#حرمة_حامد [10] #بقلمي_نسمة_عبدالله 🌼 قضينا يوم حلو يومها ...تاني يوم كان جمعة قررنا نطلع من بعد الفطور...لبست و اتجهزت طلعنا على ناس امي ...كنت متحمسه الاقي امي ..وصلنا فتحت لينا سحر اختي سلمت علينا و دخلتنا سلمنا عليهم كلهم و قعدنا نتونس زي نص ساعه كدا حامد ودعنا اتحجج بشغل ضروري وطلع و ح يجي يسوقني العصر كدا ...اول م طلع امي مسكتني من يدي و دخلنا جوا ...حكيت ليها كل الحصل ..قالت لي ..كيف يعني م بياكل من يدك ... رفعت ليها كتفي و قلت ليها ... م بعرف والله بس انا م ح اقنع نهائي ..هزت لي راسها و قالت ...سمية دي حتى انا م ردتها ..قلت ليها ...م قلت ليك انتي قلتي لي لازم ابقيها في صفي بس م ح يحصل كدا شكلو ...قالت لي ...ل اسي انتي ماشة كويس طالما هو في صفك امورك حلوة ...و زي م قال ليك اهتمي بنفسك و ب بيتك...قلت ليها ..والله ي امي نسوان زي القشطه..قاطعتني و قالت ..عشان كدا ابقي شديدة ...قلت ليها ..اصلا .....اتكلمنا عن خطط كتيرة و طلعنا برا ل ابوي ..طلعت امورو ماشة تظبط ..عاملين طبلية جمب مدرسة الحي هو و امي من الصبح يطلعو يعملو الطعمية و يبيعو اسكريم و يرجعو نهاية الدوام المدرسي و سحر و سمر في المدرسة و ممشين حالهم قلت الحمدلله...و نحن بنشرب الجبنة الباب دقا و جات وحدة م بعرفها شكلها من جارات امي الجداد ...م ارتحت ليها خالص ...سلمت علينا و قعدت ..ابوي طلع مننا ..لقيتها سحبت امي طرف و بقو يتوشوشو ..و ملامح وش امي م بتتفسر.... مرات بقول امي دي اضانها لا تقيلة لا شي لانو الشمار دا بتسمعو لكن الكلام العادي دا م بتسمعو ...تمت المرا كلامها و طلعت ...قلت ليها ..أمي دي منو ...قالت لي ..دي بدور جارتي ...قلت ليها...م عجبتني المرا دي ...م ردت علي و دخلت الاوضة و جات معاها كيس ..ادتني ليهو و قالت دا هدايا جات من عماتك و جيرانا في الحلة القديمة ...في تياب و ملايات و ملابس ...قالت لي ...في ناس جابو عدة بعدين وانتي قايمة م تنسيها ..قلت ليها ..إن شاء الله ...اخدت قعدتي معاهم و اتغديت بعد الغدا حامد جا.. شلت حاجاتي و ودعتهم ...رجعت البيت و انا سرحانة في الكلام القالتو لي امي...و جارتها دي عرفت من وين ...معقولة لكن ...لازم اتحقق ب نفسي ...تاني يوم الصباح اتصلت على رماز بعد السلام و كدا سألتها طابخة للغدا شنو كلمتني و طلبت منها ترسل لي عمود...دخلت المطبخ عملت الفطور كنت عدمانة موضوع في شوية غسيل غسلتو عملت الغدا ...جاتني رماز و معاها الحنانة جددت حنتي و شربنا الجبنة ..بعد المغرب جابت رماز العمود و مشت ...كنت عارفة انو دا آخر يوم ل حامد معاي بعد دا ح يقسم الايام من جديد بيناتنا ..رصيت الغدا و قعدنا اتغدينا عادي رفعت الصينية و دخلت المطبخ ....عدى اليوم عادي و كلمني انو يومين عندي ...و يومين عند كل وحدة فيهن ...هزيت راسي ب سكات و سالتو ...حامد انت حاسي ب شي ..هزا راسو ب لا و قال لي ...ب شنو يعني ...هزيت راسي و قلت ليهو ولا شي قلي السفر متين ب الضبط قال لي ...اسبوعين ب الكتير....سكت على كدا ...تاني يوم بما انو اليوم م حقي ...كنت حاسة ب ملل فظيع ...قلت و مالو امشي ل بسمة ...شلت سكري و مشيت ليها ...البيت كان نضيف و مرتب و العيال نايمين سلمت على ب ابتسامة ...ضيفتني موية و عصير ..قلت ليها ..بدور أسألك ي بسمة ..قالت لي طوالي ...قلت ليها ...حامد م بياكل من يدنا ل شنو ..انا عايزة ياكل اكلي ...جات قعدت جنبي وقالت ...م اكذب عليك لكن ل سبب حامد دا اول م يخت لقمة من يدي ولا من يد ربا يمسكوا امساك و استفراغ لمن يمرض ب الايام عدا اكل سمية ...انا شكيت انها عاملة ليهو عمل ..حتى يمة جابت ليهو شيخ و قال ليها ..م عندو اي شي نصيح ...و م صدقت جابت كم شيخ و نفس الشي يقولو ...في النهاية قنعت و فضلنا كدا..يوم فطرنا معاك اتوقعت انو كلمك لانو نحن يوم العرس كلمني و كان صريح انو بطنو م بتقبل اي اكل وانا م صدقتو ...قلت ليها ..معقول ...هزت راسها و قالت ...اوعك تحاولي تغصبي على اكل مرة شلت الغدا حقي و مشيت ل يمة و قلت اتغدا معاهم و كنت عاملة نفس اكل رماز ونفسي غشتني و بدلت الصحانة وقت الغدا و خليتو ياكل اكلي و تعب يومها و عييا عيا شديد قرب يموت و لما بقى كويس عاقبني و من يومها اقتنعت و توبة ي يمة...قلت ليها ...و يعني اكل سمية دا م بيعمل ليهو شي ...هزت راسها و قالت...ابدا انا لسه شاكة انها عاملة ليهو شي بس م في دليل في يدي ...هزيت راسي بحيرة و قلت ليها ..انتي سمية دي كانت بتعرف مرت حامد الأولى...قالت لي ..والله انا م بعرف لكن البعرفو انو من نفس القرية ...قلت ليها يعني اسي نحن مسافرين مكان اهل سمية ...هزت لي راسها و قالت ..اي ...ربعت يدي و قلت ليها ..و ربا دي اهلا وين ..قالت لي ..في بورتسودان اسي قبل شهر كانت عندهم ..قلت ليها ...و انتي اهلك وين ...قالت لي ...هنا في الحلة القدامنا دي ... ضحكت و قلت ليها بختك ياخ ...ضحكت و قالت لي ..الحمدلله الاهل القراب نعمة ...اخدت قعدتي معاها و قمت رجعت....بعد المغرب شلت الغدا حقي و مشيت بيت يمة و حامد لسه م جا...سلمت عليهم و قعدت ...رماز جات قعدت جنبي ب ضحكة و قالت ...م قدرتي تقعدي بلاهو نص يوم ...قرصتها و قلت ليها ..اتلمي ي بت و بعدين انا م بعرف اكل براي و الملل كتلني و بدور أسألك م جيتي الليلة ل شنو ...قالت لي ...كان عندي غسيل و م فضيت ...سكت منها و قلت ليها ...حامد ح يتغدا الليلة مع سمية صح ...هزت راسها ب ايي ...كلامها م تمتو دخل حامد ...سلم علينا و استغرب قعدتي طبعا...قلت ليهو م تعاين لي كدا مليت قاعدة براي .. و م بعرف اكل براي عشان م تحمر لي ...هزا راسو و قال ..اسي انا سألتك...هزيت راسي ب ايي و قلت ...من جيت و قاعد تحمر لي ...ضحكت يمة و قالت ...صحي كلامها و خليها تونسني بدل تقعد تعاين للحيط...عاينت ليهو ب ابتسامة ..ضحك و قال ..قلبتو علي يعني ...يلا معاكم سلامة ...عاينت ليهو و هو طالع و قلت اممم هدا كويس و م عندو عوجة ...معناته كلام المرا صحي ........ ي امي ...قالت ليهو ..نعم ..قال ليها ..ابوي في الأسبوع دا جاي ...عاينت ليهو و قالت ...دقا ليك يعني ...هزا راسو و قال ...اي جبيل بنتكلم نحن ...قامت منو و قالت ...و طبعا جايب مرتو الجديدة ...قال ليها ..و يعني شنو ...جات حبوبتو و قالت ليهو ...امشي انت ي أمجد...مشي منهم قالت ليها .. م تكشري لي وشك دا ...م صحي كلامو و يعني شنو ...انتي براك ركبتي راس و اطلقتي..كنتي متأملة يرجعك ...قالت ليها ..أمي اختيني...قالت ليها ..بختاك و مالو ..قلت ليك حامد راجل و عندو كلمتو انتي سويتي فيها الماف زيك و ح يجري وراك و هدا اثبت ليك انك ولا على بالو ...قامت من جنبها ب زهجة ...امها قالت ليها ...و هديك سمية معززة مكرمة و انتي ب جاي مرمية.... ........يتبع يا ربي كلام المرا كان شنو ؟؟؟🤔 يتبع