*لیبیا میں ڈوبنے والے 73 مسافروں میں 63 پاکستانی تھے‘ بیشتر کے جاں بحق ہونے کی اطلاعات* *حادثے میں اب تک زندہ بچنے والے 3 پاکستانی شہری سفارتخانے پہنچ چکے ہیں،* *کشتی میں سوار پاکستانیوں کی اکثریت کا تعلق کرم اور باجوڑ کے قبائلی اضلاع سے ہے؛ دفترخارجہ کی قائمہ کمیٹی کو بریفنگ* ساجد علی اسلام آباد - لیبیا میں کشتی حادثے کے باعث ڈوبنے والے 73 مسافروں میں 63 پاکستانی تھے جن میں سے بیشتر کے جاں بحق ہونے کی اطلاعات ہیں۔ تفصیلات کے مطابق چیئرمین کمیٹی سینیٹر عرفان صدیقی کی صدارت میں ہونے والے قائمہ کمیٹی برائے خارجہ امور کے اجلاس میں دفتر خارجہ نے قائمہ کمیٹی کو بریفنگ میں بتایا کہ لیبیا میں کشتی حادثہ 8 فروری کو ہوا، حادثے کا شکار کشتی میں 73 افراد کے سوار ہونے کی اطلاعات ہیں، 63 پاکستانی اور 10 بنگلا دیشی کشتی میں سوار تھے، کشتی میں سوار افراد کی اکثریت جاں بحق ہوگئی، حادثے میں اب تک زندہ بچنے والے 3 پاکستانی شہری سفارتخانے پہنچ چکے ہیں، کشتی میں سوار پاکستانیوں کی اکثریت کا تعلق ضلع کرم اور باجوڑ کے قبائلی اضلاع سے ہے۔ سیکرٹری خارجہ نے قائمہ کمیٹی کو بتایا کہ بیرون ملک پاکستانیوں کی سمگلنگ کے لیے ہم نے انٹر پول کے ساتھ رابطے مضبوط کیے ہیں تاکہ گروپس کو پکڑا جا سکے، انسانی سمگلروں کے خلاف ملکی سطح پر وزارت داخلہ کو کردار ادا کرنا ہوگا، وزیراعظم نے ایسے واقعات کو روکنے کے لیے ٹاسک فورس قائم کر دی ہے، ہم میڈیا مہم بھی چلا رہے ہیں جو لوگوں میں آگاہی فراہم کرے گی تاکہ وہ غیر قانونی طریقے سے یورپ جانے کی کوشش نہ کریں۔ بتایا جارہا ہے کہ گزشتہ روز افریقی ملک لیبیا میں غیرقانونی تارکین کو لے جانے والی کشتی الٹ گئی، کشتی الٹنے کا یہ حادثہ زاویہ شہر کے شمال مغرب میں واقع مرساڈیلا کی بندرگاہ کے قریب پیش آیا، ایف آئی اے نے لیبیا میں پیش آئے اس حادثے میں کشتی میں سوار پاکستانیوں میں سے 7 کے جاں بحق ہونے کی تصدیق کی ہے، جاں بحق ہونے والوں میں 6 افراد کا تعلق ضلع کرم اور ایک کا باجوڑ سے ہے، جاں بحق پاکستانیوں کی شناخت ان کے پاسپورٹس سے کی گئی۔ https://whatsapp.com/channel/0029VanFZjs2ER6hj6ghlA2S