🎯 *UK മുഹമ്മദ്‌ കുഞ്ഞി* ✒️ ലീഗ് ഖിസ്സ... (ഭാഗം -16) *കാലുറക്കും മുമ്പൊരു തെരെഞ്ഞെടുപ്പ്...* `കൂടുതൽ മുസ്ലിം ലീഗ് വാർത്തകൾ ലഭിക്കാൻ join 👇` https://whatsapp.com/channel/0029VaezIBiGE56sExzvEc0e ഇന്ത്യക്ക് സ്വാതന്ത്ര്യം ലഭിച്ച 1947 ആഗസ്ത് മാസത്തിൽ തന്നെയാണ് മലബാറിനെ പിടിച്ചുകുലുക്കിയ രാമസിംഹൻ വധം നടക്കുന്നത്. മലപ്പുറത്തെ ധനിക കുടുംബാംഗമായ കിളിയ മണ്ണിൽ ഉണ്ണീൻ എന്ന പ്രമാണി ഇസ്ലാം മതം ഉപേക്ഷിച്ച് ഹിന്ദു മതത്തിൽ ചേർന്നു. പൂണൂൽ ധരിപ്പിച്ച് കൊട്ടിഘോഷിച്ച് കൊണ്ടായിരുന്നു അദ്ദേഹത്തെ പലരും കൊണ്ടു നടന്നത്. രാമസിംഹൻ തൻ്റെ ബന്ധുക്കളെയും തൊഴിലാളികളെയും മതം മാറ്റാൻ ശ്രമം നടത്തിയത് വ്യാപക പ്രതിഷേധങ്ങൾക്ക് കാരണമായി. അതിനിടെ ദുരൂഹ സാഹചര്യത്തിൽ രാമസിംഹൻ കൊല്ലപ്പെട്ടു. രാമസിംഹൻ വധത്തെ തുടർന്നു മലബാറിൽ ധാരാളം അറസ്റ്റുണ്ടായി. പോലീസ് നരനായാട്ടും ലോക്കപ്പ് മർദ്ദനവും വ്യാപകമായി. പോലീസ് അന്വേഷണം നടന്നു കൊണ്ടിരിക്കെ, 1947 ആഗസ്ത് 24 ന് കമ്മ്യൂണിസ്റ്റ് പാർട്ടിയുടെ മുഖപത്രമായ 'ദേശാഭിമാനി'യിൽ ഇ.എം.എസ്. നമ്പൂതിരിപ്പാട് വിവാദ പരമായ ഒരു ലേഖനമെഴുതി. അർത്ഥശൂന്യമായ കണ്ടെത്തലുകളായിരുന്നു ലേഖനത്തിലുടനീളം ഇ.എം.എസ്. നിരത്തിയത്. രാമസിംഹൻ വധത്തിൽ മുസ്ലിം പ്രമാണിമാർക്കെല്ലാം പങ്കുണ്ടെന്ന തരത്തിൽ അബദ്ധജഢിലമായ വാദമുഖങ്ങൾ നിരത്തിക്കൊണ്ടുള്ള പ്രസ്തുത ലേഖനത്തിന് 1947 ഒക്ടോബർ 5 ന് 'ചന്ദ്രിക'യിലൂടെ സി.എച്ച്. മുഹമ്മദ് കോയ സാഹിബ് മറുപടി എഴുതി. "ഇ.എം.എസ്സിൻ്റെ ഊഹങ്ങൾ " എന്ന ശീർഷകത്തിൽ ഇ.എം.എസ്സിൻ്റെ വാദമുഖങ്ങളെ അക്കമിട്ട് മറുപടി പറഞ്ഞു കൊണ്ട് സി.എച്ച്. ലേഖനമെഴുതുമ്പോൾ അദ്ദേഹത്തിന് വെറും ഇരുപത് വയസ്സായിരുന്നു പ്രായം. സംഭവം വർഗ്ഗീയ സംഘർഷങ്ങളിലേക്ക് നീങ്ങുന്ന ഘട്ടം വന്നപ്പോൾ സീതി സാഹിബ് മദിരാശിയിലേക്ക് പുറപ്പെട്ടു. അവിടെയെത്തി അദ്ദേഹം ബന്ധപ്പെട്ട മന്ത്രിമാരെ കണ്ടു. സംഭവത്തിന്റെ ഗൗരവം മനസ്സിലാക്കിയ ഭരണകൂടം ഉടനെ തന്നെ ഇടപെട്ടു. വലിയൊരു സാമുദായിക സംഘർഷം ഒഴിവായി. 1947 ൽ തന്നെയാണ് മലബാറിൻ്റെ വിദ്യാഭ്യാസ വിപ്ലവത്തിന് നന്ദി കുറിച്ച് കൊണ്ട് ഫറൂഖ് കോളജ് യാഥാർത്ഥ്യമാവുന്നത്. കോളജിൻ്റെ സംസ്ഥാപനത്തിനും നടത്തിപ്പിനും മുസ്ലിം ലീഗ് പാർട്ടിയും അതിൻ്റെ നേതാക്കളും നടത്തിയ അക്ഷീണ യത്നം വാക്കുകൾ കൊണ്ടോ വരികൾ കൊണ്ടോ വിവരിക്കാനാവാത്തതാണ്. 