✝️🙏🏼✝️🙏🏼✝️🙏🏼✝️ *ಸೊಮಿಯಾಚಿ ತೆಂಪ್ಲಾಂತ್ ಭೆಟೊವ್ಣಿ / ಭಾಗೆವಂತ್ ಕುಟ್ಮಾಕ್ ಸಮರ್ಪಿಲ್ಲೊ ಮಹಿನೊ* Sunday, February 2nd 2025 ಸೊಮಿಯಾಚಿ ತೆಂಪ್ಲಾಂತ್ ಭೆಟೊವ್ಣಿ (ಸಾದ್ಯಾ ಕಾಳಾಚೊ ಚವ್ತೊ ಅಯ್ತಾರ್ ) *ಪಯ್ಲೆಂ ವಾಚಪ್* ಮಾಲಖಿ 3: 1-4 ಸರ್ವೆಸ್ಪರ್ ದೇವ್ ಅಶೆಂ ಸಾಂಗ್ತಾ, ಮ್ಹಾಕಾ ಏಕ್ ವಾಟ್ ತಯಾರ್ ಕರುಂಕ್ ಹಾಂವ್ ಮ್ಹಜ್ಯಾ ದುತಾಕ್ ಧಾಡ್ತಲೊಂ. ಆನಿ ತುಮಿ ಸೊದ್ತಾತ್ ತೊ ಸೊಮಿ ಆವ್ಚಿತ್ ಆಪ್ಲ್ಯಾ ಮಂದಿರಾಂತ್ ಯೆತಲೊ; ತುಮಿ ಅತ್ರೆಗ್ತಾತ್ ತೊ ಕರಾರಾಚೊ ದೂತ್ ಯೆತಲೊ, ಮ್ಹಣ್ತಾ ದಳ್ಬಾರಾಂಚೊ ಸರ್ವೆಸ್ಪರ್.ತಾಚ್ಯಾ ಯೆಣ್ಯಾಚ್ಯಾ ದಿಸಾಕ್ ಕೋಣ್ ವಿರೋಧ್ ಕರುಂಕ್ ಸಕತ್? ತೊ ಪ್ರತ್ಯಕ್ಷ್ ಜಾತಾನಾ ಕೊಣಾಚ್ಯಾನ್ ಉಬೊ ರಾವುಂಕ್ ಜಾಯ್ತ್? ಕಿತ್ಯಾಕ್ ತೊ ಸೊನಾರಾಚ್ಯಾ ಉಜ್ಯಾ ಸಾರ್ಕೊ, ಧೊಬಿಯಾಚ್ಯಾ ಖಾರಾ ಸಾರ್ಕೊ. ರುಪೆಂ ನಿತಳ್ ಆನಿ ನಿರ್ಮಳ್ ಕರ್ತಲ್ಯಾ ಸೊನಾರಾ ಭಾಶೆನ್ ತೊ ಆಪ್ಲ್ಯಾ ಆಸನಾರ್ ಬಸ್ತಲೊ; ಲೆವಿಚ್ಯಾ ಪುತಾಂಕ್ ತೊ ನಿತಳ್ ಕರ್ತಲೊ, ರುಪ್ಯಾ ಆನಿ ಭಾಂಗಾರಾಪರಿಂ ತೊ ತಾಂಕಾಂ ನಿರ್ಮಳ್ ಕರ್ತಲೊ; ತೆದ್ನಾ ಪ್ರಾಮಾಣಿಕ್ಪಣಿಂ ಸರ್ವೆಸ್ಪರಾಕ್ ಭೆಟೊವ್ಣ್ಯೊ ಕರುಂಕ್ ತಾಂಚ್ಯಾನ್ ಜಾತಲೆಂ. ಜಶೆಂ ಆದ್ಲ್ಯಾ ಕಾಳಾರ್, ಪುರ್ವಿಲ್ಯಾ ವರ್ಸಾಂನಿ, ಜುದಾಚ್ಯೊ ಆನಿ ಜೆರುಸಾಲೆಮಾಚ್ಯೊ ಭೆಟೊವ್ಣ್ಯೊ ಸರ್ವೆಸ್ಪರಾಕ್ ಮಾಂದ್ತಾಲ್ಯೊ, ತಶೆಂ ಆತಾಂ ತ್ಯೊ ತಾಕಾ ಮಾಂದ್ತೆಲ್ಯೊ. - *ದೆವಾಚೆಂ ಉತರ್ ಹೆಂ* -ದೆವಾಚೊ ವ್ಹಡ್ ಉಪ್ಕಾರ್ 🌷🌷🌷🌷🌷🌷🌷🌷 *ಕೀರ್ತನ್* 24: 7-10 *ಶ್ಲೋಕ್: ಕೊಣ್ ತೊ ಮಹಿಮೆವಂತ್ ರಾಜಾ? ಸರ್ವೆಸ್ಪರ್ ಸೊಮಿ ತೊ!* 1. ಉಬಾರಾ ತುಮ್ಚೆ ದಾರ್ವಂತ್, ತುಮಿ ದಾರ್ವಾಟ್ಯಾಂನೊ,ಮಿಟ್ವುನ್ ಧರಾ ತುಮ್ಚಿಂ ಬಾಗ್ಲಾಂ, ತುಮಿ ಪ್ರಾಚೀನ್ ದಾರಾಂನೊ,ಮ್ಹಯ್ಮೆವಂತ್ ರಾಜಾ ತಾಂತ್ಲ್ಯಾನ್ ಭಿತರ್ ಸರೊಂ *ಶ್ಲೋಕ್: ಕೊಣ್ ತೊ ಮಹಿಮೆವಂತ್ ರಾಜಾ? ಸರ್ವೆಸ್ಪರ್ ಸೊಮಿ ತೊ!* 2. ಕೋಣ್ ತೊ ಮ್ಹಯ್ಮೆವಂತ್ ರಾಜಾ?ತೊಚ್ ಸರ್ವೆಸ್ಪರ್, ಬಳಿಶ್ಟ್ ಆನಿ ಧಯ್ರಾಧಿಕ್ ಝಜಾಂನಿ ಜಯ್ತೆವಂತ್ ಸರ್ವೆಸ್ಪರ್ ತೊ! *ಶ್ಲೋಕ್: ಕೊಣ್ ತೊ ಮಹಿಮೆವಂತ್ ರಾಜಾ? ಸರ್ವೆಸ್ಪರ್ ಸೊಮಿ ತೊ!* 3. ಉಬಾರಾ ತುಮ್ಚೆ ದಾರ್ವಂತ್, ತುಮಿ ದಾರ್ವಾಟ್ಯಾಂನೊ,ಮಿಟ್ವುನ್ ಧರಾ ತುಮ್ಚಿಂ ಬಾಗ್ಲಾಂ, ತುಮಿ ಪ್ರಾಚೀನ್ ದಾರಾಂನೊ,ಮ್ಹಯ್ಮೆವಂತ್ ರಾಜಾ ತಾಂತ್ಲ್ಯಾನ್ ಭಿತರ್ ಸರೊಂ *ಶ್ಲೋಕ್: ಕೊಣ್ ತೊ ಮಹಿಮೆವಂತ್ ರಾಜಾ? ಸರ್ವೆಸ್ಪರ್ ಸೊಮಿ ತೊ!* 4. ಕೋಣ್ ತೊ ಮ್ಹಯ್ಮೆವಂತ್ ರಾಜಾ?ತೊಚ್ ತೊ ದಳ್ಬಾರಾಂಚೊ ಸರ್ವೆಸ್ಪರ್, ತೊಚ್ ತೊ ಮ್ಹಯ್ಮೆವಂತ್ ರಾಜಾ *ಶ್ಲೋಕ್: ಕೊಣ್ ತೊ ಮಹಿಮೆವಂತ್ ರಾಜಾ? ಸರ್ವೆಸ್ಪರ್ ಸೊಮಿ ತೊ!