدود، الشيطان بيعرف متين يوقعكم وبيزين ليكم الحاجة واحدة واحدة. بس ربنا قال: "وجعلناكم شعوبًا وقبائل لتعارفوا..." 🤷‍♀️ = كتير من الناس فاهمين الآية دي غلط. "وجعلناكم شعوبًا وقبائل لتعارفوا إن أكرمكم عند الله أتقاكم." (سورة الحجرات: 13) تفسير السعدي: المقصود بالتعارف هو التعارف بين الأمم والقبائل في أمور الدنيا والتعاون، وليس إقامة علاقات شخصية بين الرجال والنساء خارج إطار الشرع. بالجد أنا كنت فاهمة الآية غلط. فعلاً كلامك صاح، ربنا ما حرّم الحب، لكن وضع ضوابط نسير عليها، وأمرنا بغض البصر ومنع الاختلاط اتقاءً للفتنة. = بالضبط! خلي قلبك للزول البستاهلو والبيجيك بالحلال وشاريك. الارتباط بدون وضوح ضياع زمن وعيش في وهم ما أكتر. فعلاً، حتى علاقات الصداقة دي في النهاية بيكون في طرف متعلّق بالتاني، وحتى لو نحن متأكدين من نفسنا، لازم نقفل الباب على الشيطان عشان ما يلقى فرصة. = تمام! الحلال أجمل وأطهر، لأنو ما فيهو خوف ولا قلق. الله يوفقك، وادعي ربنا يرزقك الزول الصح في الوقت الصح. واتذكري، لما تتركي حاجة بتحبيها مخافةً لله، ربنا حيعوضكِ بالأحسن منها. "الحلال راحة وسكينة... والحرام لحظة بتسرق منك سنين من الندم!" ❤️ #مزن #تيم الدعم_النفسي #مبادرة_نحن_معاك💙