1946 ലെ തെരെഞ്ഞെടുപ്പിനെ തുടർന്ന് മദിരാശി സംസ്ഥാന നിയമസഭയിൽ പ്രതിപക്ഷ നേതൃസ്ഥാനം വഹിച്ചിരുന്നത് ഖാഇദെ മില്ലത്ത് മുഹമ്മദ് ഇസ്മായിൽ സാഹിബായിരുന്നു. ഇന്നത്തെ തമിഴ്നാടും ആന്ധ്രയും മലബാറുമൊക്കെ ഉൾക്കൊള്ളുന്ന വിശാലമായൊരു സംസ്ഥാനമായിരുന്നു മദിരാശി. ഭരണകക്ഷിയുടെ നല്ല പ്രവർത്തനങ്ങളെ പിന്തുണച്ചും കൊള്ളരുതായ്മകളെ തുറന്ന് കാട്ടിയും ക്രിയാത്മകമായ പ്രതിപക്ഷമെന്ന് അക്ഷരാർത്ഥത്തിൽ പറയാൻ പറ്റുന്ന ഒരു കാലമായിരുന്നു അത്. ഇസ്മായിൽ സാഹിബിൻ്റെ നീതിയുക്തമായ സമീപനങ്ങളും ഇടപെടലുകളും ഇതര കക്ഷികൾക്ക് കൂടി മാതൃകയായിരുന്നു. അന്ന് സഭയിൽ കമ്മ്യൂണിസ്റ്റ് പാർട്ടിക്ക് രണ്ട് അംഗങ്ങളാണ് ഉണ്ടായിരുന്നത്. ഒരാൾ തമിഴ് പ്രദേശത്ത് നിന്നുള്ള അനന്തൻ നമ്പ്യാരും മറ്റേയാൾ ആന്ധ്ര ഭാഗത്ത് നിന്നുമുള്ള അനന്താചാലുരുവും. ഏതോ ഒരു സുപ്രധാന വിഷയത്തിൽ നിയമസഭയിൽ പ്രമേയം അവതരിപ്പിക്കാൻ കമ്മ്യൂണിസ്റ്റ് പാർട്ടി ആഗ്രഹിച്ചു. എന്നാൽ സാങ്കേതിക കാരണം കൊണ്ട് പ്രമേയം അവതരിപ്പിക്കാൻ കഴിയാതെയായി. അവരുടെ തമിഴ്നാട്ടിൽ നിന്നുള്ള അംഗത്തെ മറ്റൊരു വിഷയത്തിൽ പോലീസ് അറസ്റ്റ് ചെയ്തു ജയിലിലടച്ചു. ഒരു പ്രമേയം അവതരിപ്പിക്കാൻ ചുരുങ്ങിയത് രണ്ട് പേർ വേണം. ഒരാൾ അവതാരകനും മറ്റേയാൾ പിന്തുണക്കാനും. ഈ പ്രതിസന്ധി തരണം ചെയ്യാൻ അവശേഷിക്കുന്ന ഒരംഗം പ്രതിപക്ഷ നേതാവ് ഇസ്മായിൽ സാഹിബിന്റെ അടുത്ത് കാര്യം പറഞ്ഞു. വിഷയം പ്രധാനപ്പെട്ടതാണെന്ന് മനസിലാക്കിയ ഇസ്മായിൽ സാഹിബ്, പ്രമേയം തയ്യാറാക്കിക്കോളൂ മുസ്ലിം ലീഗ് അതിനെ പിന്തുണക്കും എന്ന മറുപടി നൽകി. അങ്ങനെ മുസ്ലിം ലീഗ് അംഗത്തിന്റെ പിന്തുണയോടെ കമ്മ്യൂണിസ്റ്റ് പാർട്ടി അംഗം പ്രമേയം അവതരിപ്പിച്ചു. പ്രത്യയശാസ്ത്രപരമായും സംഘടനാപരമായും ഒരു തരത്തിലുമുള്ള യോജിപ്പും ഇല്ലാതിരുന്നിട്ടും വിഷയത്തിന്റെ ഗൗരവം ഉൾക്കൊണ്ടാണ് മുസ്ലിം ലീഗ് നിലപാടെടുത്തത്. സംഭവ ബഹുലമായ രണ്ട് വർഷങ്ങൾ കടന്നു നീങ്ങവെ, ആകസ്മികമായാണ് ഒരു ഉപതെരെഞ്ഞെടുപ്പ് വന്നത്. ഇന്ത്യൻ യൂണിയൻ മുസ്ലീ ലീഗ് രൂപീകരിച്ചതിന് ശേഷം മലബാറിൽ നടന്ന ആദ്യ അഗ്നിപരീക്ഷണമായിരുന്നു 1950 ലെ മലപ്പുറം ഉപതെരെഞ്ഞെടുപ്പ്. മദിരാശി സംസ്ഥാന നിയമസഭയിലെ മുസ്ലിം