🤍🌀 رواياتي حلقات 🌀🤍
February 1, 2025 at 01:59 PM
*#داري《64》*
*#بقلم_نودين&ننس تمدين*
*ہہہـ٨ــــ♥︎ہہہـ٨ــــ♥︎ہــہہہـ٨ــــ❥ :00:00* **
"*ما قبل الأخيرة*"
#داري "64"
"لأن كفك كان بمثابة غيمة أتكئُ عليها،
لم أذبل، حتى عندما صارت الأيام جفافًا
قفارًا، لم أذبل.. لأن المطر لم يكن في
السماء، بل في أعماق قلبي))
______________________
"الراوي"
الحياة أبدًا ما كانت رتيبة ومملة لناس بتحبها .. ناس قادرة تصنع من أبسط لمة عيد .. ناس بتعافر وتتعب وتحاول مرة وإتنين وعشرة .. ما كانت حياتهم سهلة بس هم متمسكين بالأمل .. عندهم إيمان إنو طالما الأسرة بخير كل شي حيكون تمام .. كبارهم كانوا بحمدوا الله كل صباح على نعمة العافية واللمة واللقمة .. علموا أولادهم إنو النِعم بتزول لو جهدوها وبتزيد لو شكروها.
كل واحد فيهم عندو مشكلة ما بيديها أكبر من حجمها وشايف إنها بتهون مجرد ما يقول الله يسهل ..
"عند عزيز وننا"
حياتهم كانت ضاغطة بشكل ما طبيعي من تفكير في المصاريف لـ تجهيزات الولادة الكانت على وشك .. رغم ذلك قاعدين بكل هدؤ وبفكروا بعقلانية كيف يواجهو الحياة وهم مع بعض ..
=وكده ما فضل شي إحتياطي.
_ما ضروري أصلًا ما فضل شي كتير الشهر الجاي الله يسهلا بنلحق نتم الناقص.
=عزيز لو ناس بيتكم إحتاجوا لحاجة خارج الميزانية؟
_إن شاءالله ما بحتاجوا ولو حصل الله كريم ما تقلقي يا ننا أنا حأتصرف.
=الولادة دي موضوع ياخ.
_حنونة بتجي بي رزقها وبتجيب معاها لأبوها كمان.
=يعني مُصر على الاسم؟
_أي والله .. بس لو ما عاجبك...
=لأ ما كده والله.
_طيب مالك كل مرة تسأليني؟
=عزيز إنت متأكد ده مجرد اسم عاجبك ساي ما في كده ولا كده؟
_دقيقة أتأكد و...
="ضربته بالكراس الماسكاه"
_بتشرطي وتضيعي حسابتنا يا مرة.
=مرة في عينك يا عزيز.
_عيني وقلبي وكل حتة والله.
____________________
"عند كريم ونود"
الوضع ما كان أحسن شي عندهم .. نود طول فترة الحمل كانت بتعاني بسبب النزيف الداخلي الحصل ليها .. وحملها إتصنف إنو بمر بمرحلة خطرة .. ده غير تعب الفترة الطبيعي .. كل مقابلة بتظهر مشكلة .. مشاكل تغذية .. إنقباض في الرحم .. ضغط في الحوض .. إتهام بإنو المشيمة قد تكون متضررة .. وأخر شي قلة في حركة الجنين .. الجو إتحول من حماس الأسرة لإستقبال اول "حفيدة" ليهم "حسب توقعاتهم" لتوتر وخوف وقلق على نود الكل يوم حالتا ماشة أسوأ .. كريم جا قعد جنبها بيأس وقال:
_نود والله أنا بقيت خايف عليك شديد وأمك قبيل قالت ترجعي تقعدي معاها لو دي حالتك.
=أخليك لمنو؟وبعدين أنا كده كده اليوم كله معاهم وبقيت أرجع البيت لما إنت تجي بس.
_قومي نرجع الدكتورة تاني حالتك ما عاجباني.
="تنهيدة" .. بقيت بكره المستشفى وريحتا وشارعا والله.
_طيب الله يرضى عليك أكلي أي حاجة دمك بسيط وفي مية مشكلة بتعقديها بعدم أكلك ده.
=ماما قبل شوية رسلت لي نشا تبلدي تلقاه في المطبخ .. كب لي في كباية الشاي بس أكتر من كده ما بقدر أشربه والله .. وعليك الله ما تضغط علي أنا قاعدة أحاول والله.
_نشا براو ما حيمسكك حأجيب ليك حاجة تاكليها اول عشان تاخدي الحبوب.
=ياخي ما بحبهم طعمهم كريه.
_قربت تهون يا حبي.
=أخر مرة أقول عاوزة بيبي والله.
