*ಸಾಂ ಮಾರ್ಕ್ ಪರ್ಮಾಣೆಂ ಜೆಜು ಕ್ರೀಸ್ತಾಚಿ ಸುವಾರ್ತಾ (7:1-13)* ಏಕ್ ಪಾವ್ಟಿ ಜೆರುಜಲೆಮಾ ಥಾವ್ನ್ ಆಯ್ಲ್ಲ್ಯಾ ಫಾರಿಜೆವಾಂಚೊ ಪಂಗಡ್ ಆನಿ ಶಾಸ್ತ್ರ್ಯಾಂ ಮಧ್ಲೆ ಥೊಡೆ ಜೆಜು ಭೊಂವ್ತಣಿಂ ಎಕ್ಟಾಂಯ್ ಜಾಲೆ. ತವಳ್ ತಾಚ್ಯಾ ಶಿಸಾಂ ಮಧ್ಲೆ ಥೊಡೆ 'ಭಷ್ಟ್ ಹಾತಾಂನಿ' ಮ್ಹಳ್ಯಾರ್ ಹಾತ್ ಧುಯ್ನಾಸ್ತಾನಾ ಜೆವ್ತಾತ್ ತೆಂ ತಾಂಣಿಂ ಪಳೆಲೆಂ. (ಫಾರಿಜೆವ್ ಆನಿ ಜುದೆವ್ ಸಕ್ಕಡ್ಯ್ ಪುರ್ವಜಾಂಚ್ಯಾ ರಿವಾಜ್ಯಾಂ ಪರ್ಮಾಣೆಂ ಪರ್ತ್ಯಾನ್ ಪರ್ತ್ಯಾನ್ ಹಾತ್ ಧುಲ್ಯಾ ಶಿವಾಯ್ ಜೆವಿನಾತ್. ಪೆಂಟೇಸಾಲಾಕ್ ವಚುನ್ ಆಯ್ಲ್ಯಾ ಉಪ್ರಾಂತ್ ನ್ಹಾಲ್ಯಾಖರಿತ್ ತೆ ಜೆವಿನಾತ್; ಆನಿ ತೆ ಪಾಳ್ತಾತ್ ತಸಲ್ಯೊ ಹೆರ್ ಸಬಾರ್ ರಿವಾಜ್ಯೊ ಆಸಾತ್: ಕೊಪಾಂ, ಮೊಡ್ಕ್ಯೊ ಆನಿ ಕಾಶ್ಯಾಚಿಂ ಆಯ್ದನಾಂ ಧುವ್ಚಿಂ.) ತಶೆಂ ಜಾಲ್ಲ್ಯಾನ್, ಫಾರಿಜೆವಾಂನಿ ಆನಿ ಶಾಸ್ತ್ರ್ಯಾಂನಿ ಜೆಜುಕ್ ಸವಾಲ್ ಕೆಲೆಂ: "ತುಜೆ ಶಿಸ್ ಪುರ್ವಜಾಂಚ್ಯೊ ರಿವಾಜ್ಯೊ ಪಾಳಿನಾಸ್ತಾನಾ ಮ್ಹೆಳ್ಯಾ ಹಾತಾಂನಿ ಜೆವ್ತಾತ್ ಕಿತ್ಯಾಕ್?" ಪುಣ್ ತೊ ತಾಂಕಾಂ ಜಾಪ್ ದೀವ್ನ್ ಸಾಂಗಿಲಾಗ್ಲೊ: "ಕಪಟ್ಯಾಂನೋ, ಸಹಜ್ ತೆಂ ಇಸಾಯಿಯಾ ಪ್ರವಾದ್ಯಾನ್ ತುಮ್ಚೇ ವಿಶ್ಯಾಂತ್ ಪ್ರವಾದ್ ಕರ್ನ್ ಮ್ಹಳ್ಳೆಂ: 'ಹಿ ಪರ್ಜಾ ಆಪ್ಲ್ಯಾ ಒಂಠಾಂನಿ ಮ್ಹಾಕಾ ಹೊಗ್ಳಾಪ್ ದಿತಾ, ತರ್ಯ್ ತಾಂಚೆಂ ಕಾಳಿಜ್ ಮ್ಹಜೇ ಥಾವ್ನ್ ಜಾಯ್ತೆಂ ಪಯ್ಸ್ ಆಸಾ. ವ್ಯರ್ಥ್ ತಾಂಣಿಂ ಮ್ಹಜೆಂ ಭಜನ್ ಕರ್ಚೆಂ, ಖರಿ ಶಿಕೊವ್ಣ್ ಮ್ಹಣ್ ಸಾಂಗುನ್ ಮನ್ಶಾನ್ ಕೆಲ್ಲೆ ಕಾಯ್ದೆ ತೆ ದಿತಾತ್! ' ದೆವಾನ್ ದಿಲ್ಲೊ ಉಪದೆಸ್ ತುಮಿ ಸೊಡ್ನ್ ಸೊಡ್ಲಾ ಆನಿ ಮನ್ಶಾನ್ ಕೆಲ್ಲ್ಯೊ ರಿವಾಜ್ಯೊ ತುಮಿ ಧರ್ಲ್ಯಾತ್. " ಉಪ್ರಾಂತ್ ಮುಂದರುನ್ ತೊ ಮ್ಹಣಾಲೊ: "ವ್ಹಯ್, ತುಮ್ಚ್ಯಾ ರಿತಿಂ ರಿವಾಜ್ಯಾಂಚಿ ಸಂಪ್ರದಾಯ್ ಪಾಳ್ಚೇ ಖಾತಿರ್, ದೆವಾಚೆ ಉಪದೆಸ್ ಹಿಕ್ಮತೆನ್ ತುಮಿ ಬಗ್ಲೆನ್ ದವರ್ತಾತ್. ಪಳೆಯಾ, ಮೊಯ್ಜೆನ್ ಕಿತೆಂ ಫರ್ಮಾಯ್ಲಾಂ: 'ತುಜ್ಯಾ ಆವಯ್ ಬಾಪಾಯ್ಕ್ ಮಾನ್ ದೀ; ಜೊ ಕೊಣ್ ಬಾಪಾಯ್ಕ್ ಜಾಂವ್ ಆವಯ್ಕ್ ಜಾಂವ್ ಶಿರಾಪ್ತಾ, ತಾಕಾ ಮರಣ್ ಶಿಕ್ಷಾ ದೀಜಯ್. ' ತರ್ಯ್ ತುಮಿ ಮ್ಹಣ್ತಾತ್, ಕೊಣ್ಯ್ ಮನಿಸ್ ಜರ್ ಆಪ್ಲ್ಯಾ ಬಾಪಾಯ್ಕ್ ವಾ ಆವಯ್ಕ್ ಸಾಂಗಿತ್: 'ಹಾಂವೆಂ ಕಿತೆಂ ತುಕಾ ಆಧಾರ್ ಜಾವ್ನ್ ದಿವ್ಚೆಂ ಆಸ್ಲೆಂ ತೆಂ 'ಕೊರ್ಬಾನ್' ಜಾಲಾಂ. (ಮ್ಹಳ್ಯಾರ್: ದೆವಾಕ್ ಕಾಣಿಕ್ ಮ್ಹಣ್ ಭೆಟೊವ್ನ್ ದಿಲಾಂ)' ತರ್ ತಸಲ್ಯಾಕ್ ಉಪ್ರಾಂತ್ ತಾಚ್ಯಾ ಆವಯ್ ಬಾಪಾಯ್ಕ್ ಕಸಲಿಯ್ ಕುಮಕ್ ದಿಂವ್ಕ್ ತುಮಿ ಆಡ್ವಾರ್ತಾತ್. ಅಶೆಂ ತುಮಿ ಪಾಳ್ನ್ ಆಯ್ಲ್ಲ್ಯಾ ರಿವಾಜ್ಯಾಂ ವರ್ವಿಂ ದೆವಾಚೆಂ ಉತರ್ ತುಮಿ ನಿರ್ಫಳ್ ಕರ್ತಾತ್; ಅಸಲೆಂ ಹೆರ್ಯ್ ಜಾಯ್ತೆಂ ತುಮಿ ಕರ್ನ್ ಆಸಾತ್. " *ದೆವಾಚೆಂ ಉತಾರ್ ಹೆಂ* 💐💐💐💐💐💐💐💐 Visit: `www.amchikonkani.com`