*ಸಾಂ ಮಾರ್ಕ್ ಪರ್ಮಾಣೆಂ ಜೆಜು ಕ್ರೀಸ್ತಾಚಿ ಸುವಾರ್ತಾ (5:21-43)* ಜೆಜು ಪರ್ತ್ಯಾನ್ ಮಚ್ವ್ಯಾರ್ ಚಡುನ್ ಸರೋವರಾಚೇ ಪೆಲೇ ತಡಿಕ್ ಉತರ್ಲಲ್ಯಾ ವೆಳಾರ್, ವ್ಹಡ್ ಏಕ್ ಲೊಕಾಜಮೊ ತಾಚೇ ಭೊಂವಾರಿಂ ಎಕ್ಟಾಂಯ್ ಜಾಲೊ. ತೊ ಸರೋವರಾಚೇ ತಡಿರ್ಚ್ ಆಸ್ತಾನಾ, ಸಿನಾಗೊಗಾಚ್ಯಾ ಅಧಿಕಾರ್ಯಾಂ ಪೈಕಿ ಎಕ್ಲೊ, ಜಾಯಿರ್ ನಾಂವಾಚೊ ಥಂಯ್ಚರ್ ಆಯ್ಲೊ. ಜೆಜುಕ್ ಪಳೆತಚ್ ತೊ ತಾಚ್ಯಾ ಪಾಂಯಾಂ ಪಡ್ಲೊ ಆನಿ ಹೇ ಪರಿಂ ಪರಾತುನ್ ಮ್ಹಣಾಲೊ: "ಮ್ಹಜಿ ಧುವ್ ಮೊರ್ನಾಚೇ ತಣಿರ್ ಪಾವ್ಲ್ಯಾ; ತುಂ ಯೇವ್ನ್ ತಿಚೆರ್ ತುಜೊ ಹಾತ್ ದವರ್; ತಶೆಂ ತಿ ಬರಿ ಜಾತಲಿ ಆನಿ ವಾಂಚ್ತಲಿ. " ಜೆಜು ತಾಚೇ ಸಾಂಗಾತಾ ಭಾಯ್ರ್ ಸರ್ನ್ ಗೆಲೊ. ಲೊಕಾಚೊ ವ್ಹಡ್ ಜಮೊ ತಾಚ್ಯಾ ಪಾಟ್ಲ್ಯಾನ್ ವೆತಾಲೊ ಆನಿ ತಾಕಾ ಆಡ್ಚಿತಾಲೊ. ಬಾರಾ ವರ್ಸಾಂ ಥಾವ್ನ್ ರಗ್ತಾಸ್ರಾವಾಚೇ ಪಿಡೆನ್ ಕಷ್ಟತಲಿ ಏಕ್ ಸ್ತ್ರೀ ಆಸ್ಲಿ. ಸಬಾರ್ ವಯ್ಜಾಂಚ್ಯಾ ಹಾತಾಂತ್ ಪಡುನ್ ತಿ ಕಷ್ಟಲ್ಲಿ ಆನಿ ಆಪ್ಲೆಂ ಆಸ್ಲ್ಲೆಂ ಸಳ್ಳೆಂ ತಿಣೆಂ ವಕ್ತಾಂಕ್ ಖರ್ಚಿಲ್ಲೆಂ, ತರ್ಯ್ ಕಾಂಯ್ ಪುಣ್ಯ್ ಬರೆಪಣ್ ಜೊಡ್ಚ್ಯಾ ಬದ್ಲಾಕ್ ತಿಣೆಂ ಪಿಡಾ ಚಡ್ಚ್ ಕರ್ನ್ ಘೆತ್ಲಲಿ. ತಿಣೆಂ ಜೆಜು ವಿಶ್ಯಾಂತ್ ಆಯ್ಕಲ್ಲೆಂ; ದೆಕುನ್ ಲೊಕಾಜಮ್ಯಾಂತ್ ರಿಗುನ್, ತಾಚ್ಯಾ ಪಾಟ್ಲ್ಯಾನ್ ತಿ ಗೇಲಿ ಆನಿ ತಾಚೆಂ ಅಂಗ್ ವಸ್ತುರ್ ಆಪಡ್ಲೆಂ. ಫಕತ್ ತಾಚೆಂ ಅಂಗ್ ವಸ್ತುರ್ ಆಪ್ಡಿನ್ ಜಾಲ್ಯಾರ್ ಹಾಂವ್ ಬರಿಂ ಜಾತಲಿಂ" ಮ್ಹಣ್ ತಿಣೆಂ ಚಿಂತ್ಲೆಂ. ತಕ್ಷಣ್ಚ್ ತಿಚಿ ರಗ್ತಾಚಿ ಝರ್ ಸುಕ್ಲಿ ಆನಿ ಆಪ್ಲಿ ಪಿಡಾ ಗೂಣ್ ಜಾಲಿ ಮ್ಹಣ್ ತಿಕಾ ಜಿವಾ ಭಿತರ್ ಭೊಗ್ಲೆಂ. ತೆದ್ವಾಂ ಜೆಜು ಆಪ್ಲ್ಯಾ ಭಿತರ್ಲಿ ಸಕತ್ ಭಾಯ್ರ್ ಗೆಲಿ ಮ್ಹಣ್ ಸಮ್ಜಲೊ ಆನಿ ಲೊಕಾ ಕುಶಿನ್ ಪಾಟಿಂ ಪರ್ತೊನ್, "ಮ್ಹಜ್ಯಾ ಅಂಗ್ ವಸ್ತ್ರಾಕ್ ಕೊಣೆಂ ಹಾತ್ ಲಾಯ್ಲೊ?" ಮ್ಹಣುನ್ ವಿಚಾರಿಲಾಗ್ಲೊ. ಶಿಸಾಂನಿ ಜಾಪ್ ದೀವ್ನ್ ಮ್ಹಳೆಂ: "ಲೋಕ್ ತುಜ್ಯಾ ಆಂಗಾರ್ ಪಡ್ತಾ ತೆಂ ತುಂ ಪಳೆತಾಯ್, ಆನಿ 'ಮ್ಹಾಕಾ ಕೊಣೆಂ ಹಾತ್ ಲಾಯ್ಲೊ?' ಮ್ಹಣ್ ತುಂ ವಿಚಾರ್ತಾಯ್? " ಪುಣ್ ಜೆಜು ಆಪ್ಣಾಕ್ ಕೊಣೆಂ ಹಾತ್ ಲಾಯ್ಲೊ ಮ್ಹಣ್ ಸೊಧುಂಕ್ ಹೆಣೆಂತೆಣೆಂ ಪಳೆತಲೊ. ತೆದ್ವಾಂ ಆಪ್ಣಾ ಥಂಯ್ ಕಿತೆಂ ಘಡ್ಲಾಂ ತೆಂ ಜಾಣಾ ಜಾವ್ನ್, ತಿ ಸ್ತ್ರೀ ಭಿಯಾನ್ ಆನಿ ಕಾಂಪೊನ್ ತಾಚೇ ಮುಖಾರ್ ಆಯ್ಲಿ ಆನಿ ಪಾಂಯಾಂ ಸರ್ಪಡ್ಲಿ ಆನಿ ಸಗ್ಳೆಂ ಸತ್ ಆಸಾ ತಶೆಂ ತಾಕಾ ಸಾಂಗಿಲಾಗ್ಲಿ. ತವಳ್ ಜೆಜು ತಿಕಾ ಮ್ಹಣಾಲೊ: "ಧುವೆ, ತುಜ್ಯಾ ಭಾವಾರ್ಥಾನ್ ತುಕಾ ಬರಿ ಕೆಲಿ. ಸಮಾಧಾನಾನ್ ವಚ್, ಆನಿ ತುಜೇ ಪಿಡೆಂತ್ಲಿ ತುಕಾ ಸುಟ್ಕಾ ಜಾಂವ್. " ತೊ ಅಶೆಂ ಉಲೊವ್ನ್ ಆಸ್ತಾನಾಚ್ ಸಿನಾಗೊಗ್ ಅಧಿಕಾರ್ಯಾಚ್ಯಾ ಘರಾ ಥಾವ್ನ್ ಜಣ್ ಯೇವ್ನ್ ಸಾಂಗಿಲಾಗ್ಲೆ: "ತುಜೇ ಧುವೆನ್ ಪ್ರಾಣ್ ಕೆಲೊ; ಆನಿಕ್ ಮೆಸ್ತ್ರಿಕ್ ಧೊಸ್ಚೊ ಕಿತ್ಯಾಕ್?" ಪುಣ್ ತಾಂಣಿಂ ಮ್ಹಳ್ಳೆಂ ತೆ ಗುಮಾನ್ ಕರಿನಾಸ್ತಾನಾ ಜೆಜುನ್ ಜಾಯಿರಾಕ್ ಸಾಂಗ್ಲೆಂ: "ತುಂ ಕಾಯ್ ಭಿಯೆನಾಕಾ; ತುವೆಂ ಸತ್ಮಾನ್ಲ್ಯಾರ್ ಮಾತ್ರ್ ಸಯ್. " ಉಪ್ರಾಂತ್ ಪೆದ್ರು, ಜಾಕೊಬ್ ಆನಿ ತಾಚೊ ಭಾವ್ ಜುವಾಂವ್, ಹ್ಯಾ ತೆಗಾಂಕ್ ಶಿವಾಯ್ ಹೆರ್ ಕೊಣಾಕ್ಯ್ ಆಪ್ಣಾ ಸಾಂಗಾತಾ ಯೆಂವ್ಕ್ ತಾಣೆಂ ಸೊಡ್ಲೆಂನಾ. ತೆ ಅಧಿಕಾರ್ಯಾಚ್ಯಾ ಘರಾ ಲಾಗ್ಸಾರ್ ಯೇವ್ನ್ ಪಾವ್ತಾನಾ, ಜೆಜುನ್ ಬೊಬಾಟ್, ವಿಳಾಪ್ ಆನಿ ರಡ್ಣೆಂ ಆಯ್ಕಲೆಂ. ತೊ ತ್ಯಾ ಘರಾ ಭಿತರ್ ಸರ್ಲೊ ಆನಿ ತಾಂಚೇಲಾಗಿಂ ಮ್ಹಣಾಲೊ: "ಕಿತ್ಯಾಕ್ ಹಿ ಘಡ್ಬಡಿ ಆನಿ ಹೆಂ ರಡ್ಣೆಂ? ಚಲಿ ಮರೊಂಕ್ ನಾ, ತಿ ನಿದ್ಲ್ಯಾ" ಹೆಂ ಆಯ್ಕುನ್ ತೆ ತಾಕಾ ಹಾಸುಂಕ್ ಲಾಗ್ಲೆ. ಪುಣ್ ತಾಣೆಂ ತಾಂಕಾಂ ಸಕ್ಡಾಂಕ್ ಭಾಯ್ರ್ ಕೆಲಿಂ. ಉಪ್ರಾಂತ್ ಚಲಿಯೆಚ್ಯಾ ಆವಯ್ ಬಾಪಾಯ್ಕ್ ಆನಿ ಆಪ್ಲ್ಯಾ ಸಾಂಗಾತ್ಯಾಂಕ್ ಘೆವ್ನ್, ಚಲಿಯೆಕ್ ನಿದಾಯ್ಲ್ಲೇಕಡೆನ್ ತೊ ಭಿತರ್ ಗೆಲೊ. ಚಲಿಯೆಚೊ ಹಾತ್ ಧರ್ನ್ ತಿಕಾ ತೊ ಮ್ಹಣಾಲೊ: "ತಾಲೀಥಾ, ಕುಮ್." ತಶೆಂ ಮ್ಹಳ್ಯಾರ್ "ಚಲಿಯೇ ಊಠ್! ಮ್ಹಣ್ ಆರ್ಥ್. ತಕ್ಷಣ್ ತಿ ಚಲಿ ಉಠ್ಲಿ ಆನಿ ಚಲುಂಕ್ ಲಾಗ್ಲಿ. ಪ್ರಾಯೆನ್ ತಿ ಬಾರಾ ವರ್ಸಾಂಚಿ. ಥಂಯ್ ಆಸ್ಲಲಿಂ ಸಗ್ಳಿಂ ಭೋವ್ ಚಡ್ ವಿಜ್ಮಿತ್ ಜಾಲಿಂ! ಪುಣ್ ಕೊಣಾಕ್ಚ್ ಹಿ ಖಬರ್ ಕಳಯ್ನಾಯೆ ಮ್ಹಣುನ್ ತಾಣೆಂ ತಾಂಕಾಂ ಖಡಕ್ಕ್ ತಾಕಿದ್ ದಿಲಿ. ಉಪ್ರಾಂತ್ ಚಲಿಯೆಕ್ ಖಾಂವ್ಕ್ ದೀಜಯ್ ಮ್ಹಣ್ ತಾಣೆಂ ತಾಂಕಾಂ ಸಾಂಗ್ಲೆಂ. *ದೆವಾಚೆಂ ಉತಾರ್ ಹೆಂ* 💐💐💐💐💐💐💐💐 Visit: `www.amchikonkani.com`