*د هلمند پوهنتون رئیس د بُست پوهنتون په اتلسمي دورې فراغت غونډه کي ګډون وکړ.* نن ورځ دوشنبه د هلمند پوهنتون رئیس شیخ الحدیث و التفسیر مفتي محمد شریف الله " ابو احمد " صاحب د بُست خصوصي پوهنتون په اتلسمه دوره فراغت غونډه کي ګډون وکړ. نوموړي پخپلو خبرو کي و نویو فارغ سوو محصلینو ته د مبارکۍ ترڅنګ زیاته کړه، چي ګران هیواد افغانستان اوس تر بل هر چا و ځوان کهول ته اړتیا لري، فارغ کېدونکو ځوانانو ته په کار ده چي پخپل حاصل سوي تعلیم او مسلک د هیواد و ځان بسیایني ته کار وکړي، ترڅو افغانان په هره برخه کي د پردیو له احتیاجه و وزي. ښاغلي ابو احمد و ویل: د هیواد برحاله امنیت د زده کړي او تعلیم لپاره یو ستر فرصت دی، نو په کار ده چي له شته فرصته مثبته ګټه واخلو. نوموړي همداراز د یاد پوهنتون پر رهبرۍ او استاذانو ږغ وکړ، ترڅو د هیواد د بچیانو د مسلکي روزني ترڅنګ په خپل علمي بنسټ کي د دیني او عصري علومو د یووالي او اړتیا روحیه نوره هم ژوندۍ او ایجاد سوي واټنونه له منځه یوسي، ځکه چي یو اسلامي ټولنه و دواړو علومو اړتیا لري. د یادوني وړده، چي یاده غونډه کي له معالجوي طب او انجینرۍ پوهنځیو څخه ۶۳ تنه محصلان فارغ او ټولني ته د خدمت په پار وړاندي سوه. نېټه:۱۴۴۶/۸/۱۱ هــ ق *هلمند پوهنتون* *د نشراتو، اړیکو او عامه پوهاوي آمریت*