*نیمہ شعبان (شب برات): لاکھوں عاشقان امام مہدی(ع) کا ایران کے شہر قم میں اجتماع* قم - غیر ملکی خبر رساں ایجنسی کے حوالے سے اعتماد نیوز کی رپورٹ کے مطابق ، ایران کے مقدس شہر قم میں حضرت امام مہدی (ع) کے لاکھوں عقیدت مندوں نے جمعرات کی شام کو نیمہ شعبان (شب برات) کی مناسبت سے پیغمبر اعظم (ص) روڈ پر حضرت بی بی معصومہ(س) سے حضرت امام مہدی (ع) سے منسوب مسجد جمکران تک پیادہ روی کی۔ اس عاشقانہ مشی (پیدل مارچ) کے راستے میں نہ صرف قم بلکہ ایران کے دوسرے شہروں سے آنے والے عشاق امام زمان (ع) کے قافلوں کی خدمت کے لئے موکب (زائرین کی تھکن دور کرنے اور خدمات فراہم کرنے کے خیمے) لگائے گئے تھے تاکہ لوگ آسانی کے ساتھ مشی (پیدل مارچ) کو جاری رکھ سکیں اور پیروکاران فرزند زہراء (س) کی بھر پور خدمت کی جاسکے۔ اس راستے میں خدمت رسانی کے موکبوں کے علاوہ، کچھ طلباء اور بسیجیوں نے ادبی اور ثقافتی موکب کا اہتمام بھی کیا تاکہ عاشقان مہدی (ع) کو فلسفہ انتظار سے آگاہ کیا جاسکے۔ پیغمبر اعظم (ص) روڈ پر حضرت بی بی معصومہ (س) کے حرم سے مسجد جمکران تک کے اس عاشقانہ مارچ کے روٹ میں مختلف مقامات پر منقبت خوانی، قصدہ خوانی اور دیگر دینی ثقافتی پروگراموں کی تشکیل کے لئے خصوصی خیمے نصب کیے گئے تھا جہاں طلبہ کے مختلف گروپس نے پروگرام پیش کئے جن میں تازہ ترین کلام "فرماندہ مہدی ع" بھی شامل تھا۔ راستے بھر میں عالمی نجات دہندہ (ع) کے ظہور کے لئے مانگی جانے والی پرسوز دعاوں کا زمزمہ نہایت ایمان افروز تھا۔ اس مشی (پیدل مارچ) میں امام مہدی (ع) کے ہزاروں پروانے ان کے ظہور کی دعا لب پر سجائے ہاتھوں پر منجی بشریت کے پرچم اٹھائے اپنے آخری امام سے تجدید بیعت اور عہد وفا باندھ رہے ہیں۔ یہاں قم شہر کی انتظامیہ کا جذبہ خدمت بھی دیدنی تھا۔ اس روٹ پر عازمین اور زائرین کے لئے مفت ٹرانسپورٹ کی سہولت فراہم کی گئی ہے۔ راستے میں مغرب کی اذان گونجتے ہی پیروان امام زمانہ (ع) نے خدمت رسانی کے موکبوں میں نماز مغرب و عشاء ادا کی جو کہ سچی پیروی کا خوبصورت اظہار تھا۔ یاد رہے کہ اس پرجوش مارچ کا اختتام حضرت امام مہدی (ع) سے منسوب مسجد جمکران کے مرکزی صحن پر ہوتا ہے جہاں الوداعی تقریبات انجام پاتی ہیں۔ قابل ذکر ہے کہ اس روٹ پر پیدل مارچ کرنے والے زائرین کے لئے نذر و نیاز اور کھانے پینے کی سہولت کے علاوہ کچھ نوجوان مسجد جمکران کے زائرین کے جوتے مفت میں پالش کرتے ہیں تو ان میں سے کچھ امام زمانہ (ع) کی خوشنودی کے لئے مختلف خدمات بلاعوض فراہم کرتے ہیں جیسے فری ہیئر کٹنگ، سلائی اور موبائل فون رپیئرنگ وغیرہ۔ https://whatsapp.com/channel/0029VanFZjs2ER6hj6ghlA2S