رمضان شهر مميز… شهر البركة والطاقة الروحانية العالية، ولو استغليناه صح، ممكن نحقق فيه إنجازات عظيمة! فلو إنت طالب شهادة، رمضان ممكن يكون فرصتك الذهبية للتركيز والتفوق… كيف؟ خليني أقول ليك السر بالتفصيل: 1. إدارة الوقت بذكاء: الوقت في رمضان مختلف، عشان كده لازم يكون عندك جدول واقعي ومرتب. 2. حدد أهدافك اليومية: قبل ما تبدأ يومك، اسأل نفسك: "عايز أخلص شنو اليوم؟" اكتب 3-5 أهداف واضحة ،مثلا: _مذاكرة درس معين _حل تمارين محددة _مراجعة جزء معين من المادة كل ما كان عندك خطة، كل ما كان إنجازك أسرع وأوضح. 3. اهتم بصحتك: عشان مخك يشتغل كويس، لازم جسمك يكون مرتاح. تغذية متوازنة: ما تكتر من الأكل الدسم عند الفطور عشان ما تحس بالخمول. مارس رياضة خفيفة: حتى لو مشي بسيط بعد الفطور… بتحسن تركيزك ومزاجك. اشرب موية كفاية: الجفاف بيأثر على قدرتك على الاستيعاب، فوزع شرب الماء بين الإفطار والسحور. 4. نية صافية = بركة في الوقت: واتذكرت قصه حلوة خلاص 😍 زمان كان في رجلين واحد منهم صوام وقوام وبيعمل الطاعات والنوافل والتاني زول عادي بس بيصلي صلواته الخمس وبيصوم العليه فسبحان الله زولنا الصوام دا إتستشهد وبعد سنه إستشهد الزول العادي .ف جات رؤيا لواحد من الصحابة أنهم الاثنين واقفين على باب الجنه وقالوا للزول العادي ادخل انت أول هنا الصحابه إستغربوا وسألوا الرسول صلى الله عليه وسلم ليه حصل كد؟ فقال ليهم انو الزول العادي دا أدرك رمضان وصلى وقام وصام؟ ، فقالوا نعم رد عليهم النبي صلوات ربي وسلامه عليه أنو بينو وبين الصوام داك بعد المشرق والمغرب طب ليه!.. لان رمضان فرصه عظيمه للعبادات وزي ماهو كدا أجعله فرصه عظيمه للدراسه ، صح انت ممكن تكون مابديت لسه والناس سبقتك ورمضان زي ما خلى الزول العادي دا يسبق الصوام ممكن يكون فرصتك في إنك تخلص كل الفاتك مع انك بديت متأخر فاصنع من المحنه منحه! _خلي نيتك في المذاكرة خالصة لوجه الله… إنك تتعلم وتفيد نفسك وأهلك ووطنك. لما تربط مجهودك بالعبادة، حتلقى إن البركة في وقتك وتركيزك بتزيد بطريقة عجيبة. 5. تجنب المشتتات: أقفل إشعارات الموبايل أثناء المذاكرة. حدد وقت معين لوسائل التواصل الاجتماعي. والافضل تتلغي كلو كلو. _اختار مكان هادئ ومريح عشان تركيزك يكون في أعلى مستوى. 6. العبادة تعطيك طاقة: اوعك تخلي الصلاة عشان المذاكرة… الصلاة بتريحك وبتزيد تركيزك. _اقرأ ولو آية من القرآن كل ما حسيت بالتعب… حتلقى راحة ما بتتوصف. _ادعي الله يوفقك… "اللهم لا سهل إلا ما جعلته سهلاً." 7. خليك مرن: لو لقيت نفسك ما قدرت تنجز كل خطتك، ما تحبط… راجع خطتك وعدّلها حسب ظروفك. الأهم الاستمرارية. وأخيرًا… ثق بنفسك! أنت بتقدر… وعندك القدرة توفق بين العبادة والمذاكرة. رمضان فرصة ذهبية… فاستغلها أحسن استغلال! وبكدا بنكون خلصنا اسبوع الدراسة في رمضان. وان شاء الله تكونوا استفدتوا معانا . وبالتوفيق للجميع. 💛 ورمضان مبارك عليكم مقدماً. #مريم_هشام💛 #تيم_الدعم_النفسي #مبادرة_نحن_معاك💙