Hazrat Maulana Ahmad Ali Lahori ki qeemati naseehat Ek mauqa par Sheikh-ul-Islam wal-Tafseer, Imam-ul-Awliya Hazrat Maulana Ahmad Ali Lahori Rahimahullah ne Hazrat Jee Maulana Muhammad Yusuf Sahab Rahimahullah ko naseehat karte hue farmaya: "Ek baat yaad rakhain ke kisi Haq-parast jamaat ka Baatil-parasti ki taraf pehla qadam yeh hota hai ke woh yeh samajhne lag jaye ke hamare siwa doosri koi deeni jamaat Haq par nahi hai, aur hamari jamaat ki baqa doosron ki fana hi ki soorat mein ho sakti hai. Dekhna! Aap ki jamaat mein kahin yeh ehsas o ta'assur paida na ho jaye. Hum to har aan aap hazraat ke liye duaa karte hain ke Allah Ta'ala Maulana Muhammad Ilyas Sahab ke is gulshan-e-tableegh ko hamesha hamesha sar-sabz o shaadaab rakhe." 📖 (Sheikh-ul-Hadees Number, bihawala Hasan Tadbeer, February 2012)