*ಸಾಂ ಮಾರ್ಕಾ ಪರ್ಮಾಣೆಂ ಜೆಜು ಕ್ರೀಸ್ತಾಚಿ ಸುವಾರ್ತಾ (9:14-29)* ಆನಿ ತೆ ಹೆರ್ ಶಿಸಾಂಲಾಗಿಂ ಪಾಟಿಂ ಯೆತಾಸ್ತಾನಾ, ಲೊಕಾಚೊ ಜಮೊ ಭೊಂವ್ತಣಿಂ ಆಸುನ್, ಶಾಸ್ತ್ರಿ ತಾಂಚೇಲಾಗಿಂ ತರ್ಕ್ ಕರ್ನ್ ಆಸ್ಲಲೆ ತೆಂ ತಾಂಣಿಂ ದೆಖ್ಲೆಂ. ಜೆಜುಕ್ ಪಳೆತಚ್, ಥಂಯ್ ಆಸ್ಲಲೆ ಸಕ್ಕಡ್ ಆಜಾಪ್ ಜಾಲೆ ಆನಿ ಧಾಂವುನ್ ವಚುನ್ ತಾಂಣಿ ತಾಕಾ ಸ್ಸಾಗತ್ ಕೆಲೊ. "ಕಿತೆಂ ತೆಂ ತುಮ್ಚೇ ಭಿತರ್ ತುಮಿ ತರ್ಕ್ ಕರ್ನ್ ಆಸ್ಲ್ಲ್ಯಾತ್?" ಮ್ಹಣುನ್ ಜೆಜುನ್ ತಾಂಚೇಲಾಗಿಂ ವಿಚಾರ್ಲೆಂ. ತವಳ್ ಜಮ್ಯಾ ಭಿತರ್ಲ್ಯಾ ಎಕ್ಲ್ಯಾನ್ ಜಾಪ್ ದೀವ್ನ್ ಮ್ಹಳೆಂ: "ಮೆಸ್ತ್ರಿ, ಮೊನೊ ದೆಂವ್ಚಾರ್ ಲಾಗ್ಲ್ಲ್ಯಾ ಮ್ಹಜ್ಯಾ ಪುತಾಕ್ ಹಾಂವೆಂ ತುಜೇ ಸರ್ಶಿಂ ಹಾಡ್ಲಾ ತೊ ತಾಚೆರ್ ಆಯ್ಲ್ಲ್ಯಾಕ್ಷಣ್ ತಾಕಾ ಧರ್ಣಿಕ್ ಆಪ್ಟಿತಾ. ಉಪ್ರಾಂತ್ ತೊ ಫೆಂಡ್ ವೊಂಕ್ತಾ. ದಾಂತ್ ಖಿರ್ಲಿತಾ ಆನಿ ರೂಕ್ ಜಾತಾ. ತ್ಯಾ ದೆಂವ್ಚಾರಾಕ್ ಭಾಯ್ರ್ ಘಾಲಾ ಮ್ಹಣ್ ತುಜ್ಯಾ ಶಿಸಾಂಲಾಗಿಂ ಹಾಂವೆಂ ಪರಾತ್ಲೆಂ, ಪುಣ್ ತಾಂಚ್ಯಾನ್ ತೆಂ ಜಾಲೆಂನಾ. ಜೆಜುನ್ ಜಾಪ್ ದಿಲಿ: "ಏ ಅವಿಶ್ವಾಶಿ ಸಂತತೇ! ಕೆದೊಳ್ ಪರ್ಯಾನ್ ತುಜೇ ಸಾಂಗಾತಾ ಹಾಂವೆಂ ರಾವ್ಚೆಂ? ಕಿತ್ಲೊ ಕಾಳ್ ಹಾಂವೆಂ ತುಕಾ ಸೊಸುನ್ ವ್ಹರ್ಚೆಂ? ಹಾಡಾ ತಾಕಾ ಮ್ಹಜೇ ಸರ್ಶಿಂ" ತಾಂಣಿಂ ತಾಕಾ ಹಾಡ್ಲೊ. ಜೆಜುಕ್ ಪಳೆಲ್ಲೊಚ್ ದೆಂವ್ಚಾರಾನ್ ತ್ಯಾ ಭುರ್ಗ್ಯಾಕ್ ಉಂಚಾಬಳ್ ಕೆಲೊ ಆನಿ ತಾಕಾ ಧರ್ಣಿಕ್ ಆಪ್ಟಿಲೊ. ಭುರ್ಗೊ ಆಡ್ವೊ ಉದಾರೊ ಲೊಳುನ್ ಫೆಂಡ್ ವೊಂಕ್ತಾಲೊ. ಜೆಜುನ್ ಭುರ್ಗ್ಯಾಚ್ಯಾ ಬಾಪಾಯ್ ಲಾಗಿಂ ವಿಚಾರ್ಲೆಂ "ಕಿತ್ಲೊ ತೇಂಪ್ ಥಾವ್ನ್ ಹಾಕಾ ಅಶೆಂ ಜಾಯ್ತ್ ಆಸಾ?" ತಾಣಿಂ ಜಾಪ್ ದಿಲಿ: "ಲ್ಹಾನ್ ಥಾವ್ನ್ಚ್. ತಾಚೊ ನಾಸ್ ಕರಿಜಯ್ ಮ್ಹಣ್ ತವಳ್ ತವಳ್ ತಾಕಾ ತಾಣೆಂ ಉಜ್ಯಾಂತ್ ಆನಿ ಉದ್ಕಾಂತ್ ಲೊಟುನ್ ಘಾಲೊ; ಪುಣ್ ತುಜೆ ವರ್ವಿಂ ಕಾಂಯ್ ಪುಣ್ಯ್ ಸಾಧ್ಯ್ ಜಾಲ್ಯಾರ್ ಆಮ್ಚೆರ್ ದಯಾ ದವರ್ನ್ ಆಮ್ಕಾಂ ಪಾವ್." ಜೆಜುನ್ ತಾಕಾ ಮ್ಹಳೆಂ: "ಸಾಧ್ಯ್ ಜಾಲ್ಯಾರ್! ಸತ್ಮಾನ್ತಲ್ಯಾಕ್ ಸರ್ವ್ ಸಂಗ್ತಿ ಸಾಧ್ಯ್." ತಿತ್ಲ್ಯಾರ್, ಭುರ್ಗ್ಯಾಚೊ ಬಾಪುಯ್ ದುಖಾಂ ಗಳೊವ್ನ್ ವ್ಹಡ್ಲ್ಯಾನ್ ಮ್ಹಣಾಲೊ: "ಸತ್ಮಾನ್ತಾಂ ಧನಿಯಾ! ಮ್ಹಜೊ ಅವಿಶ್ವಾಸ್ ಪಯ್ಸ್ ಕರುಂಕ್ ತುಂಚ್ ಮ್ಹಾಕಾ ಆಧಾರ್ ದೀ." ಲೊಕಾಚೊ ಜಮೊ ತಾಚೇ ಭೊಂವ್ತಣಿಂ ಭರೊನ್ ಆಯ್ಲಲೊ ಫಳೆವ್ನ್, ಜೆಜುನ್ ದೆಂವ್ಚಾರಾಕ್ ಭೆಷ್ಟಾವ್ನ್ ಮ್ಹಳೆಂ: "ಭೆರ್ಯಾ ಆನಿ ಮೊನ್ಯಾ ದೆಂವ್ಚಾರಾ, ತಾಚೇ ಥಾವ್ನ್ ಭಾಯ್ರ್ ಸರ್ ಆನಿ ಪರ್ತ್ಯಾನ್ ತಾಚೇ ಥಂಯ್ ಕೆದಿಂಚ್ ಪ್ರವೇಶ್ ಜಾಯ್ನಾಕಾ ಮ್ಹಣುನ್ ಹಾಂವ್ ತುಕಾ ಫರ್ಮಾಯ್ತಾಂ." ತವಳ್ ಬೊಬೋ ಮಾರಿತ್ ಆನಿ ಭುರ್ಗ್ಯಾಚ್ಯೊ ಜಾಯ್ತೊ ವೊಡಿ ಕಾಡಿತ್ ದೆಂವ್ಚಾರ್ ತಾಚೇ ಥಾವ್ನ್ ಭಾಯ್ರ್ ಗೆಲೊ. ಭುರ್ಗೊ ಏಕ್ ಮೊಡ್ಯಾಬರಿ ಪಡ್ಲೊಕೀ, ಸಬಾರ್ ಜಣ್ "ತೊ ಮೆಲಾ" ಮ್ಹಣಾಲೆ. ಜೆಜುನ್ ತಾಚೊ ಹಾತ್ ಧರ್ನ್ ತಾಕಾ ಉಕಲ್ಲೊ, ಆನಿ ತೊ ಉಠೊನ್ ಉಬೊ ರಾವ್ಲೊ. ಘರಾ ವೆತಚ್ ಜೆಜುಚೆ ಶಿಸ್ ತಾಚೇ ಸರ್ಶಿಂ ಯೇವ್ನ್ ವಿಚಾರಿಲಾಗ್ಲೆ: "ತ್ಯಾ ದೆಂವ್ಚಾರಾಕ್ ಭಾಯ್ರ್ ಘಾಲುಂಕ್ ಆಮ್ಚ್ಯಾನ್ ಕಿತ್ಯಾಕ್ ಜಾಲೆಂನಾ?" ಜೆಜುನ್ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ: "ಹೇ ಜಾತಿಚೊ ದೆಂವ್ಚಾರ್ ಭಾಯ್ರ್ ಘಾಲುಂಕ್ ಮಾಗ್ಣ್ಯಾ ಶಿವಾಯ್ ದುಸ್ರೊ ಉಪಾಯ್ ನಾ." *ದೆವಾಚೆಂ ಉತರ್ ಹೆಂ* 💐💐💐💐💐💐💐💐 Visit: `www.amchikonkani.com`