*വിളക്ക്* 🌕 *ആത്മ* *വിശുദ്ധിയുടെ* *രാപ്പകലുകൾ* "അകം ആണ് മനുഷ്യൻ" എന്നത് നമുക്ക് അനുഭവ വേദ്യമാണെങ്കിലും നാം പൊതുവെ, കാണുന്നതിൽ മാത്രം അഭിരമിക്കുന്നവരാണ്. അതുകൊണ്ടാണ് കാഴ്ചയും കേൾവിയും സൃഷ്ടിക്കുന്ന ഒച്ചകളുടെ ദൃശ്യ-ശ്രവ്യ മാധ്യമങ്ങൾക്കപ്പുറം അധർമം പരത്തുന്ന ചിന്താ മാലിന്യം നമുക്ക് ചർച്ചയാവാത്തത്. ആത്മാവ്, മനസ്സ്, ഹൃദയം, ബോധം.. എന്നൊക്കെ പറയുമ്പോൾ അർത്ഥമാക്കുന്ന ഉള്ളം സദാ വിശുദ്ധമാക്കി വെക്കാതെ നമുക്ക് ധാർമികക്കരുത്ത് ലഭിക്കില്ല. ശിക്ഷണങ്ങളിൽ (തർബിയത്ത് ) ഏറ്റവും മുഖ്യം ആത്മീയ ശിക്ഷണമാണ്. ബാഹ്യ ശരീരം മാത്രമല്ല, ആത്മാവും ജഡവുമാണ് മനുഷ്യൻ. ആത്മവിശുദ്ധിയും ആത്മീയക്കരുത്തും ആത്മനിയന്ത്രണവുമാണ് പ്രതിസന്ധികൾക്കിടയിലും പിടിച്ചു നിൽക്കുന്ന കരളുറപ്പുള്ള മനുഷ്യനെ തീർക്കുന്നത്. അധർമവും അരാജകത്വവും അനീതിയും പരത്തുന്നവരെ "ഉള്ളം കെട്ട ജനം" എന്ന് വിശുദ്ധ ഖുർആൻ നിരീക്ഷിച്ചിട്ടുണ്ട്. ജീവിതത്തെരക്കുകൾക്കിടയിൽ അകം ജീർണിക്കുന്നത് നാം അറിയുന്നില്ല! ശിർക്, കുഫ്റ്, നിഫാഖ്, ബിദ്അത്ത്, ജിബ്ത്, ത്വാഗൂത്ത്, ജാഹിലിയ്യത്ത് എന്നിങ്ങനെ വിശ്വാസ മാലിന്യങ്ങളും അഹങ്കാരം, അസൂയ, പൊങ്ങച്ചം, സാമ്പത്തിക തട്ടിപ്പുകൾ, സദാചാരക്കുറ്റങ്ങൾ, അക്രമവാസനകൾ പോലുള്ള സാംസ്കാരിക ധ്വംസനങ്ങളും ആദ്യം ഉടലെടുക്കുന്നത് നമ്മുടെ അകത്താണ്. ബാഹ്യ പ്രവർത്തനങ്ങളത്രയും അകത്തിൻ്റെ ആവിഷ്കാരങ്ങൾ മാത്രം! ഒരു വർഷക്കാലം നിരന്തരമായി ഓടിനടന്ന നമുക്ക് ഇനി ഒരു മാസക്കാലം അകയന്ത്രങ്ങളെ പരിശോധിക്കുന്ന ആത്മവിചാരണക്കാലമാക്കാം. കഴിഞ്ഞ കാലം നാം അശ്രദ്ധമായി അവഗണിച്ച പായലും പൂപ്പലും വളർന്നു വലുതായി ഹൃദയ മസ്തിഷ്കങ്ങളെ കീഴടക്കിയിട്ടുണ്ട്. പരിശുദ്ധ റമദാൻ മാസം ആ ജീർണതകളിലേക്കാണ് നമ്മുടെ ശ്രദ്ധ ക്ഷണിക്കുന്നത്. *ജെ.കെ* 💎 💦💦💦 *Join WhatsApp Group* 👇🏼👇🏼 https://chat.whatsapp.com/GWGaA1NFIME3Nr9n0H6uXo *Join WhatsApp channel*👇🏼👇🏼 https://whatsapp.com/channel/0029VaAF9bA1dAwCLoMTkn0F 💕💕💕