PRESS RELEASE "Chawngtelui VC suspend an nih danah LADC sawrkar hmalak hi kan dem tak zet zet a, democracy palzutna lian takah kan ngai." - Pu MC. Lalramchhana President ZPM Lai Dist. Hqtrs. "Kan LADC dinhmun nimek sawifiahna awlsam ber chu FAIL a ni. Administration leh Finance-ah an hlawhchham chiang hle." - Pu Lallura Chinzah, ex-MDC. Adviser ZPM Lai Dist. Hqtrs. _Dated Lawngtlai,_ _03rd February, 2025._ Vawiin khan ZPM Lai District Headquarters office Lawngtlaiah 'Party chhûng inkhawm programme' hman a ni a. He huna thusawitu Pu MC. Lalramchhana, President chuan tun hnai maiah Chawngtelui Village Council chu suspend an ni a. He thilah hian politics bawlhhlawh leh tenawm tak a inrawlh ngei niin a lang a, "Chawngtelui VC suspend an nih danah hian LADC sawrkar hmalak dan kan dem tak zet zet a, democracy palzutna lian takah kan ngai." a ti. ZPM Lai District Headquarters President chuan, LADC sawrkar kaihruai mektu ULP chuan Chawngtelui Village Council-a ZPM in VC kan neih an hlauh avangin, majority kan neih hnu pawhin chhuanlam hrang hrang zawngin rem leh rem lovin an suspend ta a ni, a ti a. Hetianga hmala thintute chu ram hlui zia hmanga politics thalo kalpui thin, thuneihna diklo taka hmanga rorel thintu te bawk kha an ni a, kan VC member te tan kan theihtawp chhuahin an hmaah kan ding zel dawn a ni, a ti. Pu Lallura Chinzah, ex-MDC & Adviser chuan LADC sawrkar dinhmun mek chu, a chhunga chengte leh rorel mektu te'n an hriatchian bera a rin thu a sawi a. 'Kan LADC dinhmun nimek sawifiahna awlsam ber chu 'FAIL' tih hi a ni a, administration leh finance enkawlna kawngah an hlawhchham chiang hle a, tun sawrkara kan hma hun chu a thim hle a ni.' a ti a. ZPM party mite chuan 'Enge kan ramin a mamawh ber ?' tia inzawt fo turin leh, mahni hamthatna leh hlawkna tur mai zawng lova, rilru dik tak pu chunga politics hmathlir nei turin kalkhawmte chu a chah a ni. Pu P. Lalrinawma, General Secretary kaihhruai he inkhawmah hian Upa F. Hrangtukhuma, Adviser chuan hunserh a hmang a. Tawngtai rualna leh Pathian hla sak hona hun hman niin, inhmelhriat tirna hun tawi hman a ni bawk a. He hunah hian ZPM Lai District Headquarters Lawngtlai EOB te leh party hruaitute leh, Pu K. Hre Kung MDC & Leader of Opposition bakah a thawhpui ZPM Legislature Party member te, party mi thahnemtak, office-a lenglo khawpa tam an kalkhawm a ni. Issued by :- Media, IT & Publicity Dept. ZPM Lai Dist. Hqtrs Lawngtlai, Mizoram. PR No. ZPM-04/Lai-DHQ/2024-2026/IT/60 Dated Lawngtlai, 03rd February, 2025.