*جاہل کے برتاؤ پر صبر* بہت سے لائق و فائق ائمہ مساجد، اپنی جاہل کمیٹی کے رویے سے پریشان رہتے ہیں، اور بہت سے مدرسین جاہل انتظامیہ کی روک ٹوک اور بے جا دخل اندازی پر نالاں رہتے ہیں ۔ اس کے سوا کوئی اور چارہ کا بھی نہیں ملتا ۔ سوال پیدا ہوتا ہے کہ آخر وہ ایسا کیوں کرتے ہیں، کاش خادمانِ دنیا، خادمانِ دین کے مقام و مرتبے کا خیال رکھتے ۔ تو اس کا جواب ہمیں امام ذہبی کے ارشاد میں مل جاتا ہے، جو انھوں نے فرمایا: *’’وَلٰکِنَّ الجَاهِلَ ‌لَا ‌يَعلَمُ رُتْبَةَ نَفْسِه فَكَيْفَ يَعْرِفُ رُتْبَةَ غَيْرِهِ؟!!‘‘* اور جاہل کو تو خود اپنا مقام و مرتبہ معلوم نہیں ہوتا، وہ کسی دوسرے کے مقام ومرتبہ کو کیا جاننے لگا؟!! (سیر اعلام النبلاء: 11/ 321) سچ فرمایا امام ذہبی نے ۔ فارسی کا ایک مقولہ بھی ہے؛ قدر زر زرگر بداند، یا بداند جوہری [سونے کی قدر وقیمت یاتو سونار جانتا ہے ، یا جوہری۔ ] عربی کا ایک مقولہ ہے : الناس أعداء لما جھلوا [لوگ اس کے دشمن ہوتے، جسے وہ نہیں جانتے ] اے گروہ علما، اے خادمانِ دین، اللہ تمہارا حامی و ناصر ہو، صبر و تحمل کے ساتھ دین کے کاموں میں لگے رہے، اور حالات دیکھ کر بد دل اور پریشان نہ ہوجاؤ، یقیناً عند اللہ تمہارا بڑا مقام ہے ۔ اس سے واقف جو ہے وہی جوہری ہے ۔ محبت کرنے والوں کی محبتوں کو سامنے رکھو، اور جاہل نادانوں کے ترش و تلخ رویے پر صبر کرتے ہوئے اپنا مشن جاری رکھو!