ലീഗ് അംഗമായിരുന്ന കൊയപ്പത്തൊടി അഹമ്മദ് ഹാജി സാഹിബിന്റെ മരണത്തെ തുടർന്നായിരുന്നു പ്രസ്തുത ഉപതെരെഞ്ഞെടുപ്പ് വേണ്ടി വന്നത്. മുസ്ലിം ലീഗുകാരൻ എന്ന് പറയുന്നത് അപമാനമായിക്കണ്ട് പാർട്ടിയിൽ നിന്നും പ്രമാണിമാരെല്ലാം കൊഴിഞ്ഞു പോകുന്ന കാലം. സ്ഥാനാർത്ഥിയായി നിൽക്കാൻ ആളെ കിട്ടാതെ വിഷമിച്ചു. മദിരാശി സംസ്ഥാന മുസ്ലിം ലീഗ് ജന:സെക്രട്ടരി കെ.ടി.എം. അഹമ്മദ് ഇബ്രാഹിം സാഹിബ് "ഡെക്കാൻ ഹെറാൾഡ്" എന്ന പത്രത്തിൽ മുസ്ലിം ലീഗിന് ഒരു സ്ഥാനാർത്ഥിയെ ആവശ്യപ്പെട്ടു കൊണ്ട് പരസ്യം കൊടുത്തു. എന്നിട്ടും ആരും തയ്യാറായില്ല. മുസ്ലിം ലീഗിന്റെ പ്രത്യേക ദൂതനായി എം. അലിക്കുഞ്ഞി സാഹിബ് തെക്കെ മലബാറിൽ മൂന്ന് ദിവസം ഇരുനൂറിലധികം മൈൽ സഞ്ചരിച്ചു. ഫലം ശൂന്യമായിരുന്നു. ഒടുവിൽ എല്ലാം സീതി സാഹിബ് സ്വയം ഏറ്റെടുത്തു. അദ്ദേഹം തന്റെ കാറുമായി നേരെ തിരൂരങ്ങാടിയിലേക്ക് പുറപ്പെട്ടു. അവിടെ നിന്നും എം.കെ. ഹാജി സാഹിബിനെയും കൂട്ടി മഞ്ചേരി ലക്ഷ്യമാക്കി നീങ്ങി. നേരെ ചെന്നത് പൗരപ്രമുഖനായ എം.പി.എം. മൊയ്തീൻ കുട്ടി കുരിക്കളുടെ വസതിയിലേക്കായിരുന്നു. സലാമും കുശലാന്വേഷണങ്ങൾക്കും ശേഷം സീതി സാഹിബ് കാര്യം ഉണർത്തി. "മുസ്ലിം ലീഗിന് ഒരു സ്ഥാനാർത്ഥിയെ നിങ്ങൾ തരണം." സത്യത്തിൽ സീതി സാഹിബിന്റെ വാക്കുകൾ മൊയ്തീൻ കുട്ടി കുരിക്കളെ വല്ലാതെ വിഷമിപ്പിച്ചു. മുസ്ലിം സമുദായത്തിന് വേണ്ടി ഊണും ഉറക്കുമുപേക്ഷിച്ച് കഠിന പ്രയത്നം നടത്തുന്ന സാത്വികനായ വലിയ മനുഷ്യൻ ഈ ഒരു കാര്യം പറയാൻ എന്റെ അടുത്തേക്ക് വരുന്നുവോ? ആരെയെങ്കിലും ഒരു ദൂതനെ അയച്ചാൽ മതിയായിരുന്നില്ലേ... ചിന്തയിൽ നിന്നുണർന്ന മൊയ്തീൻ കുട്ടി കുരിക്കൾ തിരിച്ചു പറഞ്ഞു "ആരെയാണ് അങ്ങ് ഉദ്ധേശിക്കുന്നത്? "താങ്കളുടെ മരുമകൻ ഹസ്സൻ കുട്ടിയെ" സീതി സാഹിബ് മറുപടി പറഞ്ഞു. അങ്ങനെ മലപ്പുറം ഉപതെരെഞ്ഞെടുപ്പിന് മുസ്ലിം ലീഗിൻ്റെ സ്ഥാനാർത്ഥിയായി എം.പി.എം. ഹസ്സൻകുട്ടി കുരിക്കൾ എത്തി. അതികഠിനമായിരുന്നു തെരെഞ്ഞെടുപ്പ് പ്രവർത്തനങ്ങൾ. മുസ്ലിം ലീഗിനെ തോൽപ്പിക്കാൻ എല്ലാ കക്ഷികളും കിണഞ്ഞു ശ്രമിച്ചു. എല്ലാം അല്ലാഹുവിൽ അർപ്പിച്ച് തെരെഞ്ഞെടുപ്പ് ഗോദ യിലേക്കിറങ്ങി. ചാക്കീരി അഹമ്മദ് കുട്ടി എന്ന ഏറനാടൻ പുലിക്കുട്ടി തെരഞ്ഞെടുപ്പിന് ചുക്കാൻ പിടിച്ചു... (തുടരും) U.k. Muhammed Kunhi