* 🌸🌸🌸🌸🌸🌸🌸🌸 *ದುಸ್ರೆಂ ವಾಚಪ್* ಹೆಬ್ರೆವ್ 2: 14-18 ಆನಿ ಆತಾಂ, ಭುರ್ಗಿಂ ರಗ್ತಾಮಾಸಾಚ್ಯಾ ಸಂಯ್ಭಾಚಿಂ ಜಾವ್ನಾಸ್ತಾಂ, ಜೆಜುಯೀ ಹ್ಯಾ ಮನ್ಶಾಸಂಯ್ಭಾಚೊ ವಾಂಟೆಲಿ ಜಾಲೊ. ಹಾಚೇ ವರ್ವಿಂ ಮೊರ್ನಾಚೆರ್ ಪದ್ವಿ ಚಲಯ್ತಲ್ಯಾ ಸೈತಾನಾಕ್ ಆಪ್ಲ್ಯಾ ಮೊರ್ನಾನ್ ತಾಣೆ ಪಾಡಾವ್ ಕೆಲೊ. ಅಶೆಂ ಮೊರ್ನಾಚೇ ಭಿರಾಂತಿನ್ ಆಪ್ಲಿ ಸಗ್ಳಿ ಜಿಣಿಭರ್ ಗುಲಾಮ್‍ಪಣಾಂತ್ ಜಿಯೆತಲ್ಯಾಂಕ್ ತಾಣೆಂ ಸುಟ್ಕಾ ಜೊಡ್ನ್ ದಿಲಿ. ದೆಕುನ್ ದೇವ್‍ದುತಾಂಕ್ ಆಧಾರ್ ದಿಂವ್ಕ್ ಮ್ಹಣ್ ತೊ ಯೆಂವ್ಕ್ ನಾ, ತೊ ಆಯ್‍ಲ್ಲೊ ಆಬ್ರಾಹಾಮಾಚೇ ಸಂತತೆಚ್ಯಾಂಕ್ ಆಧಾರ್ ದಿಂವ್ಕ್. ತಶೆಂ ಜಾಲ್ಲ್ಯಾನ್ ಸಕ್ಟಾಂತ್ ತಾಣೆ ಆಪ್ಲ್ಯಾ ಭಾವಾಂಬರಿ ಜಾವ್ಚಿ ಗರ್ಜ್ ಪಡ್ಲಿ. ಹಾಚೇ ವರ್ವಿಂ ಲೊಕಾನ್ ಪಾತ್ಕಾಂಚೆಂ ಭೊಗ್ಸಣೆ ಜೊಡ್ಚೇ ಖಾತಿರ್ ದೆವಾಚೆ ಸೆವೆಂತ್ ಕಾಕುಳ್ತಿವಂತ್ ಆನಿ ವಿಶ್ವಾಸಿ ಶ್ರೇಷ್ಠ್ ಯಾಜಕ್ ತೊ ಜಾಂವ್ಕ್ ಪಾವ್ಲೊ. ತಾಣೆ ಸೊಸ್‍ಲ್ಲ್ಯಾ ಕಷ್ಟಾಂ ವರ್ವಿಂ ದೆವಾನ್ ತಾಕಾ ಪಯ್ಲೆಂಚ್ ಪಾರ್ಕಿಲೊ ದೆಕುನ್ ಆತಾಂ ತಾಳ್ನೆಂತ್ ಸಾಂಪಡ್ಲಲ್ಯಾಂಕ್ ಆಧಾರ್ ದಿಂವ್ಕ್ ತೊ ಸಕ್ತಾ.- *ದೆವಾಚೆಂ ಉತರ್ ಹೆಂ* -ದೆವಾಚೊ ವ್ಹಡ್ ಉಪ್ಕಾರ್ 🪷🪷🪷🪷🪷🪷🪷🪷 *ಉದ್ಗಾರ್* ( ಲೂಕ್ 2:32) *ಅಲ್ಲೆಲೂಯಾ! ಅಲ್ಲೆಲೂಯಾ!