_كدي أولدي ولدك ده بالسلامة اول .. وبعدين نشوف البحصل تاني.
=بتي لو سمحت.
_لو شفتيها وعرفناها ولد ولا بت مش أحسن من الغموض والتشويق البتمارسي فينا ده؟
=لأ نتفاجأ كلنا بعدين بس.
_الناس إطورا إلا نود عاملة زي الحبوبات.
=أمشي جيبو قبل يطلع من نفسي.
_حاااضر يا حبي أجيب ليك لبن طير لو طلبتيه.
=بتقول كده عشان عارفني ما حأطلب مش؟
_إشتقت لطلباتك والله .. أبقي كويسة سريع عشان ترجعي زي اول وتعملي لي دراما وجو في حياتي.
="مسكت يده".
_حتبقي كويسة وده كله حيبقى ذكريات لما تشوفي أميرتك الحلوة أو ولدك البطل قدامك .. يا الله من التخلف والعوارة هسي لو شفتيهم ووريتينا بجيك شنو؟
=كريم أنا قلت ليك حاساها بت وغير كده الدكتورة قالت بوضوح إنو حركة الجنين بسيطة خالص وتكاد تكون منعدمة وفي إحتمال كبير إنو ... "سكتت" .. المهم أنا ما عاوزة نتعشم وأهلك كمان متحمسين جدًا فنسيب الموضوع لربنا بلاش حماس وتجهيزات لو ربنا جاعل لينا نكون أب وأم سواء كان لولد أو بت حنكون مبسوطين بيهم والبجي من الله كله حلو.
_"طبع بوسة على جبينا" .. على كل حال أنا بحبِّكوعاوزك تبقي كويسة بس ده كل همي حاليًا .. قادرة تتخيلي كريم الزمراوي شخصيًا حياتو كلها واقفة عليك؟وما عاوز شي من الدنيا دي غير إنك ترجعي تصدعي بقصصك وتنكدي عليه؟
="إبتسمت" .. سجل لي الإعتراف ده في ريكورد أو مسج بالله عشان أذلك بيه كل مرة.
_"ضحك" .. أحلى من يذلني والله.
=حبيبي والله يا كريم.
______________________
"عند مفاز"
في الفترة الفاتت حياتا كانت رتيبة وروتينية .. شغلة البيت الما بتخلص .. نضافة، فطور، قهوة، غدا، غسيل ومكوى .. وتمشي تساعد نود برضو .. ملل وعدم هدف وعدم موضوع .. كانت حابة تنزل كورس بس الظروف جات معاكسة .. وفجأة البيت كله بقى عليها وريف جارية مع إجراءات الجواز وتوثيق الشهادات .. ونود عيانة واليوم كله راقدة معاهم بحاولوا معاها عشان تاكل ليها حاجة .. إرتمت بتعب في الكنبة بعد خلصت شغلها .. نود سألتا بصوت مرهق:
_خلصتي؟
=أي.
م
_حتمشي اللمة؟
=مفروض من قبيل أمشي أسرار مرسلة لي مرتين والله.
_طيب أمشي وإعتذري لي منها أنا ما حأقدر أجي.
=إن شاءالله تبقي كويسة ليوم العرس.
_هو بعد يومين خلاص بس بحاول والله.
=كرر علي يا نود بحياتي ما شفتك كده .. بتك ولا ولدك ديل بكفتهم ليك بعدين لو جو عشان تعبوك.
_إنتِ فاكرة أنا حأرضى فيهم؟
=بعد التعب ده؟؟
_إنتِ ذاتك تعبتي ماما لما ولدتك مالنا ما كفتناك؟
=ما كفتوني لأنك إستعبدتوني ما صدقتو ولدوا ليكم خدامة.
_"ضحكت" .. ياخي ما تضحكيني الطعنات بتقوم علي هسي.
=خليتك طيب أنا ماشة عاوزة حاجة؟
_سلمي للبنات بس.
=حاضر يصل.
______________________
"عند مودة ومعتصم"
برغم التوتر الحصل الفترة الفاتت إلا إنو علاقتهم ما إتأثرت معتصم كان مصر يتمسك بيها وحتى كلما إنو علاقته بيها حاجة وعلاقته بأخوها حاجة تانية وفي كل الأحوال هي ما ليها دخل ..
_مودة أنا ما جاي أقول ليك إنو عشان خاطرك أنا حسامح صلاح والكلام بتاع المجاملة ده .. صلاح غلط وما راعى لي ولا لعلاقتنا وإتعدى حدوده مع أختي وصحبتا ودخلنا في ضفورنا مع الجيران بس ده ما ليو علاقة بيك .. وأنا شاريك وعاوزك ومتمسك بيك لحدي أخر لحظة والشينة إلا لو تجي منك إنتِ .. بس أنا ما بحاسبك على عمايله وعلاقتي بيهو ك ود عم باقية غصبًا عني والدم ما ببقى موية بس ك صاحب وقريب هو إختار يخسرني براو وأنا ما عندي بيهو شغلة تاني .. هسي أنا بكرة جاي لأبوك عاوز أعقد مع أسرار أختي مرة واحدة عشان نعمل مناسبتنا سوا .. إنتِ ما عندك إعتراض صح؟
="بحماس" .. بالله أسرار خلاص عاوزة تعرس يعني؟
_كدي خليك من أسرار نحن ذاتو عاوزين نعرس أها قلتي شنو؟
=إنت أصلًا ما أديتني فرصة بس خلاص يعني حأعرسك بس أعمل شنو يعني؟
_"ضحك" .. أنا البعرسك يا حلوة ما إنتِ البتعرسيني.
=ياخ المهم عرس .. عرسني ساي أصلًا عندنا فاينل بعد إسبوعين.
_"ضحك" .. هو عقد بس وحترجعي تمتحني فاينلك بمزاج.
=لالا ما عاوزة كده يا زول.
_ما تخافي أنا والدبلة حنفتح ليك نفسك للقراية.
="بإبتسامة" .. طيب موافقة.
______________________
"في بيت ناس أسرار"
ننو جات داخلة وزغردت .. تبعتا مفاز وروان كمان حاولت .. خالتو بثينة استقبلتهم وهي بتضحك..
_غايتو يا روان إنتِ برضو علموك؟
=والله يا خالتو بثينة البباري ننو وززة بمشي الكوش.
مفاز: يختي تبوسي يدينا وش وضهر لأننا في حياتك.
نتالي: وريها بالله هسي كان تلقي صحبات زينا وين لو قعدتوا في الخرطوم وما جيتو أمدرمان بلد الحنان دي؟
روان: سكتا والله .. رداحات بشكل فظيع.
بثينة: إتفضلوا إتفضلوا ما تتشاكلو برة تمو شكلتكم جوة.
دخلوا ولقوا أسرار بتتمسح ..
مفاز: العروس السمحة ورزينة .. عاملة شنو جاهزة؟
أسرار: والله ياهو شغالة أتمسح صباح ومسا.
ننو: هو بحبك في كل الأحوال.
روان: هو قال ليكي قولي ليها كده؟
مفاز: يا زولة برضو إتمسحي السماحة إجتهاد هسي أنا مبلولة شغلة بس لابسة الشاور كاب عاملة ماسكي وشراباتي ومسوحاتي ما وقفوا كله ولا الغبشة.
أسرار"ضحكت": صح والله.
ننو: كدي خلونا من المسوحات حنلبس شنو ويوسف فاجأنا بالعرس كده.
مفاز: وما تنسوا راجيانا خطوبة رونة ونحن مفلسين ما عندنا حق الفساتين.
روان: خطوبتي دي أصلًا ما تشيلوا ليها هم ما عاملين موضوع .. حاجة بسيطة إنتوا وأمو وأبو بس .. أخواتوا ذاتو كل وحدة في حتة وما حيقدروا يجوا.
ننو: عندي فكرة نأجر فساتين بعرف وحدة عندها فساتين رهيبة بدخل ليها وبكرة نمشي نشوفا.
روان: تعالوا نلبس من فساتيني بس أنا جبت لعرس كيمو 4 ما لبست غير اتنين وعندي واحد جديد جابتو لي عمتو حنان هدية لما جاتنا قبل كم يوم.
مفاز: المشكلة مقاساتكم ما بتلبسني.
ننو: نعمل ليك شنو وإنتِ بتنحفي كل يوم ماشة تبقي سلك أقاشي.
أسرار: ززة أنا عندي ليك فستان بتاع ننا بقى ضيق فيها حيكون جاي معاك زط.
مفاز: نحن بنخطط من ورا روڤي حتجي تزعل مننا وتخاصمنا.
روان: إتصلي ليها تجي حالاً.
مفاز: نايمة جات تعبانة قالت ما يصحوها.
أسرار: ما مشكلة أنا بدي روڤي فستاني الجبتو لعرس نود والترزي ما ظبطوا لي ما لبستو وقتها.
مفاز: خلاص يلا نشوف البعدو المكوى والتساريح والمكب.
ننو: رحوقة بتمكيجنا ونكوي عند سحر بيوتي بكرة نمشي نحجز.
روان: فضل شغلة البيت.
مفاز: ناس أسرار أصلًا خالاتا جايين والبيت جاهز وعشان عقد معتصم برضو مظبطين من بدي .. نمشي مع ننو نجهز معاها ونجي هنا قبل العقد للضيافة.
