✝️🙏🏼✝️🙏🏼✝️🙏🏼✝️ *ಸಾಂ ಫಾವೊಸ್ತಿನ್ ಆನಿಂ ಸಾಂ ಜೊವಿಟಾ, ರಗ್ತ್‌ಸಾಕ್ಷಿ / ಭಾಗೆವಂತ್ ಕುಟ್ಮಾಕ್ ಸಮರ್ಪಿಲ್ಲೊ ಮಹಿನೊ* Saturday, February 15th 2025 ಸಾದ್ಯಾ ಕಾಳಾಚೊ ಪಾಂಚ್ವೊ ಸನ್ವಾರ್ *ಪಯ್ಲೆಂ ವಾಚಪ್* ಉತ್ಪತ್ತಿ 3: 9-24 ಸರ್ವೆಸ್ಪರಾ ದೆವಾನ್ ದಾದ್ಲ್ಯಾಕ್ ಉಲೊ ಕೆಲೊ ಆನಿ ವಿಚಾರ್ಲೆಂ: “ತುಂ ಖಂಯ್ ಆಸಾಯ್?” ತಾಣೆಂ ಜಾಪ್ ದಿಲಿ: “ತುಂ ಬಾಗೆಂತ್ ಚಲ್ತಾನಾ ತುಜೊ ಆವಾಜ್ ಹಾಂವೆಂ ಆಯ್ಕಲೊ. ಹಾಂವ್ ವಿಣ್ಗೊ ಆಸ್‍ಲ್ಲೊಂ ದೆಕುನ್ ಹಾಂವ್ ಭಿಯೆಲೊಂ ಆನಿ ಲಿಪ್ಲೊಂ.” ದೆವಾನ್ ತಾಕಾ ಸವಾಲ್ ಕೆಲೆಂ: “ತುಂ ವಿಣ್ಗೊ ಆಸಾಯ್ ಮ್ಹಣ್ ತುಕಾ ಕೊಣೆಂ ಸಾಂಗ್ಲೆಂ? ಹಾಂವೆಂ ಆಡ್ವಾರ್ಲಲ್ಯಾ ರುಕಾಚೆಂ ಫಳ್ ತುವೆಂ ಖೆಲೆಂಯ್ ಕಿತೆಂ?” ದಾದ್ಲ್ಯಾನ್ ಜಾಪ್ ದಿಲಿ: “ತುಂವೆಂ ಮ್ಹಜಿ ಸಾಂಗಾತಿಣ್ ಕರುನ್ ದಿಲ್ಲೆ ಸ್ತ್ರೀಯೆನ್ ತ್ಯಾ ರುಕಾಚೆಂ ಫಳ್ ಮ್ಹಾಕಾ ದಿಲೆಂ ಆನಿ ಹಾಂವೆಂ ತೆಂ ಖೆಲೆಂ.” ಸರ್ವೆಸ್ಪರಾ ದೆವಾನ್ ಸ್ತ್ರೀಯೆ ಲಾಗಿಂ ವಿಚಾರ್ಲೆಂ: “ಹೆಂ ತುವೆಂ ಕಿತ್ಯಾಕ್ ಕೆಲೆಂಯ್?” ಸ್ತ್ರೀಯೆನ್ ಜಾಪ್ ದಿಲಿ: “ಸೊರ್ಪಾನ್ ಮ್ಹಾಕಾ ಫಸಯ್ಲಿ ಆನಿ ಹಾಂವೆಂ ತೆಂ ಖೆಲೆಂ.” ತವಳ್ ಸರ್ವೆಸ್ಪರಾ ದೆವಾನ್ ಸೊರ್ಪಾಕ್ ಮ್ಹಳೆಂ: “ತುವೆಂ ಅಶೆಂ ಕೆಲೆಂಯ್ ದೆಕುನ್ ಸರ್ವ್ ಜಾನ್ವಾರಾಂ ಆನಿ ಮೊನ್ಜಾತಿಂ ಮದೆಂ ತುಂ ಶಿರಾಪ್ ಪಡ್ಲಲೊ ಜಾಂವ್. ತುಜ್ಯಾ ಪೊಟಾಚೆರ್ ತುಂ ಚರ್ತಲೊಯ್ ಆನಿ ಸಗ್ಳ್ಯಾ ತುಜ್ಯಾ ಜಿವಿತಾಂತ್ ಧುಳ್ ತುಂ ಖಾತಲೊಯ್. ತುಜೆ ಆನಿ ಸ್ತ್ರೀಯೆ ಮಧೆಂ, ತುಜೆ ಸಂತತಿ ಆನಿ ತಿಚೆ ಸಂತತಿ ಮಧೆಂ ದುಸ್ಮಾನ್ಕಾಯ್ ಹಾಂವ್ ಘಾಲ್ತಲೊಂ ಆನಿ ತಿಚಿ ಸಂತತ್ ತುಜೆಂ ಮಸ್ತಕ್ ಚೆಂಚ್ತಲಿ ಆನಿ ತುಂ ತಿಚೆ ಖೊಟೆಕ್ ಖೊಂಚ್ ಮಾರ್ತಲೊಯ್.” ಸ್ತ್ರೀಯೆಕ್ ತಾಣೆಂ ಮ್ಹಳೆಂ: “ತುಜ್ಯಾ ಗರ್ಭೆಸ್ತ್‍ಪಣಾಚೆ ಕಷ್ಟ್ ಹಾಂವ್ ವಾಡಯ್ತಲೊಂ. ದುಖಿನ್ ತುಂ ಭುರ್ಗ್ಯಾಂಕ್ ಪ್ರಸೂತ್ ಜಾತಲಿಯ್. ಪೂಣ್ ತುಜ್ಯಾ ದಾದ್ಲ್ಯಾಕ್ ತುಂ ಅತ್ರೆಗ್ತಲಿಯ್ ಆನಿ ತೊ ತುಜೆರ್ ಅಧಿಕಾರ್ ಚಲಯ್ತಲೊ.” ದಾದ್ಲ್ಯಾಕ್ ತಾಣೆಂ ಮ್ಹಳೆಂ: “ತುಜೆ ಸ್ತ್ರೀಯೆಚೆಂ ಉತರ್ ಆಯ್ಕುನ್ ಹಾಂವೆಂ ಆಡ್ವಾರ್ಲಲ್ಯಾ ರುಕಾಚೆಂ ಫಳ್ ತುವೆಂ ಖೆಲೆಂಯ್, ದೆಕುನ್ ತುಕಾ ಲಾಗುನ್ ಭುಂಯ್ಚೆರ್ ಶಿರಾಪ್ ಪಡುಂ. ಸಗ್ಳ್ಯಾ ತುಜ್ಯಾ ಜಿವಿತಾಂತ್ ಕಷ್ಟಾಂ ವಾಂವ್ಟಿನ್ ಭುಂಯ್ ವಸೊವ್ನ್ ತುಜೆಂ ಪೋಟ್ ತುಂ ಭರ್ತಲೊಯ್. ತಿ ಭುಂಯ್ ತುಕಾ ಕಾಂಟೆಖುಂಟೆ ಉತ್ಪನ್ನ್ ಕರ್ತಲಿ ಆನಿ ಶೆತಾಂತ್ಲಿಂ ಝಾಡಾಂ ತುಂ ಖಾತಲೊಯ್. ಧರ್ಣಿಂತ್ಲೊ ತುಕಾ ಕಾಡ್‍ಲ್ಲೊ ದೆಕುನ್ ಧರ್ಣಿಕ್ ತುಂ ಪಾಟಿಂ ವಚಸರ್ ಕಪಾಲಾಚೊ ಘಾಮ್ ವಾರೊವ್ನ್ ತುಜೆಂ ಪೋಟ್ ಭರ್ತಲೊಯ್. ವ್ಹಯ್, ಧುಳ್ ತುಂ ಆನಿ ಧುಳಿಕ್ ತುಂ ಪಾಟಿಂ ವೆತಲೊಯ್.” ಮನ್ಶಾನ್ ಆಪ್ಲೆ ಬಾಯ್ಲೆಕ್ ಏವ್ ಮ್ಹಣ್ ನಾಂವ್ ದಿಲೆಂ, ಕಿತ್ಯಾಕ್ ಜಿಯೆತಲ್ಯಾ ಸರ್ವಾಂಚಿ ತಿ ಮೂಳ್‍ ಅವಯ್. ಸರ್ವೆಸ್ಪರಾ ದೆವಾನ್ ಮನ್ಶಾಕ್ ಆನಿ ತಾಚೆ ಬಾಯ್ಲೆಕ್ ಚಾಮ್ಡ್ಯಾಚಿ ಮುಸ್ತಾಯ್ಕಿ ಕರುನ್ ನ್ಹೆಸಯ್ಲಿ. ಉಪ್ರಾಂತ್ ಸರ್ವೆಸ್ಪರಾ ದೆವಾನ್ ಮ್ಹಳೆಂ: “ಅಬ್ಳೆ, ಮನಿಸ್ ಆತಾಂ ಬರೆಂ ವಾಯ್ಟ್ ಸಮ್ಜುನ್ ಆಮ್ಚೆ ಸಾರ್ಕೊ ಜಾಲಾ. ಜಿವಿತಾಚ್ಯಾ ರುಕಾಚ್ಯಾ ಫಳಾಕ್‍ಯೀ ತೊ ಹಾತ್ ಘಾಲಿತ್ ಆನಿ ತೆಂ ಖಾವ್ನ್ ಸಾಸ್ಣಾಕ್ ಜಿಯೆತ್! ತಶೆಂ ಘಡುಂಕ್ ನಜೊ.” ದೆಕುನ್ ಸರ್ವೆಸ್ಪರಾ ದೆವಾನ್ ತಾಕಾ ಏದೆನಾಚ್ಯಾ ಬಾಗೆಂತ್ಲೊ ಭಾಯ್ರ್ ಘಾಲೊ ಆನಿ ಜೆ ಧರ್ಣಿಚೊ ತಾಕಾ ರಚ್‍ಲ್ಲೊ, ತಿಚ್ ಧರ್ಣ್ ವಸೊಂವ್ಕ್ ತಾಕಾ ಧಾಡ್ಲೊ. ಮನ್ಶಾಕ್ ಅಸೊ ದೆವಾನ್ ಭಾಯ್ರ್ ಘಾಲೊ ಆನಿ ಜಿವಿತಾಚ್ಯಾ ರುಕಾ ಸರ್ಶಿಂ ಕೊಣೆಂಯ್ ವಚನಾಶೆಂ ಏದೆನಾಚ್ಯಾ ಬಾಗೆಚೆ ಉದೆಂತಿಕ್ ಖೆರುಬಿಮಾಂಕ್ ಆನಿ ಸರ್ವ್ ಕುಶಿಂನಿ ಘುಂವ್ತಾ ತಸಲಿ ಜಳ್ತ್ಯಾ ಉಜ್ಯಾಚಿ ತಲ್ವಾರ್ ದವರ್ಲಿ. *ದೆವಾಚೆಂ ಉತರ್ ಹೆಂ* -ದೆವಾಚೊ ವ್ಹಡ್ ಉಪ್ಕಾರ್ 🌷🌷🌷🌷🌷🌷🌷🌷🌷 *ಕೀರ್ತನ್* 90: 2. 3-4b. 5-6. 12-13 *ಶ್ಲೋಕ್: ಸರ್ವೆಸ್ಪರಾ, ಸಂತತೆಚ್ಯೆ ಸಂತತೆಕ್ ತುಂಚ್ ಆಮ್ಚೊ ಆಸ್ರೊ* 1. ಪರ್ವತ್ ದೊಂಗೊರ್ ಅಸ್ತಿತ್ವಾಂತ್ ಯೆಂವ್ಚ್ಯಾ ಆದಿಂ,ಪ್ರಥ್ವಿ ಆನಿ ತಾಂತ್ಲೆ ದೇಶ್ ತುವೆಂ ರಚ್ಚ್ಯಾ ಆದಿಂ.ಸಾಸ್ಣಾಥಾವ್ನ್ ಸಾಸ್ಣಾಕ್ ಪರ್ಯಾನ್ ತುಂಚ್ ಆಮ್ಚೊ ದೇವ್. *ಶ್ಲೋಕ್: ಸರ್ವೆಸ್ಪರಾ, ಸಂತತೆಚ್ಯೆ ಸಂತತೆಕ್ ತುಂಚ್ ಆಮ್ಚೊ ಆಸ್ರೊ* 2. ಮನ್ಶ್ಯಾಂನೊ, ತಾಟಿ ವಚಾ" - ಅಶೆಂ ಫರ್ಮಾಣ್ ದೀವ್ನ್ಮನ್ಶಾಂಕ್ ತುಂ ಪರ್ತ್ಯಾನ್ ಮಾತಿಯೆಕ್ ಪಾಟಿಂ ವ್ಹರ್ತಾಯ್,ಹಜಾರ್ ವರ್ಸಾಂ ತುಜ್ಯೆ ದಿಷ್ಟೆನ್ಯೇವ್ನ್ ಗೆಲ್ಲ್ಯಾ ಕಾಲ್ಚ್ಯಾ ದಿಸಾ ವಾ ರಾತಿಚ್ಯಾ ಎಕಾ ಪಾರಾಸಾರ್ಕಿಂ. *ಶ್ಲೋಕ್: ಸರ್ವೆಸ್ಪರಾ, ಸಂತತೆಚ್ಯೆ ಸಂತತೆಕ್ ತುಂಚ್ ಆಮ್ಚೊ ಆಸ್ರೊ* 3. ತುಂ ಮನ್ಶ್ಯಾಕ್ ಉದ್ಕಾಚ್ಯಾ ಲೊಟಾಬರಿ ವೋಡ್ನ್ ವ್ಹರ್ತಾಯ್,ತಾಚಿ ಜಿಣಿ ಏಕ್ ಸಪಣ್ ಕಶಿ;ಸಕಾಳಿಂಚ್ಯಾ ಆದೇಸಾಕ್ ಜೀವ್ ಜಾತಲ್ಯಾ ತಣಾಬರಿದೀಸ್ ಉದೆತಾನಾ ತೆಂ ಜೀವ್ ಜಾವ್ನ್ ಫುಲ್ತಾ,ದೀಸ್ ಬುಡ್ತಾನಾ ತೆಂ ಬಾವೊನ್ ಸುಕ್ತಾ. *ಶ್ಲೋಕ್: ಸರ್ವೆಸ್ಪರಾ, ಸಂತತೆಚ್ಯೆ ಸಂತತೆಕ್ ತುಂಚ್ ಆಮ್ಚೊ ಆಸ್ರೊ* 4. ಆಮ್ಚೆ ದೀಸ್ ಮಟ್ವೆ ಮ್ಹಣ್ ಆಮ್ಕಾಂ ವಿಸ್ರೊಂಕ್ ದೀನಾಕಾ,ತೆದ್ವಾಂ ಆಮ್ಚ್ಯಾ ಕಾಳ್ಜಾಕ್ ಮೆಳ್ತೆಲಿ ಜಾಣ್ವಾಯ್.ಸರ್ವೆಸ್ಪರಾ, ಬದಲ್ ತುಜೆಂ ಮನ್;ಕೆದೊಳ್ ಪರ್ಯಾಂತ್ ರಾಗಾರ್ ರಾವ್ತಾಯ್?ತುಜ್ಯಾ ಚಾಕ್ರಾಂಚಿ ತುಕಾ ಬಿರ್ಮತ್ ದಿಸೊಂ. *ಶ್ಲೋಕ್: ಸರ್ವೆಸ್ಪರಾ, ಸಂತತೆಚ್ಯೆ ಸಂತತೆಕ್ ತುಂಚ್ ಆಮ್ಚೊ ಆಸ್ರೊ* 🪷🪷🪷🪷🪷🪷🪷🪷 *ಉದ್ಗಾರ್* ( ಮಾತೆವ್ 4:4b) *ಅಲ್ಲೆಲೂಯಾ! ಅಲ್ಲೆಲೂಯಾ!* ಉಂಡ್ಯಾವರ್ವಿಂ ಮಾತ್ರ್ ಮನಿಸ್ ಜಿಯೆನಾ,ಬಗಾರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ ಹರ್ಯೇಕಾ ಉತ್ರಾವರ್ವಿಂ ತೊ ಜಿಯೆತಾ. *ಅಲ್ಲೆಲೂಯಾ!* 🌸🌸🌸🌸🌸🌸🌸 *ಶುಭ್‍ವಾರ್ತಾ* ಮಾರ್ಕ್ 8: 1-10 ತ್ಯಾ ದಿಸಾಂನಿ, ಆನ್ಯೇಕ್ ಸಂದರ್ಭಾರ್ ವ್ಹಡ್ ಏಕ್ ಲೊಕಾಜಮೊ ಎಕ್ಟಾಂಯ್ ಜಾಲೊ ಆನಿ ತಾಂಕಾಂ ಖಾಂವ್ಕ್ ಕಾಂಯ್ ನಾ ಜಾಲೆಂ. ತೆದ್ವಾಂ ಆಪ್ಲ್ಯಾ ಶಿಸಾಂಕ್ ಸರ್ಶಿಂ ಅಪೊವ್ನ್ , ಜೆಜುನ್ ತಾಂಚೆಲಾಗಿಂ ಮ್ಹಳೆಂ: “ಹ್ಯಾ ಲೊಕಾಚೆ ಮ್ಹಾಕಾ ಚುರ್ಚುರೆ ಭೊಗ್ತಾತ್; ಪಾಟ್ಲ್ಯಾ ತೀನ್ ದಿಸಾಂ ಥಾವ್ನ್ ಮ್ಹಜೆ ಸಾಂಗಾತಾ ತಿಂ ರಾವ್ಲ್ಯಾಂತ್, ಆನಿ ಖಾಂವ್ಕ್ ಜೆಂವ್ಕ್ ತಾಂಚೆಲಾಗಿಂ ಕಾಂಯ್ ನಾ. ಆನಿ ಆತಾಂ ಹಾಂವ್ ತಾಂಕಾಂ ಉಪಾಶಿಂ ಘರಾ ಧಾಡಿನ್ ಜಾಲ್ಯಾರ್, ವೆತಾನಾ ವಾಟೆರ್ ತಿಂ ತಂಗ್ ಜಾತಿತ್; ತಾಂಚೆ ಮಧ್ಲಿಂ ಥೊಡಿಂ ಪಯ್ಸ್ ಥಾವ್ನ್ ಆಯ್ಲ್ಯಾಂತ್.” ತಾಕಾ ಶಿಸಾಂನಿ ಜಾಪ್ ದಿಲಿ: “ಹಾಂಗಾ ಹೇ ಎಕ್ಸುರೇ ಸುವಾತೆರ್ ತಾಂಕಾಂ ಉಂಡ್ಯಾಂನಿ ಧಾದೊಶಿ ಕರುಂಕ್ ಕೊಣಾಕ್ ಸಾಧ್ಯ್ ಜಾಯ್ತ್?” “ತುಮ್ಚೇಲಾಗಿಂ ಕಿತ್ಲೆಂ ಉಂಡೆ ಆಸಾತ್?” ವಿಚಾರಿ ಜೆಜು. “ಸಾತ್” ಮ್ಹಣುನ್ ತಾಣಿಂ ಜಾಪ್ ದಿಲಿ. ತಿತ್ಲ್ಯಾರ್ ಲೊಕಾಕ್ ಧರ್ಣಿರ್ ಬಸುಂಕ್ ತಾಣೆ ಫರ್ಮಾಯ್ಲೆಂ. ಉಪ್ರಾಂತ್ ತೆ ಸಾತ್ ಉಂಡೆ ಘೆವ್ನ್, ತಾಣೆ ಅರ್ಗಾಂ ದೀವ್ನ್ ಮೊಡ್ಲೆ ಆನಿ ತಾಂಕಾಂ ವಾಂಟುಂಕ್ ಆಪ್ಲ್ಯಾ ಶಿಸಾಂಲಾಗಿಂ ದಿಲೆ; ಶಿಸಾಂನಿ ತೆ ಲೊಕಾಕ್ ವಾಡ್ಲೆ. ಥೊಡ್ಯೊ ಲ್ಹಾನ್ ಮಾಸ್ಳ್ಯೊಯಿ ತಾಂಚೆಲಾಗಿಂ ಆಸ್ಲ್ಯೊ; ತಾಂಚೆರ್ ತಾಣೆಂ ಆಶೀರ್ವಾದ್ ಘಾಲ್ಯಾ ಉಪ್ರಾಂತ್ ತ್ಯೊಯೀ ಲೊಕಾಕ್ ವಾಡುಂಕ್ ಸಾಂಗ್ಲೆಂ. ತಿಂ ಸಗ್ಳಿಂ ಜೆವ್ಲಿಂ ಆನಿ ಧಾದೊಶಿ ಜಾಲಿಂ. ಖಾವ್ನ್ ಉರ್-ಲ್ಲೆ ಕುಡ್ಕೆ ಆರಾವ್ನ್ ಕಾಡ್ತಾನಾ ಸಾತ್ ದಾಲಿಂ ಭರ್ಲಿಂ. ಜೆವ್‍ಲ್ಲೊ ಲೋಕ್ ಚಡುಣೆಂ ಚಾರ್ ಹಜಾರ್ ಜಾಯ್ತ್. ಉಪ್ರಾಂತ್ ತಾಂಕಾಂ ತಾಣೆ ಘರಾ ಧಾಡ್ಲಿಂ; ಆನಿ ತೊ ಆಪ್ಲ್ಯಾ ಶಿಸಾಂ ಸಾಂಗಾತಾ ಮಚ್ವ್ಯಾರ್ ಚಡುನ್ ದಾಲ್ಮಾನೂಥಾ ಗಾಂವಾಕ್ ಪಯ್ಣ್ ಧರ್ನ್ ಗೆಲೊ. *ಯಾಜಕ್: ದೆವಾಚೆಂ ಉತರ್ ಹೆಂ.* ಲೋಕ್: ವಾಖಣ್ಣಿ ತುಕಾ, ಕ್ರಿಸ್ತಾ. 💐💐💐💐💐💐💐💐 Visit: `www.amchikonkani.com`