PRESS RELEASE "Pathianin LADC min pek dan hi a rilin, a ropui em em a. A humhalh hnathawh hi kan zavaia kan mawhphurhna a ni." - Pu Lalnunsema Executive Member ZPM General Hqtrs. Dated Lawngtlai, 14th Febuary, 2025. Vawiin khan ZPM Lai District Headquarters Lawngtlai office ah 'Friday Political Session' programme hman a ni a, he huna thusawitu Pu Lalnunsema Executive Committee Member, ZPM General Headquarters chuan LADC indin chhoh dan leh a ṭobul chipchiar taka sawiin, harsatna leh dodalna nasa taka LADC lo pian chhuah dan ngaihnawm takin a sawi a. "Pathianin LADC min pek dan hi a rilin, a ropui em em a. A humhalh hnathawh hi kan zavaia kan mawhphurhna a ni." a ti. Pu Lalnunsema chuan, Autonomous District Council thiltihtheihna leh, a hnathawh theihte chu chiang leh zual zawka zir chian a - ram leh hnam hmasawnna tura tangkai zawka hmalak theihna kawng a awm thu a sawi a. South East Asia corridor nimai tur Lawngtlai khawpui chu kawng engkimah kan lo inpuahchah a, a hlawkna tel thei tura kan lo in buatsaih lâwk a tul a ni, a ti bawk. 2023 MLA General Election-a Lawngtlai West ZPM MLA candidate ni bawk Pu Lalnunsema chuan, Mizoram buhzem (Rice Bowl of Mizoram) nih theihna tur khawp leilung hausakna Lawngtlai District in kan neih thu sawi bawkin, Chamdur Project hmangin Mizoram mamawh buh leh bal thar chhuah a nih theih dan chipchiar taka sawizauna a nei bawk a. Chamdur Project chu Mizoram sawrkar hruaitute pawhin an ngaihpawimawh thu leh, a hlawhtlin theihna tura hmalakna awm tawh leh, awm mekte ngaihthlak zui a ni bawk. ZPM Lai District Headquarters Chief Organiser Pu C. Kapkima kaihhruai he hun hmanna ah hian, Pu T. Lalbiakmuana ex-MDC, Adviser ZPM Lai District Headquarters chuan hunserh a hmang a. Pu K. Hre Kung MDC, Pu H. Lalramfawna MDC leh ZPM Lai District Headquarters Lawngtlai hruaitute leh party mi engemawzat te an tel a ni. Issued by :- Media, IT & Publicity Dept. ZPM Lai Dist. Hqtrs Lawngtlai.