تقریباً 400,000 سے 48,000 سال پہلے ایک قدیم انسانی گروہ، جسے بعد میں ڈینیسووان کہا گیا، ایشیا میں آباد تھا۔ اس دوران نیاندرتھلز یورپ اور مغربی ایشیا میں رہ رہے تھے، جبکہ ڈینیسووانز کا بسیرا مشرقی اور جنوبی ایشیا میں تھا۔ جب ہومو سیپینز تقریباً 60,000 سے 50,000 سال پہلے افریقہ سے نکل کر ایشیا کے ساحلی علاقوں میں پھیلے، تو ان کی ڈینیسووانز سے جینیاتی آمیزش ہوئی۔ اس کا ثبوت 2010 میں ملا، جب سائبیریا کی دینیسوا غار میں 2008 میں دریافت ہونے والی انگلی کی ہڈی کا ڈی این اے تجزیہ کیا گیا۔ حیرت انگیز طور پر، یہ ڈی این اے نیو گنی کے لوگوں سے مشابہت رکھتا تھا، جن کے جینوم میں 4.8% ڈینیسووان جین پایا گیا۔ آج بھی نیو گنی، آسٹریلیا، فلپائن اور دیگر قریبی جزیروں کے مقامی لوگوں کے ڈی این اے میں 3 سے 5 فیصد ڈینیسووان جین موجود ہے، جو اس بات کا ثبوت ہے کہ ان کے آباؤ اجداد کی نسلیں ڈینیسووانز سے ملی ہوئی تھیں۔ 2014 میں سائنسدانوں نے مزید تحقیق سے ثابت کیا کہ تبتیوں اور شرپاؤں کے کچھ جین بھی ڈینیسووانز سے آئے ہیں، جس کی وجہ سے وہ بلند پہاڑوں میں کم آکسیجن کے باوجود زندہ رہنے کی صلاحیت رکھتے ہیں۔ اس سے پتہ چلتا ہے کہ ڈینیسووانز نہ صرف جنوب مشرقی ایشیا میں تھے بلکہ کچھ گروہ وسطی اور مشرقی ایشیا کے پہاڑی علاقوں میں بھی رہتے تھے۔