أسرار: بحبكم.
مفاز: بري حبي راجلك تحبي فينا شنو.
روان: والله يا سرو أنا غايتو بحبك برضو لكن صح كلام ززة راجلك أولى بيك.
ننو: راعو إنو البت بتخجل مني عشان أنا حماتا.
أسرار: حمى يختي.
روان "ضحكت" .. واااي.
مفاز: ننو بقيتي حماة للمرة التانية شعورك شنو؟
ننو: المشكلة ما بحترموني كـ حماة كان هي كان أختها منكشحين فيني كأني بت جيرانهم.
روان ومفاز بصوت واحد: ما إنتِ بت جيرانهم أصلًا.
______________________
"صباح عقد يوسف وأسرار"
" لسان روان"
لينا أسبوع بنجهز في تفاصيل العقد مع أسرار .. من فستانها الحتلبسه لحدي أصغر تفصيلة بتخصها .. وفي نفس الوقت أسامة قبل يومين كلم أهلي إنو أهلوا نزلوا السودان وجايين عشان يطلبوني رسمي .. كنت واقعه من الصباح نضافة مع نتالي في بيتهم وقبل الضهر بشوية بس خلصنا .. ياسين جا لقانا كل وحدة مرمية في كنبة ومفاز رابطة راسا بتمر في الترابيز حقت الديوان.
ياسين: مالكم للان ما جهزتوا نفسكم .. الناس ديل حيصلوا ويعقدوا طوالي.
مفاز: كأنه كنا مستنينك تجي وتورينا !!
روان: عليك الله يا يسو شيل طاقيتك واطلع خلينا في الفينا.
ننو: اي بالله فارقنا.
ياسين: بطريقتكم غايتو كل وحدة بقت شبه أي حاجة وأقرب لأي حاجة إلا البني أدم الطبيعي.
مفاز ونتالي: خلصتا !!؟
ياسين:طالع طالع.
شال طاقيته وطلع .. بعد مفاز خلصت وأخيراً ولعنا البخور وشيكنا على البيت كله وما طلعنا الا بعد خالتو فاطمة جات ومعاها روضة .. من هناك مشينا بيت ناس أسرار .. ننا كانت في المطبخ مع أمي ونود راقدة في غرفة أسرار جوة قالوا تعبت شوية أساساً ليها فترة في الحال ده لدرجة بطلت تمشي الشغل وكريم طبيعي متابع معاها بالتلفون .. مشيت لماما سألتهم اذا عايزين حاجة قالت لي ماف شي مهم بس أمشي أجهز وأجي عشان أسرار حتجي من الكوافير مع وريف.
رجعت البيت إستحميت عملت ماسك لوشي مسمينه انا والبنات "أبو سريعة" قبل أغسل وشي تلفوني اتصل رديت ب:
_يا أسامة.
=يا خطيبته إلا يومين.
=جيت ولا لسة؟
_في المسجد أنا شوية كده والعقد حيبدأ.
=ربنا يتم ليهم على خير ان شاء الله.
_وعقبالنا يا دكتورة.
=عاين ماشة أجهز نفسي قبل الزمن يضيق لي.
_ما تطلعي حلوة شديد.
=الله !
_كلمتك بس.
=مع السلامة يا أسامة
_مع السلامة يا روانة.
قفلت منو جهزت وززة غشتني ومشينا.
______________________
"بـ لسان يوسف"
آخر جُملة سمعتها بعدما كنت حابس أنفاسي ومتماسك شديد "بارك الله لكما وبارك عليكما وجمع بينكما في خير"
تبريكات وتكبيرات من الشباب وسلام بين أعمامنا الكُبار ومقالدة بيني وبينهم إنتهت بيني وبين أخوي الكبير عبد العزيز.
_ألف مبروك أبشر يا عريس .. بيت مال وعيال إن شاء الله يا يوسف.
قبل أرد كريم جراني من عزيز وسلم علي سلام شديد ودخل يدو في جيب جلابيتي .. قبل أفهم أي حاجة جو التيمان مسكوني .. طلعنا من المسجد جزو من الناس مشوا بيتنا وجزو كان معاي وأنا ماشي بيت نسابتي .. علي شغلا لي ونحنا في الباب وسامعين صوت الزغاريد حق النسوان.
علي: يدك فووووق يا عريس.
يوسف: لو ما حتسكت احسن تفصل نفسك من هنا .. ده حدنا يا صحبي.
علي: العرس عرفناه بغير البنات إنت كمان مالك ؟
عثمان: والله بغير كله يا صحبي.
علي: إنت التاني كمان شكلك ناوي قريب.
عثمان: جهز نفسك بس وأرخي جسمك خلي البنج يمش.
