لُمّہ یاسمین ءِ توکل ءَ سد سلام نبشتہ کار: میرک بلوچ زرمبش نبشتانک https://zrumbesh.com/article/editor-choice/4132/ من مُدام گْوشتگ کہ زالبول ءِ توکا توکل سک کم اِنت، زالبول زُوت ناُمیت بیت کسان کسانیں جیڑہ آئی ءَ را پروش اَنت۔ منی نِزّ ءَ زالبول سکّیں ایموشنلیں شئے ءِ بوتگ، من ءَ اوست نہ بوگ کہ زالبول جھد ءِ آجوئی ءِ توکا چوشیں ھم شوکیں کِردے پہ وت نامینت کنت۔ بلے وھدے لُمّہ یاسمین ءِ بارہ ءَ جیڑاں گُڑا چم ارس بہ اَنت ءُ بس دپ ءَ ھمے ھبر در کئیت " لُمّہ تئی توکل ءَ سد سلام اِنت" چی ءَ کہ جُھد ءِ توکا تو سک باز رنج ءُ گم دیستگ، کسانیں اُمبر ءَ یک جنگجوے ءِ لوگبانُک بوتگ ئے، چوش کہ جنگجوے ءِ زندگی سک تنگی ءِ توکا گْوز اِیت۔ سک باز تکلیپی برداش کنگی بیت، پد ءَ وتی یکّیں ورنائیں نوکبروتیں زھگ ءَ را دست بڈّ ءَ جتگ ءُ کُربان بوَگ ءَ دیم داتگ، چوش کہ اے پہ یک ماتے ءَ نہ بوتگیں ھبرے کہ دست ءِ وت وتی زھگ ءَ ملکموت ءِ نیمگ ءَ دیم بہ دئے۔ اے ھبر تچک اِنت کہ تو سما ءُ سسْمّائی ھوالہ ءَ سکا مُھکمیں شیرزالے کہ چوشیں پیسلھے زُرتّگ، اے تئی توکل اِنت، زمین ءُ راجدوستی اِنت، پد ءَ چُک ءِ جُتائی ءِ گم ھما ھساب ءَ اَت آں کہ تئی لوگواجہ ( جنرل اُستاد اسلم جان ) شھید بوت بلے تو انگت اِنچو مُھکم ئے ءُ انگت جھد ءِ آجوئی ءِ پگر ءَ گوں دیمءَ روان ئے، پہ راستی تئی توکل ءَ سلام اِنت امّا۔ مرچی ایندگہ مات بلوچ سرمچارانی جان سلامتی ءُ سوبمندی ءِ واستا دُوا کن اَنت پہ آیاں گل ءُ شاد اَنت کہ پہ ما جنگ ءَ اَنت، بلے وھدے ھمے ماسانی وتی زھگ کوہ ءَ روت جنگ ءَ ھوار بیت گُڑا نند اَنت ءُ گریونت ءُ برے سنگتاں بھتام جن اَنت کہ پلانی مئے زھگ رد داتگ ءُ بُرتگ، برے گْوش اَنت اے وڑ اِنت برے گْوش آ وڑ اِنت، برے یک مُلا ءُ میایے ءِ گْور ءَ رو اَنت کہ مئے زھگ واتر بئیت اِنت، بلے اے چیز ءَ نہ جیڑاں کہ مئے زمین ءِ سر ءِ ھمک انسان کُربانی مہ دَنت ما آجو بوت نہ کن اِیں، چندے مات پہ ادارُوکی زندمان ءَ جیڑ اِیت ءُ وتی زھگاں چہ جھد ءُ جنگ ءَ دور دار اِیت، بلکیں اد ءَ ھمُک مات ءَ وتی تنگوئیں بچّ کُربان کنگی اَنت دانکہ آیوکیں پدریچ ءِ باندات رُوژناہ بہ بیت۔ بلے! تو جتائیں کارستے ئے، تو کُربانی داتگ ءُ دیگ ءَ ئے، ءُ من ءَ اُمیت اِنت کہ انگت پہ کُربانی ءِ دَیگ ءَ چک ءُ پد نہ بہ ئے، تئی کرّ ءَ ھرچ چیزے بہ بیت تو پہ زمین کندان کندان ءَ ندْرے کن ئے، منی مات ءِ بدل تئی توکل ءَ سلام اِنت۔