*Zobánay Arzeshtay Bábatá Do Dánk* Nebeshtakár: _Hammal Nur_ Marchi máti zobánay róch ent. Mani delá lóthet ke man chizzé nebeshtah bekanán. Drostán pésh man zobánay arzeshtay bábatá kammé gapp janán. Balóchi zobán donyáay kwahnterén zobánán yakké. Balóchi hazgárén zobáné, eshiay tahá tará sakk báz labz dast kapit. Zobánay masterén chizz áiay labz o rahband ant, bale maróchi bazhni gapp esh ent ke may padréch wati zobánay géshterén labzán nazánt. Degeray goshagá pésar man wati gappá kanán ke man daninga Balóchiay géshterén labzán nazánán. Bándá róch may pirén mardom sará ér bekanant, zobán may amánat ent. Má daninga áiay labzán nazánén. Sakkén bazhni gappé. Padá may passaw hamé bit ke márá wánagjáhán wati zobán wánénag nabit. Hamáyán ke gón wati zobáná mehr hast, áyán wati zobán dar bortag. Tará watá Balóchi ketáb wánagi ent. Ensán harchi bolóthit, hamá chizzá dar bort kant. Bass do chizz ensánay tahá bayag lóthit, yakké erádah o domi johd. Taw Balóchi dar barag bolóthay, dar bort kanay, bass hobb o wáhag bebit. Agan tai kerrá cha Sokrát o Aplátuná dosari géshter elm bebit bale taw wati máti zobáná mazánay, taw zántkáré naay. Cha taw yakk shepánké sharter ent ke wati máti zobáná zánt. Zobánay tahá labzánk mazanén arzshté dárit. Sháeri bebit yá ke ázmánkári o gedárnawisi drost arzesht dárant bale may mardom géshter sháeri kanant. May labzánkay bonyád sháeri ent. Gwánzagá beger dán kabrá, Balóchá sháeri gón ent. Chokké ke pédág bit, sepat o názénk janant. Yakké ke merit, mótk janant. Má báyad ent wati zobánzánt o labzánki mardom yá sáz o zémeray mardománi kadrá bekanén ke may zobánay maddhi ant. Goshendah bebant yá sháer yá támorsách, har mardomé ke wati zobánay wástá johd kanagá ent, márá áyáni kadr kanag lóthit. Zobánay masterén arzesht hamesh ent ke tai hastiay bonyád ent. Zobán hast ent, taw hast ay, tai ráj hast ent. Zobán donyáay démá tai pajjárá kant ke taw Baóché ay. Donyáay dege zobánzánt o zántkár may zobánay kadrá zánant, bale má wati zobánay kadrá nazánén. Má gón wati zobáná náensápi kanén. Yakk mesálé dayán. Agán má darmolká rawén, gón óday mardomán hamáyáni zobáná habar kanán bale agan dhanni mardomé may molká kayt, má gón áiá hamáiay jenday zobáná habar kanén. Báyad ent á ke may molká atkag, má gón áiá wati zobáná habar bekanén. Godhsará man wati gappán gón yakk kessahéá ásar kanán. Yakk bachakké dege molkéá rawt o hamángor gár bit. Si sálá rand molki mardomé gón áiá dhikk dant. Bachakk wati kessahán kárit ke man pelániay chokk án, chó chó gár bitagán o é molká atkagán. Wahdé molki mardom wati molká wátarr bit godhá bachakkay mátay kerrá rawt o mátá hál dant ke byá man tai chokk pelán molká distag. Mát bazzag gal bit o chokkay bárawá hirt hirtá jost kant. Godhsará hamé jostá kant ke mani chokká gón taw kojám zobáná gapp kotag? Mard goshit ke áiá hamá molkay zobáná gapp kotag parcháke may zobány béhál kotag. Godhá mát hamé goshit ke é mani chokk naent chiáke eshiá wati máti zobán béhál kotag.