•••"اسبوع الدراسة في رمضان " 📌 كيف توازن بين العبادة والدراسة في رمضان ؟؟؟ رمضان شهر البركة، لكن لو ما خططت صح، حتحس إنو الأيام بتجري (وسريعة جداً الأيام دي على فكرة خاصة في رمضان)، فجأة!! تلقى نفسك تائه بين الجوع... التعب... والكتب المكدسة قدامك! لكن ما تخاف، الحل بسيط يا عزيزي: "نظم وقتك... كدا حتلعبها صح، ويوم النتيجة حتنبسط!" وأنا هنا عشان أوريكم كيف تتغلبوا على التحديات وتوازنوا بين المذاكرة والعبادة. --- 1️⃣ كيف تخلي الفجر وقتك الذهبي للمذاكرة؟ أنا ما عارفة القال "من طلب العلا سهر الليالي" كان حاسي بي شنو، بالنسبة لي: "من طلب العلا صحى بدري" 📌 ليه الفجر أنسب وقت للمذاكرة؟ 🔹 دماغك رايق، ما في أي لخبطة ولا زحمة أفكار. 🔹 الجو هادي (ناس البيت نايمين، وحتى في رمضان الناس بتساهر وتصلي، وأنت يفضى ليك الجو). 🔹 البركة في الوقت – قال النبي ﷺ: "اللهم بارك لأمتي في بكورها" يعني الرسول دعى إنو الوقت دا يكون مبارك، ليه ما تستغلوه؟! ❄️ نصيحة مني ليكم: نوموا بدري، واصحوا بدري، وعودوا نفسكم على كدا من هسي عشان لما يجي رمضان تكونوا متعودين على النظام. --- 2️⃣ مذاكرتك حتبقى أسهل لو قسمت وقتك كدا! شايفين لما تاكلوا العيشة، بتاكلوها كلها مرة واحدة ولا بتقسموها لي كم لقمة؟ بالضبط، دا الحنعملو مع المقرر، نقسمه لي لقمات صغيرة! 📌 كيف؟ • استخدموا تقنية البومودورو: ••مثال لجدول بسيط: • 25 دقيقة مذاكرة (مثلاً مراجعة أول درسين في التجويد). • 5 دقائق راحة (تمشية خفيفة، شوية استغفار، قراءة ورد من القرآن). 🔄 كرر الدورة 3 مرات، وبعدها خد راحة طويلة (30 دقيقة)، وساعد أهلك شوية. 📌 حديث جميل: قال النبي ﷺ: "إن الله يحب إذا عمل أحدكم عملاً أن يتقنه" يعني 50 دقيقة مذاكرة بتركيز، أحسن من 3 ساعات متقطعة بدون فايدة! --- 3️⃣ "العبادة + الدراسة = زول عسل" في رمضان، لازم توازن بين عبادتك ودراستك، لأنو الشهادة مهمة، لكن آخرتك أهم، صاح؟ كيف تدمج العبادة مع الدراسة؟ • بعد الفجر → 10 دقائق قرآن، وبعدها تبدأ مذاكرتك. • بعد العصر → استمع لمحاضرة دينية وانت بترتب كتبك. • في العشاء → بدل تضيع زمنك في الواتساب، ادخل قروبات النقاش، واسأل وشوف أسئلة زملائك. 📌 الطالب الذكي ما بقول "ما عندي وقت"، بقول "كيف أنظم وقتي؟" --- 4️⃣ راحة المخ واجبة! مخكم دا ما ماكينة عشان تشغلوه طول الخط، محتاج راحة زيكم تمامًا! في ناس بتقول: "في رمضان لازم أساهر"، ودا أكبر غلط، لأنو المخ عنده طاقة معينة، وبعدها خلاص، ما بقبل أي معلومة، يعني بتكون بتضيع زمنك ساي! 📌 أفضل جدول نوم في رمضان: •نوم بعد صلاة التراويح (مثلاً الساعة 11). • اصحى قبل الفجر بساعة لمذاكرة خفيفة (واتذكر تصلي ركعتين قيام عشان ربنا يوفقك). • بعد الفجر راجع مادة سهلة، ولو حسيت بالنعاس، خذ قسطًا من النوم. 📌 قال الله تعالى: "وجعلنا نومكم سباتاً" (النبأ: 9) يعني النوم مهم لاسترجاع طاقتك، وركز على نوم الليل ما نوم النهار! ❄️وربنا يبلغنا رمضان ونحن شاكرين حامدين.. و وقتنا منظمين ....وضميرنا الدراسي مريحين... نهائي ما ندمانين..... لأننا منجزين 🤍 🔥 التحدي بتاعنا: عايزينكم تبدأوا تتعودوا على الطريقة دي من هسي، جربوا تذاكروا ساعة قبل الفجر باستخدام تقنية البومودورو، عشان لما يجي رمضان تكونوا جاهزين! #مزن #الدعم_النفسي #مبادرة_نحن_معاك💙