*संघटित समाजच प्रगतीचा मार्ग!* ✍🏻 प्रवीण दीपक जामनिक *अकोला जिल्ह्यातील बार्शीटाकळी येथे निर्माण होत असलेले संघटन खऱ्या अर्थाने डॉ. बाबासाहेब आंबेडकर यांना त्यांच्या पश्चात अपेक्षित असलेले कार्य आहे.* हे संघटन समाजाच्या मूलभूत गरजा आणि समस्यांवर तोडगा काढण्यासाठी व त्यावर उपाययोजना करण्यासाठी कार्यरत आहे. आज आपल्या समाजाची स्थिती पाहिली तर ती अतिशय हलाखीची वाटते. *(फक्त दोन वेळचं जेवण आणि अंगावर कपडे असणं म्हणजे प्रगती नव्हे.)* जर आपण समाजाच्या कार्याच्या दर्जाचे निरीक्षण केले, तर असे लक्षात येईल की आजही आपण पूर्वीप्रमाणेच चतुर्थ व पंचम श्रेणीतीलच कामे करत आहोत. मग प्रश्न असा पडतो, *डॉ. बाबासाहेब आंबेडकरांनी जागतिक पातळीवर परिवर्तन घडवून आणणारी एवढी मोठी क्रांती केल्यानंतरही आपण आज अशा परिस्थितीत का आहोत?* याचे उत्तर स्पष्ट आहे – आपण बाबासाहेबांच्या विचारांवर कार्य करण्याऐवजी त्यांच्या नावाचा केवळ उदो-उदो करत राहिलो आहोत. खऱ्या अर्थाने समाजाला सर्वांगीण प्रगती साधायची असेल, तर *डॉ. बाबासाहेब आंबेडकर यांच्या विचारधनावर कार्य करणे अत्यंत गरजेचे आहे.* ही काळाची आणि समाजाचीही गरज बनली आहे. त्यासाठी *समाजाने सर्वप्रथम संघटित होणे आवश्यक आहे.* जोपर्यंत समाज एकत्र येणार नाही, वारंवार भेटणार नाही, तोपर्यंत कार्याची सुरुवात होणे कठीण आहे. त्यामुळे *हेवे-दावे आणि परस्परांतील कटुता सोडून संघटित होणे आवश्यक आहे.* समाजहितासाठी कधीकधी दोन पावले मागे घेण्याची भूमिका घ्यावी लागते, तेव्हाच संघटन निर्माण होऊ शकते आणि टिकू शकते. संघटन निर्माण करून समाजाच्या मूलभूत गरजांवर कार्य करणे गरजेचे आहे. *जसे एक मजबूत इमारत बांधण्यासाठी आधी जमीन समतल करावी लागते, तसेच समाजाची प्रगती घडवायची असेल, तर त्या समाजाच्या मूलभूत व पायाभूत समस्यांवर कार्य करणे अत्यंत आवश्यक आहे.* याच विचाराने *अकोला जिल्ह्यातील बार्शीटाकळी शहरातील बौद्ध लोकांनी बौद्ध समाजाचे संघटन निर्माण करून, समाजाच्या मूलभूत गरजा आणि समस्यांवर कार्य करण्याचा निर्धार केला आहे.* त्यामुळे समाज सशक्त होईल आणि सर्वांगीण प्रगती साधू शकेल. *म्हणूनच, मी सर्वांना नम्र आवाहन करतो की या समाज उत्कर्षाच्या कार्यात सहभागी व्हा.* आज आपण कार्यरत झालो, तर येणारी दुसरी-तिसरी पिढी त्याचे फलित अनुभवू शकेल. अन्यथा, भविष्यातील पिढ्यांवर मानसिक, आर्थिक आणि सामाजिक गुलामगिरी लादली जाईल, आणि आपण त्यास जबाबदार राहू. -- *प्रवीण दीपक जामनिक* 📱 7447755627 (संचालक *प्रबुद्ध टिव्ही,* 1 लाख 65 हजार सबस्क्राईबर)