۲۰/۸/۱۴۴۶ د ننګرهار پوهنتون مرکزي کتابتون سره د ۶۲۱ ټوکه کتابونو مرسته وشوه. د ننګرهار پوهنتون د طب پوهنځي د پوهنتون مرکزي کتابتون ته ۶۲۱ ټوکه کتابونه ډالۍ کړل، چې دا د ۸۳ استادانو او علمي کادر غړو د تالیفي اثارو مجموعه ده. په همدې موخه د پوهنتون د څېړنو او علمي مجلو مرستیال په حضور کې د کتابونو سپارلو ځانګړې ناسته ترسره شوه. د ننګرهار پوهنتون د طب پوهنځي رئیس، پوهنوال ډاکتر محمد عظیم عظیمي وویل چې دا کتابونه د استادانو د کلونو اکاډمیکو هڅو پایله ده، چې به د محصلینو او استادانو علمي او تدریسي بهیر پیاوړی کړي. نوموړي ژمنه وکړه، چې د طب پوهنځي استادان به د علمي اثارو د تالیف او چاپ په برخه کې خپلې هڅې جاري وساتي. د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار وویل چې دا مرسته به نه یوازې د استادانو او محصلینو لپاره ګټوره وي؛ بلکې د پوهنتون څېړنیز حیثیت به هم پیاوړی کړي. مرسته شوي کتابونه د پوهنتون د څېړنو معاونیت او د طب پوهنځي مسئولینو له لوري د کتابتون امریت ته وسپارل شول، ترڅو محصلین او استادان ورڅخه ګټه واخلي. -