* ದಿವೊ ಅನ್ಭಾವಾಡ್ತ್ಯಾಂಕ್ ಉಜ್ವಾಡ್ ದಿವ್ಪಿ ಆನಿ ಮ್ಹಯ್ಮಾ ತುಜ್ಯೆ ಪರ್ಜೆ ಇಸ್ರಾಯೆಲಾಚಿ. *ಅಲ್ಲೆಲೂಯಾ!* 💐💐💐💐💐💐💐💐 *ಶುಭ್‍ವಾರ್ತಾ* ಲೂಕ್ 2: 22-40 ಮೊಯ್ಜೆಚ್ಯಾ ನಿಯಮ್‍ಶಾಸ್ತ್ರಾ ಪ್ರಕಾರ್ ತಿಚ್ಯಾ ಅಶುದ್ಧ್‌ಪಣಾಚೆ ದೀಸ್ ಕಾಬಾರ್ ಜಾವ್ನ್, ತಿಣೆ ನಿತಳ್ ಜಾಂವ್ಚೊ ದೀಸ್ ಆಯ್ಲೊ. ದೆಕುನ್ ತಾಣಿಂ ಬಾಳ್ಕಾಕ್ ಜೆರುಜಲೆಮಾಕ್ ಹಾಡ್ಲೊ. “ಪ್ರಥಮ್ ಜಲ್ಮಲ್ಲೊ ಹರ್ಯೇಕ್ ಚೆರ್ಕೊ ಭುರ್ಗೊ ಸರ್ವೆಸ್ಪರಾಕ್ ಸಮರ್ಪುಂಕ್ ಜಾಯ್.” ಅಶೆಂ ಸರ್ವೆಸ್ಪರಾಚ್ಯಾ ಶಾಸ್ತ್ರಾಂತ್ ಬರೊವ್ನ್ ಆಸ್ಲಲ್ಯಾ ಕಾಯ್ದ್ಯಾ ಪ್ರಕಾರ್, ತ್ಯಾ ಬಾಳ್ಕಾಕ್ ತಾಣಿಂ ದೆವಾಕ್ ಭೆಟೊಂವ್ಕ್ ಜಾಯ್ ಆಸ್ಲೊ. ತ್ಯಾ ಶಿವಾಯ್, ಸರ್ವೆಸ್ಪರಾಚ್ಯಾ ಶಾಸ್ತ್ರಾಂತ್‍ಚ್ ಫರ್ಮಾಯ್ಲಲ್ಯಾ ಪರ್ಮಾಣೆ ಏಕ್ ಜೋಡ್ ಕೊವ್ಡೆ, ನಾ ಜಾಲ್ಯಾರ್ ದೋನ್ ಪಾರ್ವ್ಯಾ ಪಿಲಾಂ ತಾಣಿಂ ಬಲಿದಾನ್ ಭೆಟೊಂವ್ಕ್ ಜಾಯ್ ಆಸ್ಲಿಂ.ತ್ಯಾ ವೆಳಾರ್ ಸಿಮಿಯಾಂವ್ ನಾಂವಾಚೊ ಏಕ್ ಮನಿಸ್ ಜೆರುಜಲೆಮಾಂತ್ ಜಿಯೆತಾಲೊ. ನಿತಿವಂತ್ ಆನಿ ದೇವ್‍ಭಿರಾಂತಿಚೊ ಮನಿಸ್ ತೊ; ಇಸ್ರಾಯೆಲಾಚೇ ಉದರ್ಗತೆಚಿ ವಾಟ್ ತೊ ಪಳೆವ್ನ್ ಆಸ್ಲೊ. ಆನಿ ತಾಚೇ ಥಂಯ್ ಪವಿತ್ರ್ ಅತ್ಮೊ ಆಸ್ಲೊ. ಸರ್ವೆಸ್ಪರಾಚ್ಯಾ ಕ್ರಿಸ್ತಾಕ್ ಪಳೆಲ್ಲೇ ಖರಿತ್ ತೊ ಮರ್ಚೊನಾ ಮ್ಹಣುನ್ ಪವಿತ್ರ್ ಅತ್ಮ್ಯಾನ್ ತಾಕಾ ಕಳಿತ್ ಕೆಲ್ಲೆಂ. ಆನಿ ತ್ಯಾಚ್ ಪವಿತ್ರ್ ಅತ್ಮ್ಯಾಚ್ಯಾ ಪ್ರೇರಣಾಖಾಲ್ ತೊ ದೆವಾಳಾಕ್ ಆಯ್ಲಲೊ. ನಿಯಮ್‍ಶಾಸ್ತ್ರಾಚಿ ರೀತ್ ಪಾಳುಂಕ್ ಜೆಜು ಬಾಳ್ಕಾಕ್ ತಾಚಿಂ ಮಾಂಯ್‍ಬಾಪ್ ಭಿತರ್ ಹಾಡ್ನ್ ಆಯ್ಲಲ್ಯಾ ವೆಳಾರ್, ಸಿಮಿಯಾಂವ್ನ್ ತ್ಯಾ ಬಾಳ್ಕಾಕ್ ಹಾತಾಂತ್ ಘೆತ್ಲೊ ಆನಿ ದೆವಾಚಿ ಸ್ತುತಿ ಗಾವ್ನ್ ತೊ ಮ್ಹಣಾಲಾಗ್ಲೊ: “ಸರ್ವೆಸ್ಪರಾ, ಆತಾಂ ಜಾಲ್ಯಾರ್ ತುಜ್ಯಾ ಚಾಕ್ರಾಕ್ ಸಮಾಧಾನಾನ್ ವಚುಂಕ್ ದಿ. ಕಿತ್ಯಾಕ್ ತುಜಿ ಭಾಸಾವ್ಣಿ ತುವೆಂ ಪಾಳ್ಳಿಯ್. ಮ್ಹಜ್ಯಾಚ್ ದೊಳ್ಯಾಂನಿ ತುಜಿ ಸೊಡ್ವಣ್ ಹಾಂವೆಂ ದೆಖ್ಲಿ. ಸರ್ವ್ ಪರ್ಜಾಂ ಮುಖಾರ್ ತುವೆಂ ತಯಾರ್ ಕೆಲ್ಲಿ; ದಿವೊ ಅನ್ಭಾವಾರ್ಥ್ಯಾಂಕ್ ಉಜ್ವಾಡ್ ದಿವ್ಪಿ ಆನಿ ಮಹಿಮಾ ತುಜೇ ಪರ್ಜೇ ಇಸ್ರಾಯೆಲಾಚಿ.” ಸಿಮಿಯಾಂವ್ನ್ ಬಾಳ್ಕಾ ವಿಶ್ಯಾಂತ್ ಸಾಂಗ್ಲಲ್ಯೊ ಸಂಗ್ತಿ ಆಯ್ಕುನ್, ತಾಚಿಂ ಆವಯ್ ಬಾಪುಯ್ ವಿಜ್ಮಿತ್ ಜಾಲಿಂ. ತವಳ್ ಸಿಮಿಯಾಂವ್ನ್ ತಾಂಕಾಂ ಆಶೀರ್ವಾದ್ ದಿಲೊ ಆನಿ ತಾಚೇ ಆವಯ್ಕ್ ಮರಿಯೆಕ್ ತಾಣೆ ಮ್ಹಳೆಂ: “ಪಳೆ, ದೆವಾನ್ ಹ್ಯಾ ಬಾಳ್ಕಾಕ್ ಮನ್ಶ್ಯಾಂನಿ ತಿರಸ್ಕಾರ್ ಕರ್ಚೊ ಏಕ್ ಗುರ್ತ್ ಕಸೊ ನೆಮ್ಲಾ. ಆನಿ ದೂಖ್ ಏಕ್ ಧಾರಿಚೇ ತಲ್ವಾರಿಬರಿ ತುಜೆಂಯೀ ಕಾಳಿಜ್ ಫಾಪ್ಸಿತಲೆಂ. ಹೊ ಬಾಳಕ್ ಇಸ್ರಾಯೆಲಾಂತ್ ಸಬಾರಾಂಕ್ ಪಡುಂಕ್ ಆನಿ ಸಬಾರಾಂಕ್ ಉಟೊಂಕ್ ಕಾರಣ್ ಜಾತಲೊ. ಹೇ ವರ್ವಿಂ ಸಬಾರಾಂಚ್ಯಾ ಅಂತಸ್ಕರ್ನಾಂತ್ಲಿಂ ಘುಟಾಚಿಂ ಚಿಂತ್ನಾಂ ಭಾಯ್ರ್ ಪಡ್ತಲಿಂ.”