أصوات دلوكة وغنا صادر من حوش بيت العروس:
سيرو العريس بريدو
سيرو الليلة يوم جديدو سيرو
ده يوسف بريدو .. سيرو
الليلة يوم جديدو سيرو.."
يوسف: بسم الله
علي بصوت عالي وصفافير: أبششششششر أبشششششر أبشرررررر
دخلت وانا منزل راسي ما كنت متوقع أول زول ألاقيهُ أمي .. حضنتني وبقت تبكي وبعدها ننو .. غايتو مسكت نفسي عافية ورجالة بس .. بست راس أمي واتقدمت خليت علي وعثمان وراي .. البنات كانوا شغالين دق دلوكة صاح وزغاريد .. إتخطيت الأمة دي كلها ودخلت الصالة لاقيت إيناس طالعه باركت لي :
_ألف ألف مبروك يا يوسف إن شاء الله ربنا يسعدكم ويهنيكم.
=الله يبارك فيك وعقبال الشباب كلهم يارب.
_سرو مستنياك جوة .. قلنا نعمل ليكم قعدة بسيطة كده عشان زمن سفرك ذاتو ضيق .. فاجأتنا غايتو يا يوسف.
=ما بتقصروا والله .. وإن شاء الله معوضة في الافراح الجاية.
صوت من بعيد: يا ننااااا
_دي ننو .. كده خش إنت للعروس ماشة أشوف أختك دي مالها بتكورك كده.
إبتسمت ليها ودخلت لجوة شوية .. شايف أسرار واقفة لابسة فستان أحمر ومدياني ضهرها .. شعرا نازل على طوله .. وقفت وراها بينا مسافة بسيطة ..
_يا أم آية.
إلتفت علي والدموع لمعت في عيونا .. دقايق من الصمت ماف واحد قادر يقول حاجة للتاني .. قربت منها وضميتا علي .. ما كنت قادر أقول أكتر من :
_مُباركة علي إنتِ يا أسرار .. الله عالم كنت بمر بشنو وبحس بشنو وانتِ بعيدة .. الحمد لله إنه آخرة الصبر طلع "قسيمة زواج بيني وبينك"
="بكى متواصل"
_أسكتك كيف هسي أنا ؟؟
="ضربتني في صدري بزعل" .. نسيت كمان الناس بسكتوهم كيف !!
_والله كنت ناوي أحترم نفسي لحدي ما ورقك يخلص وتجيني .. لكن طالما عقدنا فخلاص ياها ذاتا البسمعوها حلاوة العقد والبدايات.
"عناقٍ واحد
قادر على إحياء شغفك
أملك
ورغبتّك في الأستمراريه
قادر على منحك
كلِّ هذهِ البهجة))
______________________
"في غرفة مودة"
نسبة لإنو العقد جا بسرعة وفي فترة كلها تنشنة وضغوطات ما عملوا تجهيزات كتيرة .. حاجة على الضيق وقدر الأسرة فقط .. جا معتصم يبارك ليها بعد كل البنات طلعوا من الغرفة اول ما وقف قداما لفت عكس منه ..
_لالا العوارة دي خليها ليوم العرس بعدين .. هسي عاوزين نستغل كل ثانية قدامنا قبل يجي زول.
="خجل وسكوت".
_ومافي وقت للخجل برضو .. "قرب منها وحضنا" .. همس: أخيرًا يا بت العم.
=ما بت عمك ولا حاجة.
_خلاص مرتي كيف وكيف؟
=أيوة إتعدل كده.
_أنا شايفك إنتِ الماشة كويس.
="ضحكت" .. طيب بارك لي اول قول الكلام البقولوا داك.
_"زحاها من حضنه شوية وحاوطا بيديه وقربا منه" .. وريني هم بقولوا شنو؟
=وووب من الجبته لروحي.
_"ضحك" .. هو شنو؟
=معتصم خلاص فكني أنا ما بحب اللصيق ده.
_لحدي ما يجي زول وينقذك مني.
=مبسوط؟
_يوم ما كنت مبسوط كده .. وإنتِ؟
=أهلي لسة زعلانين وما عارفة حاسة كأنو كل حاجة في حياتي ما بتحصل برضاي .. أنا بحبك يا معتصم وعاوزة أكمل حياتي معاك بس ما عارفة حتى أقرر كده براي .. وحقيقي قدر ما حاولت أتعايش مع فكرة إنو دي حياتي كده غلبني.
_معليش يا قلبي .. أنا عارف ومتفهم زعل أهلك وبالمناسبة إخترت كده قصدُا عشان أنهي المشاكل دي ونخلص ونعيش حياتنا في سلام .. أهلي برضو لسة ماخدين موقف بس إتأكدي هم ما عندهم مشكلة معاك ومتقبلينك .. عملت العقد في الوقت الضاغط ده عشان ما في زول يقول كلمة أو يعترض تخلصي إمتحاناتك دي ونعمل العرس ونعيش حياتنا لروحنا وتعملي كل العايزاه بدون ما تحسي نفسك مجبورة.
