رمضان المبارک سے پہلے چینی کی قیمتوں میں مسلسل اضافہ جاری ہے، عام مارکیٹ میں چینی 160 روپے فی کلو تک پہنچ گئی ہے۔ قومی اخبار کے مطابق سرکاری اعداد و شمار میں بتایا گیا ہے کہ ملک میں چینی کی اوسط قیمت 154 روپے 27 پیسے فی کلو ہو چکی ہے۔ نئے سال 2025 کے پہلے ڈیڑھ ماہ میں چینی کی قیمت میں 15 روپے 63 پیسے کا اضافہ ریکارڈ کیا گیا۔ سرکاری دستاویزات کے مطابق، گزشتہ ڈھائی ماہ میں چینی کے اوسط نرخ 22 روپے 42 پیسے بڑھے ہیں، جب کہ 2025 کے آغاز پر چینی کی قیمت 138 روپے 64 پیسے فی کلو تھی۔ حکومت نے جون سے اکتوبر 2024 کے دوران 7 لاکھ 50 ہزار ٹن چینی برآمد کرنے کی اجازت دی تھی، جس کے بعد اکتوبر میں مزید 5 لاکھ میٹرک ٹن چینی برآمد کرنے کی منظوری دی گئی۔ رپورٹ کے مطابق، شوگر ملز ایسوسی ایشن نے چینی کم قیمت پر فروخت کرنے سے انکار کر دیا ہے۔ حکومت نے رمضان کے دوران چینی کی قیمت 140 روپے فی کلو مقرر کرنے کی ہدایت کی ہے، تاہم شوگر ملز ایسوسی ایشن کا کہنا ہے کہ پیداواری لاگت کے مطابق چینی 170 روپے فی کلو پڑ رہی ہے، کم قیمت پر فروخت سے انہیں نقصان ہوگا۔ #sugarprice #ramadan #pakistan #zavianews