*ಸಾಂ ಮಾರ್ಕಾ ಪರ್ಮಾಣೆಂ ಜೆಜು ಕ್ರೀಸ್ತಾಚಿ ಸುವಾರ್ತಾ (6:14-29)* ಇತ್ಲ್ಯಾರ್ ಜೆಜುಚೆಂ ನಾಂವ್ ಸಗ್ಳ್ಯಾನ್ ಗಾಜ್ತಾಲೆಂ ಜಾಲ್ಲ್ಯಾನ್, ತಾಚೇ ವಿಶ್ಯಾಂತ್ಲಿ ಖಬರ್ ಹೆರೊದ್ ರಾಯಾಚ್ಯಾ ಕಾನಾಂತ್ ಪಡ್ಲಿ. ಥೊಡೆ ಮ್ಹಣ್ತಾಲೆ: "ಸ್ನಾನ್ ದಾತಾರ್ ಜುವಾಂವ್ಕ್ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲಾ, ದೆಕುನ್ಚ್ ಆಚರ್ಯಾಂ ಕರ್ಚ್ಯೊ ಹ್ಯೊ ಪದ್ವ್ಯೊಯ್ ತಾಚೇ ಥಂಯ್ ಜಿವ್ಯೊ ಜಾಲ್ಯಾತ್." ಹೆರ್ ಥೊಡೆ "ತೊ ಎಲಿಯಾ" ಮ್ಹಣ್ತಾಲೆ. ಆನಿ ಥೊಡೆ "ತೊ ಏಕ್ ಪ್ರವಾದಿ, ಆದ್ಲ್ಯಾ ಕಾಳಾಚ್ಯಾ ಪ್ರವಾದ್ಯಾಂಬರಿ ಎಕ್ಲೊ" ಮ್ಹಣ್ತಾಲೆ. ಪುಣ್ ಹೆರೊದ್ ಜೆಜು ವಿಶ್ಯಾಂತ್ ಆಯ್ಕುನ್, "ಹಾಂವೆಂ ಶಿಪ್ ಕಾಪ್ಲ್ಲೊ ಜುವಾಂವ್ ಆತಾಂ ಮೆಲ್ಲ್ಯಾಂತ್ಲೊ ಜಿವಂತ್ ಉಠ್ಲಾ" ಮ್ಹಣ್ತಾಲೊ. ಹೆರೊದಿನ್ಚ್ ಜಣ್ ಧಾಡ್ನ್ ಜುವಾಂವ್ಕ್ ಧರಯ್ಲ್ಲೊ ಆನಿ ಕೈದಿ ಕರ್ನ್ ತಾಕಾ ಬಂದಿಂತ್ ಘಾಲ್ಲೊ. ಆಪ್ಲ್ಯಾ ಭಾವಾ ಪಿಲಿಪಾಚೇ ಬಾಯ್ಲೇ, ಹೆರೊದಿಯಾಸಾಕ್ ಲಾಗುನ್ ತಾಣೆಂ ಅಶೆಂ ಕರುಂಕ್ ಕಾರಣ್. ಹೆರೊದ್ ತಿಚೇಲಾಗಿಂ ಲಗ್ನ್ ಜಾಲ್ಲೊ. ಪುಣ್, "ತುಜ್ಯಾ ಭಾವಾಚೇ ಬಾಯ್ಲೇಕ್ ತುವೆಂ ದವರ್ನ್ ಘೆವ್ಚೆಂ ಸಾರ್ಕೆ ನ್ಹಯ್" ಮ್ಹಣುನ್ ಜುವಾಂವ್ನ್ ತಾಕಾ ಸಾಂಗ್ಲ್ಲೆಂ. ದೆಕುನ್ ಹೆರೊದಿಯಾಸ್ ಜುವಾಂವ್ಚೆರ್ ದ್ವೇಶ್ ದವರ್ನ್ ಆಸ್ಲ್ಲಿ ಆನಿ ತಾಕಾ ಜಿವೆಶಿಂ ಮಾರೊಂವ್ಕ್ ಸೊಧ್ತಾಲಿ. ಪುಣ್ ತಿಕಾ ಹೆಂ ಸಾಧ್ಯ್ ಜಾಲೆಂನಾ ಕಿತ್ಯಾಕ್ ಜುವಾಂವ್ ಏಕ್ ನಿತಿವಂತ್ ಆನಿ ದೇವ್ ಭಕ್ತಿಚೊ ಮನಿಸ್ ಮ್ಹಣ್ ಒಳ್ಕುನ್, ಹೆರೊದ್ ತಾಕಾ ಭಿಯೆತಾಲೊ ಆನಿ ತಾಕಾ ಆಪಾಯ್ ಘಡನಾಶೆಂ ರಾಕ್ತಾಲೊ. ಸಬಾರ್ ಪಾವ್ಟಿ ಜುವಾಂವ್ಚಿಂ ಉತ್ರಾಂ ಆಯ್ಕಲ್ಲ್ಯಾ ವೆಳಾರ್, ಆಪ್ಣಾಭಿತರ್ಚ್ ತಾಕಾ ಅಸಮಾಧಾನ್ ಭೊಗ್ತಾಲೆಂ; ತರಿಪುಣ್ ತಾಕಾ ತೊ ಖುಶೇನ್ ಆಯ್ಕತಾಲೊ. ಕ್ರಮೇಣ್, ಹೆರೊದಿಯಾಸಾಕ್ ಏಕ್ ಬರ್ಯಾ ಸಂದರ್ಭಾಚೊ ದೀಸ್ ಉದೆಲೊ. ಆಪ್ಲ್ಯಾ ಜಲ್ಮಾ ದಿಸಾ ಆಪ್ಲ್ಯಾ ಮಂತ್ರಿಂಕ್, ಸೆನಾಧಿಪತಿಂಕ್ ಆನಿ ಗಾಲಿಲೆಯಾಂತ್ಲ್ಯಾ ವ್ಹಡ್ ಕುಳ್ವಾರಾಂಕ್ ಏಕ್ ಜೆವಣ್ ಕೆಲೆಂ. ಹ್ಯಾ ಸಂದರ್ಭಾರ್ ಹೆರೊದಿಯಾಸಾಚಿ ಧುವ್ ಜೆವ್ಣಾಸಾಲಾಂತ್ ಯೇವ್ನ್ ನಾಚ್ಲಿ; ಹೆರೊದಿಕ್ ಆನಿ ತಾಚ್ಯಾ ಸಯ್ರ್ಯಾಂಕ್ ತಿ ಭೋವ್ ಚಡ್ ಮಾನ್ವಲಿ. ತವಳ್ ರಾಯಾನ್ ತೇ ಚಲಿಯೇಲಾಗಿಂ ಮ್ಹಳೆಂ: "ತುಕಾ ಕಿತೆಂ ಜಾಯ್ ತೆಂ ಮ್ಹಜೇಲಾಗಿಂ ವಿಚಾರ್ ಆನಿ ಹಾಂವ್ ತುಕಾ ದಿತಲೊಂ." ಆನಿ ಫರ್ಮಾಣ್ ಸಯ್ತ್ ಕರ್ನ್ ತೊ ಮ್ಹಣಾಲೊ: "ಕಿತೆಂಯ್ ತುಂ ಮಾಗ್ಶಿ, ಮ್ಹಜ್ಯಾ ರಾಜ್ಯಾಚೊ ಅರ್ಧೊ ವಾಂಟೊಚ್ ಮಾಗ್ಚಿ ತರ್ಯ್, ಹಾಂವ್ ತೊ ತುಕಾ ದಿತಲೊಂ. ತಿತ್ಲ್ಯಾರ್ ಚಲಿ ಭಾಯ್ರ್ ಗೆಲಿ ಆನಿ, "ಆಪುಣ್ ಕಿತೆಂ ಮಾಗುಂ?" ಮ್ಹಣುನ್ ಆಪ್ಲೇ ಆವಯ್ಲಾಗಿಂ ತಿಣೆಂ ವಿಚಾರ್ಲೆಂ. ತಿಣೆಂ ಜಾಪ್ ದಿಲಿ: "ಸ್ನಾನ್ ದಾತಾರ್ ಜುವಾಂವ್ಚೆಂ ಶಿಸ್ ವಿಚಾರ್. ತಕ್ಷಣ್ಚ್ ತಿ ತುರ್ತಾನ್ ಭಿತರ್ ಯೇವ್ನ್ 'ತುವೆಂ ಮ್ಹಾಕಾ ಆತಾಂಚ್ ಏಕ್ ತಬ್ಕಾಂತ್ ಸ್ನಾನ್ ದಾತಾರ್ ಜುವಾಂವ್ಚೆಂ ಶಿಸ್ ದೀಜಯ್." ಮ್ಹಣುನ್ ರಾಯಾಂಲಾಗಿಂ ಮಾಗಿಲಾಗ್ಲಿ. ಹೆಂ ಆಯ್ಕುನ್ ರಾಯ್ ಖಂತಿಷ್ಟ್ ಜಾಲೊ; ಪುಣ್ ಆಪ್ಣೆಂ ಘಾಲ್ಲ್ಯಾ ಸಪುತಾಕ್ ಲಾಗೊನ್ ಆನಿ ಆಪ್ಲ್ಯಾ ಸಯ್ರ್ಯಾಂ ಹುಜಿರ್ ದಾಕ್ಷೆಣೆಕ್ ಪಡೊನ್, ತಿಕಾ ದಿಲ್ಲೆಂ ಉತರ್ ಮೊಡುಂಕ್ ತಾಣೆಂ ಖುಶಿ ವ್ಹೆಲಿನಾ. ದೆಕುನ್ ತಕ್ಷಣ್ಚ್ ತಾಣೆಂ ಏಕ್ ಪಾರ್ಯಾಗಾರಾಕ್ ಜುವಾಂವ್ಚೆಂ ಶಿಸ್ ಹಾಡಿಜಯ್ ಮ್ಹಣುನ್ ಫರ್ಮಾಣ್ ದೀವ್ನ್ ಧಾಡ್ಲೊ. ತಾಣೆಂ ಬಂದೆಂತ್ ವಚುನ್ ಜುವಾಂವ್ಚೆಂ ಶಿಸ್ ಕಾಪ್ಲೆಂ ಆನಿ ತೆಂ ಏಕ್ ತಬ್ಕಾಂತ್ ಘಾಲ್ನ್ ಚಲಿಯೆಕ್ ಹಾಡ್ನ್ ದಿಲೆಂ. ಚಲಿಯೆನ್ ತೆಂ ವ್ಹರ್ನ್ ಆಪ್ಲೇ ಆವಯ್ಕ್ ದಿಲೆಂ. ಹಿ ಖಬರ್ ಆಯ್ಕುನ್ ಜುವಾಂವ್ಚೆಂ ಶಿಸ್ ಆಯ್ಲೆ ಆನಿ ತಾಂಣಿಂ ತಾಚಿ ಕೂಡ್ ವ್ಹರ್ನ್ ನಿಕೆಪಿಲಿ. *ದೆವಾಚೆಂ ಉತರ್ ಹೆಂ* 💐💐💐💐💐💐💐💐 Visit: `www.amchikonkani.com`