=طيب ان شاءالله.
_وين الإبتسامة؟
="إبتسمت".
_مافي لي اي حاجة؟
="حاولت تفلت منه".
_إنتِ مالك مستعجلة أنا ما نايم معاك هنا هي كلها 5 د خليكِ.
______________________
"بعد يومين"
"في بيت الزمراوي"
نود جات مع كريم سلموا وقعدوا .. علي جا من برة ..
_اوو بتنا كيفك يا؟
كريم: إنت مع نود؟
علي: لالا مع بتنا العندكم.
نود: يا علي أقعد ساي كريم ده أخلاقو بقت حبة اليومين دي.
كريم: عندك معانا حاجة يا زول؟
علي: أي عندي بت عندكم.
اوسو: مالكم مشتبكين في المناسبة السعيدة دي؟
روان: أنا في شنو ويا أمي عيالك ديل في شنو .. بتزعلوا والله يعني بدل تساعدوني قاعدين تتناقشوا .. نود خشي غرفتي وإرتاحي ديل ما عندهم موضوع ياخ.
كريم: أنا محترم أمي بس وساكت ليكم.
هدى: لالا ما تحترموني ولا حاجة .. كبار زي ده بتتشاكلو في بت من بطن امها ما طلعت.
روان: حتى إنتِ يا ماما .. تعالوا هنا إنتوا القال ليكم هي بت منو؟ إذا أمها ما شافت نوع البيبي بتتخيلوا ساي؟ وخلوني من بتكم الما جات دي وساعدوني الناس قربوا يجوا والشاي ما عملتو وملايات الصالون ما فرشتها وشوفوني عاملة كيف؟
علي: على فكرة انتِ ذاتك هسي قلتي بت أها عرفتي من وين؟ أنا حاسي إنكم عارفينها بس ما عاوزين تكلمونا أنا وأوسو.
عثمان: أنا أصلًا رجل كرسي في البيت ده.
كريم: مزهرية قصدك.
علي: يا زول ما شغلتك بيهو إن شاءالله يبقى غير مرئي.
عثمان: إنتَ كده نظام بتدافع لي؟
هدى: قوموا ساعدوا أختكم الناس قربوا يجوا يلقوها منكشة كده؟ أمشي يا روان سرحي شعرك وأجهزي أنا بعمل الشاي وهم يغييروا الملايات .. نود أمشي معاها إرتاحي جوة.
نود: أنا كويسة حأدخل معاك المطبخ و...
هدى: إلا كان جنيتي مطبخ شنو يا بت .. اول مرة تدخلي ولا أخر مرة .. أمشي إرتاحي حبيبتي المطبخ ده دخلتيه مية مرة وقاعدة العمر كله معانا لاحقة تدخليه .. بس صحتك أهم هسي.
كل واحد مشى يشوف شغله جات مفاز ونتالي ساعدوا روان تجهز .. وبعدها جات وريف وقعدوا في المطبخ خلوا خالتو هدى تدخل تجهز برضو .. بعد المغرب أسامة وأهله وصلوا .. بعد السلام الحار والضيافة والونسة أمه إتكلمت ..
مواهب: وينا عروستنا يا جماعة نادوها أشوفا.
هدى: والله يا مواهب بتي دي واحدة ودايرين تشيلوها مني تحيروني فيها؟ أقبل وين بتقطعوا راسي أصبروا حبة ما قنعانة منها والله.
مواهب "ضحكت": ما بتقنعي منها كان حرسناك لكن معاك حق فراق البنات حار أنا لسة متجرسة من فراق أسماء وإسراء والله فرقوا معاي شديد.
السرة: كل زول بي فرقتو ما في زول بسدها ليه .. إلا ياهو حال البنيات ضيفان وبجي يوم يمشن .. بس نسأل الله يسعدن ويثبتن في بيوتن مستورات وهنيات .. "ندهت بصوت عالي شوية" الروضة .. كدي نادي البنيات ديل غطسن كدي وين.
مواهب: والله يا خالتي معاك حق .. الواحدة في النهاية لبيت راجلا أسامة لما قال لي أنا لقيت عروس فرحت بس لما عرفتها روان زغردت ليو عديل .. نحن أحسن من بتكم ما بنلقاها والله .. الله يقدرنا ونسعدا ونشيلا جوة عيونا .. روان بتي من زمان وهسي ما في شي حيتغيير الا لو للأحسن.
جات روان ومن يمينا مفاز وعلى شمالا نتالي .. سلمت للرجال القاعدين طرف شوية .. وسلمت لمواهب الوقفت وأخدتا بالأحضان .. قعدوا شوية وكلمة كلمتين مواهب سألتا ..
_روان يا بتي .. أسامة ده ما يكون إتفق مع اخوانك وما أخد رايك .. باقي هو راسه قوي مرات وبعمل الدايرو يس.
روان عاينت ليه نظرة سريعة وردت بخجل : لالا يا خالتو مواهب ما كده.
مواهب: أها الحمدلله يعني متفقين سوا.
هدى "ضحكت" .. غايتو يا مواهب حركاتك دي ما بتخليها خجلتي لي بتي.
مواهب : بطمن إنو ما جبرتوا البنية باقي أخت الأولاد مظلومة ومسكينة ولا ما كده يل خالتي؟
السرة: كلامك نجيض وفي محله يا بتي .. لكن أولاد الزمراوي ديل ما عشان قدامم والله إلا ما ظالمين حاشاهم.
بعد ونسة كتيرة أخيرًا قعدوا أسامة وروان جنب بعض ولبسوا الدبل وسط مباركات صحباتا وأحضان أخوانا .. قبل يطلعوا وهم في الباب كريم خت يده على كتف أسامة وقال ليو:
_أديناك أغلى حاجة عندنا .. أمانة في رقبتك ليوم الدين .. بينك وبين ربك لا تزعلا ولا تضايقا .. شفت منها حاجة ما عجبتك أنا صحبك قبل أي حاجة تعال كلمني وأشكيها لي .. وأنا متأكد الشينة ما بتجي منها .. إنتبه ليها شديد أنا برضى في نفسي بس ما برضي في روان.
=إطمن يا صحبي أختك أشيلا في راسي وأختها في عيوني .. عهد بيني وبين الله وكلام رجال بيني وبينك أنا كمان ما بغلط عليها طول ما فيني نفس.
إتسالموا وودعوا بعض .. رجعوا أخونا باركوا ليها ولموا معاها الحاجات .. شوية وسنية وفاطمة وبثينة وننا ووريف كلهم جوا باقي الليل داك باركوا وشربوا البارد ولحقوا ضيافة الخطوبة .. قضوها سهرة لوقت متأخر لحدي ما كريم إستئذن اول ..
_يلا يا نود نمشي عشان عندك دوا زمنه جا.
بعدها كل واحد مشى في حال سبيله.
_________________________
"مكالمة"
_أطلع وين يا يوسف إنت جنيت ؟
=جنيت كيف يعني؟ الواحد لو عايز يشوف مرته معناها مجنون ؟؟
_تصدق نسيت.
=كده هسي إستعجلي ياخ عشان أرجعك بدري.
_والله دي عوجه دي .. أقول لأهلي شنو هسي ؟
=مافي زول بسألك أنا إستئذنت منهم .. تعالي طالعة حتلقيني واقف ليك بعربية كريم قدام الباب.
_عربية لشنو ماشين وين نحنا ؟!
=تتذكري زمان كان نفسنا نعمل كار ديت .. هسي حنعمله بالحلال في أحلى من كده !؟
_دقيقة ألبس عبايتي وأجيك.
=وتحت العباية !؟
_يوسف إتلمى.
=أسرار أنا والله عاقد عليك وزوجك عديل ما تشككيني في نفسي .. وتخليني أستغفر على ذنب ما إرتكبته.
_"ضحكت" فهمنا خلاص يلا جاية.
قفلت منه وقمت دخلت في أحلى فستان اشتريته من فترة طويلة ولأنه ما ينفع يتلبس غير لراجلك قررت أخليه مركون في الدولاب .. وأخيراً جاا وقته .. لبسته ولبست من فوق عليه العباية .. عملت ميك اب خفيف وروج إنجليزي رهيب .. لبست طرحتي "نص توب + نقاب بدون إسم" .. طلعت لقيت يوسف واقف فعلاً ومعاهُ معتصم أخوي .. قربت أرجع بس هو ودع يوسف بالعبارات المعتادة المعروفة دي بعدين مشى إتجاه شجرة خالتو زينب.
_سلام عليكم.
=وعليكم السلام حبيبتي.
_ابتسمت من تحت نقابي.
=يلا ؟؟
فتح لي باب العربية ركبت وبعدين طلع هو وإتحركنا .. اول ما طلع من الحلة طلع لي الجوينتات حقتي وبقى ماسك يدي وسايق بيد.
_"سحبت يدي "
=جيبي يدك دي يا زولة.
_حنعمل حادث ركز في سواقتك.
=مركز فيها وفيك.
_يا يوسف.
=حبيب يوسف.
_ممكن تقيف طرف الشارع دقيقة.
=مالك في شنو ؟؟
_أقيف بس.
وقف العربية وبقى يعاين لي..
_أنا عاوزة أعرف كيف قدرت تمسك نفسك كل الفترة الفاتت وعملت شنو في غيابي واحكي لي بالتفصيل.
=لا ما هو نحن ما عندنا وقت للحكاوي دي هسي .. خليها لبعدين لما أسافر حنتونس فيها هسي الوقت للعمل وكدي جيبي حتة من تحت النقاب.
_ياخي إستغفر الله من قلتدب الشيوخ.
=شيخ منو؟ الترابة في خشمك لو فاكرة عرستي شيخ.
_"ضحكت" .. وعادت حليمة لعادتها القديمة.
=وكله بما يرضي الله .. المهم أنا مشتاق ليك شوق ما يعلم بيه إلا ربنا قدر ما اوصفه ليك ما حتتخيليه.
_ياخي أنا كمان والله .. ما إتخيلت أصلًا يجي يوم ونرجع تاني.
=نتلمى قصدك .. كدي هسي ما تجي قريب مالك بعيدة كده .. ما كفاية المسافات الكانت بينا؟ والله بكرة اسافر وتشتاقي لي أحسن ليك استغليني من هسي وأشبعي مني.
______________________
"فرنسا"
"مستشفى سان جاك – وحدة الطب النفسي –"
داخل مكتب د. شهد الهادي .. غرفة مرتبة بألوان هادئة .. مكتب خشبي بسيط عليه ملفات وكوب قهوة دافئ نبتة خضراء صغيرة.
د. شهد الهادي من أم فرنسية وأب سوداني الجنسية في آواخر العشرينات، أنيقة بزي طبي بسيط، نظراتها حادة لكنها دافئة .. أمامها يجلس صلاح أحمد بملامح متعبة لكنه يحاول التماسك يضع إحدى قدميه فوق الأخرى ويداه معقودتان بتوتر..
د. شهد (بهدوء وتحليل ولكنة فرنسية عصية): صباح الخير صلاح. كيف حالك اليوم ؟؟
صلاح (بابتسامة ساخرة): أفضل مما كنت عليه البارحة ... وأسوأ مما سأكون غدًا على الأرجح.
د. شهد (تبتسم بهدوء وتدوّن ملاحظة): إجابة فلسفية ... هل تعتقد أن مزاجك متقلب اليوم؟
صلاح (يتنهّد): أنا كتاب مفتوح لكنني أعتقد أن الصفحات أصبحت تتغير دون أن يقلبها أحد .. كأنني في القاع وأحياناً أشعر أنني فوق العالم
د. شهد (تنظر إليه باهتمام): متى آخر مرة شعرت بالهدوء؟ بدون هذا الصعود والهبوط؟
صلاح (يفكر قليلًا ثم يهز رأسه): أعتقد .. قبل سنوات طويلة.
(تدوّن شهد ملاحظة أخرى، ثم تميل قليلًا للأمام، نبرتها أكثر دفئًا.)
د. شهد بلهجه سودانية: طيب خلينا نبدأ من هنا .. من اللي بتحسه الآن من اللحظة دي. أنا هنا عشان أسمعك، وعشان نكتشف مع بعض كيف ممكن نلاقي توازن وسط الفوضى دي كلها
"صلاح ينظر إليها لثوانٍ، كأنه يحاول أن يقرر إن كان يمكنه الوثوق بها، قبل أن ينظر بعيدًا عبر النافذة، حيث تلمع السماء الرمادية، وكأنها تعكس عالمه الداخلي."
______________________
"أحداث متقاطعة"
في لحظات حرجة تهتز لها القلوب … نود تنهار فجأة! الجميع في حالة ذعر، وكريم يركض بجنون حاملاً إياها إلى المستشفى. المشهد يزداد توتراً، الأطباء يهرعون، الممرضات يركضن، وكريم يصرخ بلهفة:
دكتورة، لازم تتصرفي! ما تخلي نود تحصل ليها حاجة.
الطبيبة تنظر إليه بوجه متوتر … الغموض يسيطر على الأجواء … هل ستنجو نود؟ ماذا عن الجنين؟!
لا تفوتوا الحلقة القادمة .. لحظات يمكن أن تغير كل شيء.
#يٌتبع.
#على_الهامش:
" يحدُث أن تسمع كلمة "منزِل" فيخطُر في بالك شخص لا عنوان.))
*☆☆••••••••••••••••••••••••••••••• *يتبــــــــــــــــــــــــــــــــــــــــــــع*••••••••••••••• **•••••••••••••••••• *☆☆*
❤️
😭
😢
👍
🤲
🥹
🥺
🦋
33