PRESS RELEASE "ZPM party mite chu kan danglam tur a ni a. Eng dinhmunah pawh ding ila, kan party thu rin leh thiltumte hre rengin, lungrual takin ke i pen zel ang u. " - Pu J. Zahlira Senior Vice President ZPM Lai DHQ, Lawngtlai. Dated Lawngtlai, 24th Febuary, 2025. Vawiin khan ZPM Lai District Headquarters office Lawngtlaiah, 'party chhung inkhawm programme' hman a ni a. He huna thusawitu Pu J. Zahlira, Sr. Vice President ZPM Lai DHQ chuan ZPM party mite chu ZPM thurin (ideology) leh thiltum (policy) te hre reng fo turin a chah a, "ZPM party mite chu kan danglam tur a ni a. Eng dinhmunah pawh ding ila, kan party thu rin leh thiltumte hre rengin, lungrual takin ke i pen zel ang u. " a ti. ZPM Lai DHQ Sr. Vice President chuan, Lairam Politics boruak inlumleh dan leh, kan political history ngun taka an zir chian hnuin - ZPM General Headquarters chuan kum 2025 kum tawpa MDC inthlan lo awm tur atan 'Search Committee' din tura thurawn an pek thu leh, Search Committee chu din fel a nih tawh thu a sawi a. Ticket beiseia Aizawla intlansiak leh hotu pawimawhte biak tlawn thin game chu 'Kalphung thar' ah chuan a awm tawh dawnlo a ni, a ti a. Search Committee chuan uluk leh chîk taka ro a rel tur thu leh, Lairam leh hnam hmasawnna tura mi chhawrna-awmte an en zui bik dawn thu a sawi zui bawk. Pu MC. Lalramchhana, President ZPM Lai DHQ pawhin thusawiin, LADC ah ZPM chu sawrkarna siam tura a inpuahchah mek thu leh, ṭha tak leh dik taka ZPM MDC te'n hna an thawh theihna tura thawhpui fo turin party mite chu a ngen a. " Kan hma lamah hian kawng zawh tur tam tak a awm, lungrual taka ke pen in, ZPM thuthlungah kan innghah tlat chuan he kan Lairam hi a dam ngei dawn a ni.", a ti. ZPM Lai District Headquarters Adviser Pu C. Vanlalhluna kaihhruai he hunah hian, Upa F. VL. Chhawna Adviser chuan hunserh a hmang a. Mithar lawmluh report Pu H. Vanlalthaliana, Vice President hnen aṭanga ngaihthlak niin, zin report Pu NT. Lalmuanzuala, General Secretary hnen aṭanga ngaihthlak zui a ni bawk a. Chhung inkhawm programme ah hian ZPM Lai District Headquarters hruaitute, ZPM MDCs te leh party mi thahnemtak an tel a ni. Issued by :- Media, IT & Publicity Dept. ZPM Lai District Headquarters Lawngtlai - 796891 PR. No. ZPM-04/Lai-DHQ/2024-2026/IT/66 Dated Lawngtlai, Monday, the 24th Febuary, 2025.