ಥಂಯ್ ಆನ್ನಾ ನಾಂವಾಚಿ ಏಕ್ ಪ್ರವಾದಿಣ್‍ಯೀ ಆಸ್ಲಿ. ತಿ ಅಶೇರ್ ಕುಳಿಯೆಚಿ, ಧುವ್ ಫಾನ್ವೆಲಿಚಿ; ತಿ ಆತಾಂ ಚಡ್ ಉತರ್ ಪ್ರಾಯೆಚಿ ಜಾಲ್ಲಿ. ಲಗ್ನ್ ಜಾವ್ನ್ ಸಾತ್ ವರ್ಸಾಂ ಆಪ್ಲ್ಯಾ ದಾದ್ಲ್ಯಾ ಸಂಗಿಂ ಜಿಯೆಲ್ಯಾ ಉಪ್ರಾಂತ್ ತಿ ವಿಧವ್ ಜಾಲಿ. ಆತಾಂ ತಿಕಾ ಚೊವ್ರಾಯ್ಶಿಂ ವರ್ಸಾಂ ಪ್ರಾಯ್. ದೆವಾಳ್ ಸೊಡ್ನ್ ತಿ ಭಾಯ್ರ್ ವಚಾನಾತ್ಲಿ; ದೀಸ್‍ರಾತ್ ಉಪಾಸ್ ಆನಿ ಮಾಗ್ಣೆಂ ಕರಿತ್ ದೆವಾಚಿ ತಿ ಸೆವಾ ಕರ್ತಾಲಿ.ತಿಯೀ ತ್ಯಾಚ್ ವೆಳಾರ್ ಥಂಯ್ ಪಾವುನ್ ದೆವಾಕ್ ಅರ್ಗಾಂ ದಿಂವ್ಕ್ ಲಾಗ್ಲಿ ಆನಿ ಜೆರುಜಲೆಮಾಚೇ ಸೊಡ್ವಣೆಚಿ ವಾಟ್ ಪಳೆವ್ನ್ ಆಸ್ಲಲ್ಯಾ ಸಮೆಸ್ತಾಂಲಾಗಿಂ ಬಾಳ್ಕಾ ವಿಶ್ಯಾಂತ್ ಉಲೊಂವ್ಕ್ ಲಾಗ್ಲಿ. ಸರ್ವೆಸ್ಪರಾಚ್ಯಾ ಶಾಸ್ತ್ರಾ ಪ್ರಕಾರ್ ಕರುಂಕ್ ಆಸ್ಲೆಂ ತೆಂ ಸಕ್ಕಡ್ ತಾಣಿಂ ಕರ್ನ್ ಜಾತಚ್, ಗಾಲಿಲೆಯಾಂತ್ಲ್ಯಾ ಆಪ್ಲ್ಯಾ ನಜರೆತ್ ಶಹರಾಕ್ ತಿಂ ಪಾಟಿಂ ಆಯ್ಲಿಂ. ಭುರ್ಗೊ ವಾಡೊನ್ ಯೆತಾಂ ಘಟ್‍ಮುಟ್ ಜಾಯ್ತ್ ಆಯ್ಲೊ ಆನಿ ಜಾಣ್ವಾಯೆನ್ ಭರ್ಲೊ. ಆನಿ ದೆವಾಚಿ ಮಜತ್ ತಾಚೆರ್ ಆಸ್ಲಿ.‍ *ಯಾಜಕ್: ದೆವಾಚೆಂ ಉತರ್ ಹೆಂ.* -ಲೋಕ್: ವಾಖಣ್ಣಿ ತುಕಾ, ಕ್ರಿಸ್ತಾ. 💐💐💐💐💐💐💐💐 Visit: `www.amchikonkani.com`