#بوست_نثبتُه_لينا_كبنات35♥️ -في مرة من المرات كنا في قعدة بنات والونسة حقيقي كانت لطيفة جدًا.. وكان في مواضيع كتيرة تقريبًا اتكلمنا فيها، وفتحنا موضوع الشعر والبشرة والعناية عمومًا وغيره، والبنات ذكروا بعض البنات المعروفات في الانستا واللي محتواهم جزء منه كيف بهتموا بشعرهم وبشرتهم.. واحدة من البنات قالت ليهم جملة: "إذا عندك قروش أكيد ح تصلي مرحلتهم دي وتكون بشرتك وشعرك زي ما بتتمني!" -اليوم.. وانا بتذكر جملتها دي.. بختلف معاها في نقطتين أساستين: النقطة الأولى بتذكرني ليها الآية: ﴿ وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ﴾♥️ في مبدأ اللي بحب اكرره كتير وعلمنا ليهو أستاذ قصي جزاه الله خير الجزاء وهو "سقف الممكن المتاح!" بمعنى: ما تعايني وتركزي للأشياء اللي حاليًا ما متاحة بين يديك، شوفي بين يدك شنو، ربنا اداك ليهو ورزقك، واستفيدي منه، ورزق كل شخص معلوم ومقدر، فما تضيعي وقتك في التفكير في انه ما عندي، شوفي اللي عندك حاليًا شنو، وكيف ممكن تستغليه صح. الماسكات الطبيعية أغلب مكوناتها موجودة في مطبخ أي بيت، تقدري تستخدميها وبتعطي نفس النتيجة، وما بس كلام، عن تجربة وتجربة بنات كثيرين، وربنا لمن يفتحها عليك أكيد ح تعرفي كيف تعزي نفسك وتشتري الماركات، وما بننكر أبدًا تأثير الحاجات الحلوة الغالية والماركات، بس كل ما فكرتِ بنظرة أوسع من فكرة أنا ما عندي والحياة تقيف، فكري في اللي عندك وكيف تخلي نفسك أجمل وأحلى واحدة بالحاجات اللي متوفرة بين إيديك.♥️ -النقطة الثانية : السر الحقيقي في الاستمرار! قد يكون عندك الإمكانية تجيبي كل اللي نفسك فيه، بس إنت ما معّودة نفسك تستمري على عادة معينة، زي الاهتمام والعناية المتواصلة بشعرك وبشرتك، وبعد ينتهي حماس البدايات، ما تتوقعي بعدها نتيجة حلوة زي نتيجة اللي استمرت! الموضوع كله استمرار وصبر وطولة بال، ماف حل سحري لنتائج فورية وسريعة! أخيرًا.. بتذكر كان في بوست بنوتة بتقول إنها لمن تعمل أي ماسك بتسأل الله البركة وإنه ينفعها، فـ دي اسباب بتعمليها، نفس حكاية لمن تكوني مريضة، الدواء سبب، بس الشفاء بيد الله عز وجل♥️. #زكية_عاطف