کراچی: شہر میں ہیوی ٹریفک جلائے جانے کے واقعات کے خلاف ٹرانسپورٹرز احتجاج پر اتر آئے۔ تفصیلات کے مطابق ٹرانسپورٹرز نے احتجاج کرتے ہوئے شہر کے داخلی راستے بند کردیے جس کے باعث مین نیشنل ہائی وے پورٹ قاسم، حب چوکی اور ناردن بائی پاس کے مقام پر سڑک بند کردی گئی ہے۔ ٹرانسپورٹرز کے احتجاج کے باعث مرکزی شاہراہ بند ہونے سے دیگر شہروں سے کراچی آنے والوں کو مشکلات کا سامنا ہے۔ دوسری جانب وزیر داخلہ سندھ ضیاءالحسن لنجار نے ایڈیشنل آئی جی کو گاڑیاں نذر آتش کرنے کے واقعات کی تحقیقات کرنے کا حکم دیا اور کہا کہ کسی کو قانون ہاتھ میں لینے کی اجازت نہیں دی جائے گی، حکومت ٹریفک حادثات پر قابو پانے کے لیے اقدامات کررہی ہے۔